കാമുകനും കൂട്ടുകാരും ബലാത്സംഗം ചെയ്ത ശേഷം പത്തുലക്ഷം രൂപയും തട്ടിയെടുത്തെന്ന പരാതിയുമായി യുവതി. പുനെയിൽ സോഫ്റ്റ്‌വെയർ എൻജിനീയറായി ജോലി ചെയ്യുന്ന കർണാടക സ്വദേശിനിയാണ് കൂട്ടബലാത്സംഗത്തിനിരയായത്. ഇതിനിടെ പകർത്തിയ നഗ്നദൃശ്യങ്ങൾ പുറത്തുവിടുമെന്ന് ഭീഷണിപ്പെടുത്തിയെന്നും യുവതി പരാതിയിൽ പറയുന്നു. ഹഡപ്സർ പൊലീസിൽ യുവതി നൽകിയ പരാതിയിൽ പ്രാഥമിക അന്വേഷണത്തിനു ശേഷം കേസ് കാന്തിവ്‌ലി പൊലീസിനു കൈമാറിയിട്ടുണ്ട്.
മുംബൈ കാന്തിവ്‌ലി നിവാസി തമീം ഹർഷല്ല ഖാൻ ആണ് കേസിലെ മുഖ്യപ്രതി. 2021ൽ സമൂഹമാധ്യമത്തിലൂടെയാണ് യുവതി മുഖ്യപ്രതിയായ യുവാവിനെ പരിചയപ്പെടുന്നത്. വൻ‍കിട കെട്ടിട നിർ‍മാതാവിന്റെ മകനാണെന്നാണ് ഇയാൾ യുവതിയോട് പറഞ്ഞത്. ആഡംബര കാറുകളിലാണ് സന്ദർശിക്കാൻ എത്തിയിരുന്നത്. പിന്നീട് വിവാഹ വാഗ്ദാനം നൽകുകയായിരുന്നു.
പ്രണയത്തിലായതോടെ കാന്തിവ്‍‌ലിയിലേക്കു വിളിച്ചുവരുത്തി ലഹരി കലർത്തിയ പാനീയം നൽകി പീഡിപ്പിച്ചു. പിന്നീട് പുണെയിൽ സുഹൃത്തുക്കൾക്കൊപ്പം കൂട്ട ബലാത്സംഗം ചെയ്തു എന്നും പരാതിയിൽ പറയുന്നു. ഇതിനിടെ 10 ലക്ഷം രൂപയും യുവാവ് കൈക്കലാക്കിയിരുന്നു. പണം തിരികെ ചോദിച്ചപ്പോൾ ഉപദ്രവം തുടർന്നതോടെയാണു യുവതി പൊലീസിനെ സമീപിച്ചത്.
