ദോഹ: ഖത്തറിൽ മഴ കനിഞ്ഞുനൽകാൻ അല്ലാഹുവിനോട് അപേക്ഷിച്ച് രാജ്യം ഒന്നടങ്കം പ്രത്യേക ഇസ്തിസ്ഖാ (മഴയ്ക്കായുള്ള) പ്രാർഥന നടത്തി. ലുസൈലിൽ നടന്ന പ്രാർഥനയ്ക്ക് ഖത്തർ അമീർ ശൈഖ് തമീം ബിൻ ഹമദ് അൽതാനി നേതൃത്വം നൽകി. വരൾച്ചയോ രൂക്ഷമായ വരണ്ട കാലാവസ്ഥയോ അനുഭവപ്പെടുന്ന സമയങ്ങളിൽ പ്രവാചകൻ മുഹമ്മദ് നബിയുടെ സുന്നത്തിനെ പിന്തുടർന്നാണ് ഈ പ്രത്യേക പ്രാർഥന നടത്താറുള്ളത്.
പ്രാർഥനയ്ക്കും ഖുതുബയ്ക്കും (പ്രഭാഷണം) ശേഷം അമീർ തന്റെ ബിഷ്ത് (പരമ്പരാഗത അറബ് മേലങ്കി) മറിച്ച് ധരിച്ചു. ഇസ്തിസ്ഖാ പ്രാർഥനയ്ക്ക് ശേഷമുള്ള പ്രവാചകചര്യയുടെ ഭാഗമായാണ് ഈ കർമം നിർവഹിച്ചത്. കാലാവസ്ഥയിൽ അനുകൂലമായ മാറ്റമുണ്ടാകുമെന്നും മഴ പെയ്യുമെന്നുമുള്ള പ്രതീക്ഷയെയും പ്രത്യാശയെയുമാണ് ഈ പ്രതീകാത്മകമായ ചടങ്ങ്സൂചിപ്പിക്കുന്നത്.
ഖത്തറിലെ വിവിധ മസ്ജിദുകളിലും ഈദ് ഗാഹുകളിലും ഇസ്തിസ്ഖാ പ്രാർഥനയ്ക്കായി വൻ ജനപങ്കാളിത്തമാണ് അനുഭവപ്പെട്ടത്.
