കൊല്ലത്ത് ജാമ്യത്തിലിറങ്ങിയ ഗുണ്ടാ നേതാവിനെ ആക്രമിച്ച് കൊലപ്പെടുത്തി. ജിം സന്തോഷ് വധക്കേസിലെ ഒന്നാം പ്രതിയായ അലുവ അതുലാണ് കൊല്ലപ്പെട്ടത്. കരുനാഗപ്പള്ളി പുതിയകാവിന് സമീപം നടന്ന ആക്രമണത്തിന്റെ സിസിടിവി ദൃശ്യങ്ങളും പുറത്തുവന്നിട്ടുണ്ട്.
ജാമ്യത്തിലിറങ്ങിയ അതുൽ പൊലീസ് സ്റ്റേഷനിൽ ഹാജരായി മടങ്ങുന്നതിനിടെയാണ് ആക്രമണം നടന്നത്. അതുലിനെ പിന്തുടർന്നെത്തിയ സംഘം കാറിടിച്ച് വാഹനം ഒരു വശത്തേക്ക് തെറിപ്പിച്ച ശേഷം ആയുധങ്ങളുമായി ആക്രമിക്കുകയായിരുന്നു. നിരവധി തവണ വെട്ടേറ്റ അതുലിനെ ഗുരുതരാവസ്ഥയിൽ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.
ആക്രമണത്തിന് പിന്നിൽ ആരാണെന്ന് ഇതുവരെ വ്യക്തമായിട്ടില്ല. ഗുണ്ടാകുടിപ്പകയാണ് സംഭവത്തിന് പിന്നിലെന്നാണ് പൊലീസിന്റെ പ്രാഥമിക നിഗമനം. സംഭവത്തിൽ പൊലീസ് അന്വേഷണം ആരംഭിച്ചു.
അതേസമയം, ഗുണ്ടാകുടിപ്പകയുടെ മറ്റൊരു ഇരയായിരുന്നു ജിം സന്തോഷ്. അമ്മ വീട്ടിലുണ്ടായിരുന്ന സമയത്ത് പുലർച്ചെ വീട്ടിൽ കയറിയെത്തിയ സംഘം സന്തോഷിനെ ക്രൂരമായി വെട്ടിക്കൊലപ്പെടുത്തിയിരുന്നു.
