യെലഹങ്ക (ബെംഗളൂരു) യിൽ നിന്ന്  മൈക്കിൾ വർഗ്ഗീസ് ചെങ്ങാടക്കരി

ലോകത്തെ സൈനിക ശക്തികളെല്ലാം ഇപ്പോൾ അഞ്ചാം തലമുറ യുദ്ധവിമാനങ്ങൾക്ക് പിന്നാലെയാണ്. അമേരിക്കയും റഷ്യയും ഇതിനകം അഞ്ചാം തലമുറ പോർവിമാനങ്ങൾ വികസിപ്പിച്ചു കഴിഞ്ഞു.ഇന്ത്യയും ചൈനയും അഞ്ചാം തലമുറ യുദ്ധവിമാനങ്ങളുടെ അന്തിമ പണിപ്പുരയിലാണ്.

ഇതിനിടെ , എയ്റോ ഇന്ത്യ പ്രദർശനത്തിൽ റഷ്യയുടെ അഞ്ചാം തലമുറ യുദ്ധവിമാനമായ എസ് യു - 57 അതിൻ്റെ കരുത്ത് തെളിയിച്ചു കൊണ്ട് ആകാശത്തേക്ക് പറന്നുയരുന്ന കാഴ്ച വിദേശ സാങ്കേതിക വിദഗ്ധരുൾപ്പെടെ
ഈ മേഖലയിൽ പ്രവർത്തിക്കുന്നവർക്ക് മറക്കാനാകാത്ത അനുഭവമായി

വെറും 10 സെക്കൻ്റ്

വെറും 10 സെക്കൻ്റ് കൊണ്ടാണ് എയർ ഫോഴ്സ് സ്റ്റേഷനിലെ റൺവേയിൽ നിന്ന് എസ് യു - 57 പറന്നുയർന്നത്. റൺവേയുടെ 0.8 കിലോമീറ്റർ മാത്രമേ പറന്നുയരാൻ വേണ്ടി വന്നുള്ളു എന്നത് മറ്റൊരു സവിശേഷതയായി. എസ് യു 57 ന് പറന്നുയരാനും (ടേക്കോഫ്), പറന്നിറങ്ങാനും (ലാൻഡിംഗ്‌ ) ഹൃസ്വ സമയം മതിയെന്നത് മിലിറ്ററി ഏവിയേഷൻ സാങ്കേതിക വിദ്യയിൽ റഷ്യൻ ശാസ്ത്രജ്ഞർ കൈവരിച്ച നേട്ടത്തിൻ്റെ മകുടോദഹരണമായി. സ്‌റ്റോൾ (ഷോർട്ട് ടേക്കോഫ് ആൻഡ് ലാൻഡിംഗ് - എസ് ടി ഒ എൽ) എന്നാണ് സാങ്കേതിക, സൈനിക ഭാഷയിൽ ഇതിനെ പറയുന്നത്.

സൂപ്പർ എൻജിൻ

എസ് യു - 57 ഫൈറ്റർ ജെറ്റിൻ്റെ ഈ കരുത്തിന് പിന്നിൽ ഒരു ഇരട്ടച്ചങ്കനുണ്ട്. എ എൽ -41 എന്ന എൻജിനാണ് പോർവിമാനത്തിൻ്റെ ശക്തികേന്ദ്രം. വലിയ റൺവേ ഉൾപ്പെടെ  അടിസ്ഥാന സൗകര്യങ്ങളൊന്നും കൂടാതെ വേഗത്തിൽ പറന്നുയരാനും പറന്നിറങ്ങാനും മാത്രമല്ല, ആകാശത്ത് കൂടുതൽ മേൽക്കോയ്മ നേടാനും എ എൽ -41 എൻജിൻ ഫൈറ്റർ ജെറ്റിനെ സഹായിക്കുന്നു. പഴയ തലമുറയിലെ ഫൈറ്റർ ജെറ്റുകൾക്ക് പറന്നുയരാൻ കൂടുതൽ സമയവും വലിയ റൺവേയും ആവശ്യമാണ്.

എയർസ്ട്രിപ്പുകൾക്ക് അനുയോജ്യം

ചെറിയ റൺവേ മതിയെന്നതിനാൽ എയർസ്ട്രിപ്പുകളിൽ നിന്നും എസ് യു - 57 ന് പറന്നുയരാൻ സാധിക്കും. അതിനാൽ ദുഷ്കരവും അപരിചിതവുമായ മലയിടക്കുക പോലെയുള്ള പോർമുഖങ്ങളിൽ പോലും ഈ അഞ്ചാം തലമുറക്കാരനെ വിന്യസിക്കാം. 

എയ്റോ ഇന്ത്യ 2025 പ്രദർശനത്തിലെ ഏറ്റവും ശ്രദ്ധേയമായ പോർവിമാനങ്ങളിലൊന്നാണ് എസ് യു - 57. സാധാരണയായി ഫൈറ്റർ ജെറ്റുകൾക്ക് പെട്ടെന്ന് പറന്നുയരുന്നതിനും ചെറിയ റൺവേയിൽ നിന്ന് ടേക്കോഫ് ചെയ്യുന്നതിനും അധിക സംവിധാനങ്ങൾ ഏർപ്പെടുത്തുന്നതിന് ഭാരിച്ച ചെലവ് വരും. എന്നാൽ എസ് യു - 57 ൽ ഇങ്ങനെയുള്ള അധികച്ചെലവിൻ്റെ പ്രശ്നം ഉദിക്കുന്നില്ല എന്നതും മിലിറ്ററി ഏവിയേഷൻ രംഗത്തെ പുതിയ ചുവടുവെയ്പ്പായി.