ദോഹ: ഖത്തറിലെ സ്കൂളുകളിൽ ഭക്ഷ്യസുരക്ഷാ സംസ്കാരം വളർത്തുന്നതിനായി പൊതുജനാരോഗ്യ മന്ത്രാലയം, വിദ്യാഭ്യാസ–ഉന്നത വിദ്യാഭ്യാസ മന്ത്രാലയവുമായി സഹകരിച്ച് ഭക്ഷ്യസുരക്ഷാ ഗവേഷണ–നവീകരണ പദ്ധതികളെക്കുറിച്ചുള്ള പ്രത്യേക വർക്ക്‌ഷോപ്പ് സംഘടിപ്പിച്ചു. രാജ്യത്തെ വിവിധ സെക്കൻഡറി സ്കൂളുകളിലെ ശാസ്ത്രീയ ഗവേഷണ സംഘങ്ങളുമായി ബന്ധപ്പെട്ട ഏകദേശം 70 കോർഡിനേറ്റർമാരും അധ്യാപകരും പരിപാടിയിൽ പങ്കെടുത്തു.
സ്കൂൾ ആരോഗ്യസംരക്ഷണം ശക്തിപ്പെടുത്തുക, ഭക്ഷ്യസുരക്ഷയെക്കുറിച്ചുള്ള ബോധവൽക്കരണം ഉയർത്തുക, വിദ്യാർത്ഥികളിൽ ശാസ്ത്രീയ നവീകരണ ചിന്ത വളർത്തുക എന്നീ ലക്ഷ്യങ്ങളോടെയാണ് വർക്ക്‌ഷോപ്പ് സംഘടിപ്പിച്ചത്. ഭക്ഷ്യസുരക്ഷയുടെ അടിസ്ഥാന ആശയങ്ങൾ, ഭക്ഷണത്തിലൂടെ പകരുന്ന രോഗങ്ങൾ, പ്രതിരോധ മാർഗങ്ങൾ, അപകട വിശകലനം തുടങ്ങിയ വിഷയങ്ങൾ വിശദമായി അവതരിപ്പിച്ചു. ഭക്ഷ്യസുരക്ഷാ മേഖലയിലെ മാതൃകാ ഗവേഷണ വിഷയങ്ങളും ശാസ്ത്രീയ ഗവേഷണത്തിന്റെ അടിസ്ഥാന രീതികളും പങ്കെടുത്തവർക്കായി അവതരിപ്പിച്ചു.
വിദ്യാർത്ഥികളുടെ ഗവേഷണ ആശയങ്ങൾ അവതരിപ്പിക്കുകയും ചർച്ച ചെയ്യുകയും ചെയ്യുന്ന ഇന്ററാക്ടീവ് സെഷനുകളും വർക്ക്‌ഷോപ്പിന്റെ ഭാഗമായി നടന്നു. പൊതുജനാരോഗ്യ മന്ത്രാലയത്തിലും വിദ്യാഭ്യാസ മന്ത്രാലയത്തിലും നിന്നുള്ള വിദഗ്ധർ ഉൾപ്പെട്ട സംയുക്ത ജഡ്ജിംഗ് കമ്മിറ്റി ആശയങ്ങൾ വിലയിരുത്തി. തിരഞ്ഞെടുക്കപ്പെടുന്ന ഗവേഷണ നിർദേശങ്ങൾക്ക് ഗവേഷണ ഘട്ടങ്ങളിലുടനീളം സാങ്കേതിക മാർഗനിർദേശവും പിന്തുണയും നൽകുമെന്നും അറിയിച്ചു.
പൊതുജനാരോഗ്യ മന്ത്രാലയത്തിലെ ഭക്ഷ്യസുരക്ഷാ കൺസൾട്ടന്റ് ഡോ. ഷൈഖ അൽ സെയാര, ചെറുപ്പത്തിലേ ശാസ്ത്രീയ ഗവേഷണ കഴിവുകൾ വളർത്തുന്നത് സമൂഹത്തിന്റെ ജീവിതനിലവാരം ഉയർത്തുന്നതിന് സഹായകരമാണെന്ന് വ്യക്തമാക്കി. വിദ്യാഭ്യാസ മന്ത്രാലയത്തിലെ ഗവേഷണ–പ്രതിഭ–നവീകരണ വിഭാഗം ആക്ടിംഗ് മേധാവി ഘനീം സാദ് അൽ ഹുമൈദി, ദേശീയ ആരോഗ്യ മുൻഗണനകളുമായി വിദ്യാഭ്യാസത്തെ ബന്ധിപ്പിക്കുന്നതിൽ ഇത്തരം സഹകരണങ്ങൾക്ക് വലിയ പങ്കുണ്ടെന്ന് പറഞ്ഞു.
വർക്ക്‌ഷോപ്പിന്റെ സമാപനത്തിൽ, നിലവാരം, ഗവേഷണ രീതി, പ്രായോഗികത, പ്രതീക്ഷിക്കുന്ന സാമൂഹിക പ്രയോജനം എന്നിവ കണക്കിലെടുത്ത് മികച്ച ഗവേഷണ നിർദേശങ്ങൾ പ്രഖ്യാപിച്ചു. അന്തിമ ഗവേഷണ പ്രൊപ്പോസലുകൾ സമർപ്പിക്കാൻ രണ്ട് മാസത്തെ സമയപരിധി നിശ്ചയിച്ചിട്ടുണ്ടെന്നും, 2026–27 അധ്യയന വർഷ പദ്ധതിയിൽ ഉൾപ്പെടുത്താൻ നാല് ഗവേഷണ വിഷയങ്ങൾ തിരഞ്ഞെടുക്കുമെന്നും അധികൃതർ അറിയിച്ചു.