ന്യൂഡൽഹി: ജന്തർ മന്തറിൽ കഴിഞ്ഞയാഴ്ച നടന്ന വിദ്യാർഥി പ്രതിഷേധവുമായി ബന്ധപ്പെട്ട സിസിടിവി ദൃശ്യങ്ങൾ വിശദമായി പരിശോധിച്ചതായി ഡൽഹി പൊലീസ്. ഫേഷ്യൽ റെക്കഗ്നിഷൻ സാങ്കേതികവിദ്യ ഉപയോഗിച്ചുള്ള പരിശോധനയിൽ സമരത്തിൽ പങ്കെടുത്തവരിൽ 2,873 പേർക്ക് ക്രിമിനൽ പശ്ചാത്തലമുണ്ടെന്ന് പൊലീസ് വൃത്തങ്ങൾ അവകാശപ്പെട്ടു.
ഇവരിൽ 989 പേർക്കെതിരെ കൊലപാതകം, ബലാത്സംഗം, തട്ടിക്കൊണ്ടുപോകൽ, മോഷണം ഉൾപ്പെടെയുള്ള ഗുരുതര കുറ്റകൃത്യങ്ങളുമായി ബന്ധപ്പെട്ട കേസുകൾ നിലവിലുണ്ടെന്നും പൊലീസ് അറിയിച്ചു. ഔദ്യോഗിക രേഖകൾ പ്രകാരം 101 പേർ കൊലപാതകക്കേസിലും, 62 പേർ കൊലപാതകശ്രമക്കേസിലും, 284 പേർ കവർച്ചക്കേസിലും, 61 പേർ ബലാത്സംഗക്കേസിലും പ്രതികളാണെന്നും പൊലീസ് വ്യക്തമാക്കുന്നു.
കൂടാതെ, പോക്സോ കേസുകളിൽ പ്രതികളായ ആറുപേരെയും, ലൈംഗികാതിക്രമക്കേസുകളിലെ 25 പ്രതികളെയും, അനധികൃതമായി ആയുധം കൈവശം വെച്ച കേസിലെ 229 പ്രതികളെയും തിരിച്ചറിഞ്ഞതായി പൊലീസ് അറിയിച്ചു.
അതീവ സുരക്ഷാ മേഖലയായ ജന്തർ മന്തറിൽ ജൂലൈ 20, 22 തീയതികളിൽ നടന്ന സിജെപി പ്രതിഷേധത്തിനിടെ സമരക്കാരും പൊലീസും തമ്മിൽ പലതവണ സംഘർഷമുണ്ടായിരുന്നു. പ്രതിഷേധത്തിനിടെ ബാരിക്കേഡുകൾ തകർക്കുന്നതും, പൊലീസ് ഉദ്യോഗസ്ഥരെ ആക്രമിക്കുന്നതും, കല്ലേറ് നടത്തുന്നതുമടക്കമുള്ള സംഭവങ്ങൾ ഉൾപ്പെട്ട നൂറോളം സിസിടിവി ദൃശ്യങ്ങൾ അന്വേഷണത്തിന്റെ ഭാഗമായി പൊലീസ് ശേഖരിച്ചിട്ടുണ്ടെന്നും അധികൃതർ അറിയിച്ചു.
