ജോൺസൺ & ജോൺസൺ ബേബി പൗഡറും മറ്റ് ഉൽപ്പന്നങ്ങളും അണ്ഡാശയ കാൻസറിന് കാരണമായെന്ന ആരോപണവുമായി ബന്ധപ്പെട്ട ആയിരക്കണക്കിന് കേസുകൾ ഒടുവിൽ ഒത്തുതീർപ്പിലേക്ക്. പരാതിക്കാർക്ക് നഷ്ടപരിഹാരമായി പരമാവധി 5.5 ബില്യൺ ഡോളർ നൽകാൻ തയ്യാറാണെന്ന് ജോൺസൺ & ജോൺസൺ കമ്പനി അറിയിച്ചു. ന്യൂജേഴ്‌സിയിലെ ഫെഡറൽ കോടതിയിലുൾപ്പെടെ വിവിധ കോടതികളിലായി നിലനിൽക്കുന്ന ഏകദേശം 76,000 കേസുകളാണ് ഈ ഒത്തുതീർപ്പ് പരിധിയിൽ വരുന്നത്. എന്നാൽ പരാതിക്കാരിൽ കുറഞ്ഞത് 95 ശതമാനം പേരുടെ അംഗീകാരം ലഭിച്ചാൽ മാത്രമേ കരാർ അന്തിമമാവൂ.

കേസുകളിൽ ഉന്നയിച്ചിരിക്കുന്ന ആരോപണങ്ങൾക്ക് ശാസ്ത്രീയമായോ നിയമപരമായോ അടിസ്ഥാനമില്ലെന്നാണ് ജോൺസൺ & ജോൺസണിന്റെ നിലപാട്. നിയമപോരാട്ടങ്ങൾ അവസാനിപ്പിച്ച് ആരോഗ്യരംഗത്തെ ഗവേഷണത്തിലും ജീവൻരക്ഷാ മരുന്നുകളുടെയും മെഡിക്കൽ ഉപകരണങ്ങളുടെയും വികസനത്തിലും കൂടുതൽ ശ്രദ്ധ കേന്ദ്രീകരിക്കാനാണ് ഒത്തുതീർപ്പിലേക്ക് പോകുന്നതെന്ന് കമ്പനിയുടെ വൈസ് പ്രസിഡന്റ് എറിക് ഹാസ് വ്യക്തമാക്കി. കൂടുതൽ നിയമനടപടികൾ നടന്നാലും കമ്പനി വിജയിക്കുമെന്ന ആത്മവിശ്വാസവും അദ്ദേഹം പ്രകടിപ്പിച്ചു.

ഒത്തുതീർപ്പിന്റെ ഭാഗമായി 2027-ഓടെ 3 ബില്യൺ ഡോളറും, ശേഷിക്കുന്ന തുക 2028-ൽ നൽകാനുമാണ് കമ്പനിയുടെ പദ്ധതി. എന്നാൽ എത്ര പേർ കരാറിൽ പങ്കുചേരുന്നു എന്നതിനെ ആശ്രയിച്ച് ആകെ നഷ്ടപരിഹാരത്തുക വർധിക്കാമെന്നും വിലയിരുത്തപ്പെടുന്നു. ഏകദേശം 2,500 പരാതിക്കാരെ പ്രതിനിധീകരിക്കുന്ന അഭിഭാഷകൻ ക്രിസ് സീഗറുടെ വിലയിരുത്തൽ പ്രകാരം കമ്പനിക്ക് 7 ബില്യൺ ഡോളർ വരെ നൽകേണ്ട സാഹചര്യമുണ്ടാകാം.

കോടതികളിലെ നിയമപോരാട്ടം

അടുത്തിടെ നിരവധി കേസുകളിൽ അനുകൂല വിധികൾ ലഭിച്ച സാഹചര്യത്തിലാണ് ജോൺസൺ & ജോൺസൺ ഒത്തുതീർപ്പിന് തയ്യാറായിരിക്കുന്നത്. ടാൽകം പൗഡർ അണ്ഡാശയ കാൻസറിന് നേരിട്ട് കാരണമായെന്ന് വ്യക്തിഗത പരാതിക്കാർക്ക് തെളിയിക്കാനാകുമോയെന്ന കാര്യത്തിൽ കഴിഞ്ഞയാഴ്ച ഒരു ഫെഡറൽ ജഡ്ജിയും സംശയം പ്രകടിപ്പിച്ചിരുന്നു.

