ദോഹ:യുദ്ധങ്ങളിൽ പത്രപ്രവർത്തകരെ സംരക്ഷിക്കുന്നതിന്റെ അത്യാവശ്യം ലോകം തിരിച്ചറിയേണ്ട സമയമാണിതെന്ന് അൽ ജസീറയുടെ പാൽസ്തീൻ ബ്യൂറോ ചീഫ് വലീദ് ഒമറി അഭിപ്രായപ്പെട്ടു. ദോഹയിൽ നടക്കുന്ന രണ്ട് ദിവസത്തെ “ഇന്റർനാഷണൽ കോൺഫറൻസ് ഓൺ പ്രൊട്ടക്ഷൻ ഓഫ് ജേർണലിസ്റ്റ്സ് ഇൻ ആംഡ് കോൺഫ്ലിക്റ്റ്സ്” സമ്മേളനത്തിൽ പങ്കെടുത്തഅദ്ദേഹം പ്രാദേശിക ഇംഗ്ലീഷ് പത്രത്തോട് സംസാരിക്കുക യായിരുന്നു.
 ഗാസയിലും വെസ്റ്റ് ബാങ്കിലും പത്രപ്രവർത്തകർ നേരിടുന്ന സ്ഥിതി അത്യന്തം ഭീതിജനകമാണ്. കഴിഞ്ഞ മാസങ്ങളിൽ മാത്രം 256 പത്രപ്രവർത്തകരെയും 700-ലധികം അവരുടെ കുടുംബാംഗങ്ങളെയും ഇസ്രായേൽ സൈന്യം കൊലപ്പെടുത്തിയിട്ടുണ്ട്.” അദ്ദേഹം കൂട്ടിച്ചേർത്തു,

ഈ ക്രൂരതകളെ രേഖപ്പെടുത്തുകയും അവയെ അന്താരാഷ്ട്ര ഫോറങ്ങളിലേക്കു എത്തിക്കുകയും ചെയ്യുന്നത് അത്യാവശ്യമാണ്. “പത്രപ്രവർത്തകരുടെ ഏക ‘അപരാധം’ അവർ സത്യത്തെ ലോകത്തോട് പറയുകയാണ്. എന്നാൽ അതിനാണ് അവരെ കൊലപ്പെടുത്തുന്നത്,” — ഒമറി വിമർശിച്ചു.
 ഐക്യരാഷ്ട്ര സഭയുൾപ്പെടെയുള്ള അന്താരാഷ്ട്ര സ്ഥാപനങ്ങൾ പത്രപ്രവർത്തകരെ സംരക്ഷിക്കുന്നതിൽ പരാജയപ്പെട്ടതായി കുറ്റപ്പെടുത്തി.
“ഗാസയിലെ അവസ്ഥ മാത്രമല്ല, വെസ്റ്റ് ബാങ്കിലുമുള്ള മാധ്യമപ്രവർത്തകർ മിലീഷ്യകളും സെറ്റ്ലർ ഗ്രൂപ്പുകളും ലക്ഷ്യമാക്കുന്ന അതിക്രമങ്ങൾ നേരിടുന്നു,” — ഒമറി പറഞ്ഞു.

 അന്താരാഷ്ട്ര മാധ്യമ സംഘടനകളും മനുഷ്യാവകാശ ഏജൻസികളും കുറ്റവാളികളെ നിയമത്തിന് മുൻപിൽ കൊണ്ടുവരേണ്ടത് അനിവാര്യമാണ്. ശിക്ഷാരഹിതത്വം തുടർന്നാൽ പത്രസ്വാതന്ത്ര്യം തന്നെ നശിക്കും.-അദ്ദേഹം പറഞ്ഞു, പത്രപ്രവർത്തകരെയും അവരുടെ കുടുംബങ്ങളെയും സംരക്ഷിക്കാൻ ലോകസമൂഹം ശക്തമായ നടപടികൾ സ്വീകരിക്കണം. “ന്യായം ഉറപ്പാക്കാതെ ഈ ആക്രമണങ്ങൾ അവസാനിക്കില്ല. പത്രപ്രവർത്തകർ മൗനം പാലിക്കേണ്ടിവരുന്ന ലോകം, ജനാധിപത്യത്തിന്റെ ശവകുടീരമാകും,” — അദ്ദേഹം മുന്നറിയിപ്പു നൽകി.