പെരുന്നാൾ ദിനത്തിലും ഗാസയിൽ ഇസ്രയേലിന്റെ നരബലി
ടെൽ അവിവ്: ബലിപെരുന്നാൾ ദിനത്തിലും ഗാസയിൽ ഇസ്രയേലിന്റെ ശക്തമായ വ്യോമാക്രമണം. ഇസ്രയേൽ സൈന്യം നടത്തിയ ആക്രമണത്തിൽ 42 പേരാണ് കൊല്ലപ്പെട്ടത്. കൊല്ലപ്പെട്ടവരിൽ സ്ത്രീകളും കുട്ടികളും ഉൾപ്പെടുന്നു. അതേസമയം, ഇസ്രയേലിന്റെ ആക്രമണത്തിൽ അഞ്ച് സൈനികർ കൊല്ലപ്പെട്ടെന്ന് ഇസ്രയേൽ അറിയിച്ചു. 17 സൈനികർക്ക് പരിക്കേറ്റിട്ടുമുണ്ട്.
ഇസ്രയേൽ ഭക്ഷ്യവിതരണം പൂർണമായും നിർത്തിവെച്ചതോടെ ഗാസയിൽ പട്ടിണി പിടിമുറുക്കിയിരിക്കുകയാണ്. ഇനി ഒരു അറിയിപ്പുണ്ടാകുന്നതു വരെ ബദൽ ഭക്ഷ്യവിതരണ സംവിധാനം ഉണ്ടാകില്ലെന്നാണ് ഇസ്രായേൽ അറിയിച്ചത്. ഇതോടെ ആളുകൾ ഒരുനേരത്തേ ഭക്ഷണം പോലും കി‌ട്ടാതെ ബുദ്ധിമുട്ടുന്നു എന്നാണ് റിപ്പോർട്ട്.
കഴിഞ്ഞ ആഴ്ച ഭക്ഷണത്തിന് വരിനിന്നവർക്കു നേരെ നടന്ന വെടിവെപ്പ് സംഭവങ്ങളിൽ 110 പേർ കൊല്ലപ്പെടുകയും ആയിരത്തിലേറെ പേർക്ക് പരിക്കേൽക്കുകയും ചെയ്തിരുന്നു. ഗാസയിൽ കുഞ്ഞുങ്ങളുടെ ജീവൻ രക്ഷിക്കാൻ അന്തർദേശീയ സമൂഹം ഉടനടി എന്തെങ്കിലും ചെയ്തേ തീരൂവെന്ന് യുനിസെഫ് അഭ്യർഥിച്ചു.