അതേസമയം, തങ്ങളുടെ ടാൽകം ഉൽപ്പന്നങ്ങൾ സുരക്ഷിതമാണെന്നും അവയിൽ ആസ്ബെസ്റ്റോസ് ഇല്ലെന്നും കമ്പനി ആവർത്തിച്ച് വ്യക്തമാക്കുന്നു. എന്നിരുന്നാലും ആവശ്യകത കുറഞ്ഞതിനെ തുടർന്ന് 2020-ൽ അമേരിക്കയിലും, 2023-ൽ ആഗോളതലത്തിലും ടാൽക്ക് അടിസ്ഥാനമാക്കിയുള്ള ബേബി പൗഡറിന്റെ വിൽപ്പന അവസാനിപ്പിച്ച് ചോളപ്പൊടി (കോൺസ്റ്റാർച്ച്) അടിസ്ഥാനമാക്കിയുള്ള ഉൽപ്പന്നങ്ങളിലേക്ക് കമ്പനി മാറിയിരുന്നു.

യു.കെ.യിലും നിയമനടപടികൾ

ടാൽകം പൗഡർ അണ്ഡാശയ അർബുദത്തിനും മെസോതെലിയോമയ്ക്കും കാരണമാകാമെന്ന വിവരം അറിഞ്ഞിട്ടും കമ്പനി ഉൽപ്പന്നം വിപണിയിൽ തുടർന്നുവെന്നാരോപിച്ച് 2025 ഒക്ടോബറിൽ യുകെയിലും കേസ് ഫയൽ ചെയ്തിട്ടുണ്ട്. അവിടെ 7,000-ലധികം പേർ നഷ്ടപരിഹാരം ആവശ്യപ്പെട്ട് രംഗത്തുണ്ട്.

ടാൽകവും കാൻസറും: എന്താണ് പഠനങ്ങൾ പറയുന്നത്?

ടാൽകം പൗഡറും കാൻസറും തമ്മിലുള്ള ബന്ധത്തെക്കുറിച്ച് ലോകാരോഗ്യ സംഘടനയുടെ ഗവേഷണ വിഭാഗമായ ഇന്റർനാഷണൽ ഏജൻസി ഫോർ റിസർച്ച് ഓൺ കാൻസർ (IARC) മുമ്പ് റിപ്പോർട്ട് പുറത്തിറക്കിയിരുന്നു. ടാൽക് ഉപയോഗം ഒവേറിയൻ കാൻസറിന് കാരണമായേക്കാമെന്ന് ഏജൻസി വിലയിരുത്തിയിട്ടുണ്ട്.

പ്രകൃതിയിൽ ലഭിക്കുന്ന ധാതുവായ ടാൽക് ശുദ്ധീകരിച്ച് പൊടിയാക്കി സുഗന്ധചേരുവകൾ ചേർത്താണ് ടാൽകം പൗഡർ നിർമ്മിക്കുന്നത്. ബേബി പൗഡറുകൾക്ക് പുറമെ ഡിയോഡറന്റുകൾ, മേക്കപ്പ് ഉൽപ്പന്നങ്ങൾ തുടങ്ങി നിരവധി സൗന്ദര്യവർധക വസ്തുക്കളിലും ടാൽക് വ്യാപകമായി ഉപയോഗിക്കപ്പെടുന്നുണ്ട്.

അതേസമയം, ടാൽക് ഉപയോഗവും കാൻസറും തമ്മിലുള്ള ബന്ധത്തെക്കുറിച്ച് ശാസ്ത്രീയ സമൂഹത്തിൽ ഇപ്പോഴും ചർച്ച തുടരുകയാണ്. ചില പഠനങ്ങൾ അപകടസാധ്യത സൂചിപ്പിക്കുമ്പോൾ, വ്യക്തമായ കാരണ-ഫലബന്ധം തെളിയിക്കാൻ കൂടുതൽ ഗവേഷണം ആവശ്യമാണെന്നാണ് നിരവധി വിദഗ്ധരുടെ നിലപാട്.