ദോഹ: 'മെച്ചപ്പെട്ട ജീവിതത്തിന് ആരോഗ്യവും വിദ്യാഭ്യാസവും' എന്ന ആശയം മുൻനിർത്തി ജാസിം ആൻഡ് ഹമദ് ബിൻ ജാസിം ചാരിറ്റബിൾ ഫൗണ്ടേഷൻ തങ്ങളുടെ 25-ാമത് സേവന വർഷം ആഘോഷിക്കുന്നു. ലോക മാനുഷിക ദിനത്തോട് (ഓഗസ്റ്റ് 19) അനുബന്ധിച്ചാണ് ഫൗണ്ടേഷൻ തങ്ങളുടെ കാരുണ്യ പ്രവർത്തനങ്ങളുടെ നാഴികക്കല്ലുകൾ പങ്കുവെച്ചത്.
സ്ഥാപക അംഗമായ ശൈഖ് ഹമദ് ബിൻ ജാസിം ബിൻ ജാബർ അൽഥാനിയുടെ നേരിട്ടുള്ള സാമ്പത്തിക സഹായത്തോടെയും സ്വന്തം വിഭവങ്ങൾ ഉപയോഗിച്ചുമാണ് സ്ഥാപനം ചാരിറ്റി മേഖലയിൽ തങ്ങളുടേതായ മുദ്ര പതിപ്പിച്ചത്.ഈ വർഷത്തിന്റെ ആദ്യ പകുതിയിൽ മാത്രം ഖത്തറിനുള്ളിലെ അർഹരായ വിഭാഗങ്ങൾക്കായി 6.4 മില്യൺ റിയാലിന്റെ സാമ്പത്തിക സഹായം നൽകി.പരമ്പരാഗത കാരുണ്യ പ്രവർത്തനങ്ങൾക്കപ്പുറം നിർധന സമൂഹങ്ങളെ ശാക്തീകരിക്കുന്നതിനായി ആശുപത്രികൾ, പ്രാഥമിക ആരോഗ്യ കേന്ദ്രങ്ങൾ, സ്കൂളുകൾ, വൊക്കേഷണൽ പരിശീലന കേന്ദ്രങ്ങൾ, ഭവന പദ്ധതികൾ എന്നിവ അന്താരാഷ്ട്ര തലത്തിൽ കെട്ടിപ്പടുക്കുന്നതിൽ ഫൗണ്ടേഷൻ ശ്രദ്ധ കേന്ദ്രീകരിക്കുന്നു.ലോകമെമ്പാടുമുള്ള പിന്നാക്ക സമൂഹങ്ങളിൽ ദീർഘകാല പ്രയോജനം ലഭിക്കുന്ന തരത്തിലുള്ള ആരോഗ്യ, വിദ്യാഭ്യാസ പദ്ധതികളിലൂടെ അവരെ സ്വയംപര്യാപ്തരാക്കുകയാണ് ഫൗണ്ടേഷൻ ലക്ഷ്യമിടുന്നത്.
