​കൊച്ചി/ തിരുവനന്തപുരം: കേരള രാഷ്ട്രീയത്തിൽ വലിയ വിവാദങ്ങൾക്ക് വഴിവെച്ച മാസപ്പടി കേസിൽ എൻഫോഴ്‌സ്‌മെന്റ് ഡയറക്ടറേറ്റ് (ഇ.ഡി) നടത്തുന്ന അന്വേഷണത്തിനെതിരെയുള്ള അപ്പീലിൽ ഹൈക്കോടതി ഡിവിഷൻ ബെഞ്ച് വരുന്ന വെള്ളിയാഴ്ച (ജൂൺ 5) നിർണായക വിധി പ്രസ്താവിക്കും. സി.എം.ആർ.എൽ (CMRL) അധികൃതർ നൽകിയ അപ്പീൽ പരിഗണിച്ച കോടതി, വിധി വരുന്നതുവരെ അവർക്കെതിരെ കടുത്ത തുടർനടപടികൾ പാടില്ലെന്ന് താല്ക്കാലിക നിർദ്ദേശം നൽകിയിട്ടുണ്ട്. എന്നാൽ, ഈ ഹർജിയിൽ മുൻ മുഖ്യമന്ത്രി പിണറായി വിജയന്റെ മകൾ വീണ വിജയൻ കക്ഷിയല്ലാത്തതിനാൽ, അവർക്കെതിരെയുള്ള ഇ.ഡി അന്വേഷണത്തിന് ഈ താല്ക്കാലിക ഇളവ് ബാധകമല്ല.
​ജസ്റ്റിസ് വി. രാജ വിജയരാഘവൻ, ജസ്റ്റിസ് കെ.വി. ജയകുമാർ എന്നിവരടങ്ങിയ ഡിവിഷൻ ബെഞ്ചാണ് കേസിൽ വിശദമായ വാദം കേട്ടത്. അന്വേഷണം പൂർണ്ണമായി സ്റ്റേ ചെയ്യണമെന്ന ആവശ്യത്തോട് തുടക്കത്തിലേ തന്നെ കോടതി വിയോജിപ്പ് പ്രകടിപ്പിച്ചിരുന്നു.
​'അടിസ്ഥാന കുറ്റകൃത്യം' വേണമെന്ന വാദവും കോടതിയുടെ ചോദ്യവും:
​പ്രതിഭാഗം വാദം: കള്ളപ്പണം വെളുപ്പിക്കൽ നിരോധന നിയമപ്രകാരം  അന്വേഷണം നടത്തണമെങ്കിൽ അതിന് നിദാനമായ ഒരു അടിസ്ഥാന കുറ്റകൃത്യം (Scheduled Crime) മുൻകൂട്ടി രജിസ്റ്റർ ചെയ്തിട്ടുണ്ടാകണം. അതില്ലാതെ ഇ.ഡി സ്വമേധയാ നടത്തുന്ന അന്വേഷണം നിയമവിരുദ്ധമാണെന്നും റദ്ദാക്കണമെന്നും സി.എം.ആർ.എല്ലിന് വേണ്ടി ഹാജരായ സുപ്രീംകോടതി അഭിഭാഷകൻ സിദ്ധാർഥ് ലൂത്ര വാദിച്ചു.
​കോടതിയുടെ നിരീക്ഷണം: കള്ളപ്പണ ഇടപാട് നടന്നെന്ന കൃത്യമായ വിവരം ലഭിച്ചാൽ, അന്വേഷണം തുടങ്ങാൻ മറ്റൊരു എഫ്.ഐ.ആർ രജിസ്റ്റർ ചെയ്യുന്നത് വരെ കാത്തിരിക്കണമെന്ന് പറയാൻ കഴിയുമോ എന്ന് കോടതി പ്രതിഭാഗത്തോട് ചോദിച്ചു.
​പൊതുമുതൽ ദുരുപയോഗം ചെയ്യപ്പെട്ടെന്ന് ഇ.ഡി:
​മാസപ്പടി വിവാദത്തിൽ സിറിയസ് ഫ്രോഡ് ഇൻവെസ്റ്റിഗേഷൻ Office അന്വേഷണം ആരംഭിച്ച ശേഷമാണ് ഇ.ഡി കേസ് രജിസ്റ്റർ ചെയ്തതെന്നും അന്വേഷണം പൂർണ്ണമായും നിയമപരമാണെന്നും അഡിഷണൽ സോളിസിറ്റർ ജനറൽ എ.ആർ.എൽ. സുന്ദരേശൻ വ്യക്തമാക്കി.
​എക്സാലോജിക് കമ്പനിക്ക് സി.എം.ആർ.എൽ നിയമവിരുദ്ധമായി പണം നൽകിയത് മണൽ ഖനനവുമായി ബന്ധപ്പെട്ട വഴിവിട്ട സഹായങ്ങൾക്ക് പകരമായാണെന്ന് കണ്ടെത്തിയിട്ടുണ്ട്. പൊതുമേഖലാ സ്ഥാപനമായ കെ.എസ്.ഐ.ഡി.സിക്ക് കൂടി ഓഹരിയുള്ള കമ്പനിയായതിനാൽ, ഇവിടെ ദുരുപയോഗം ചെയ്യപ്പെട്ടത് പൊതുമുതലാണെന്നും ഇ.ഡി കോടതിയിൽ ചൂണ്ടിക്കാട്ടി.
​അറസ്റ്റും റെയ്ഡും തത്കാലമില്ല; അന്വേഷണം തുടരും
വെള്ളിയാഴ്ച വരെയുള്ള കോടതിയുടെ നിർദ്ദേശം അപ്പീൽ നൽകിയ കക്ഷികൾക്ക് മാത്രമാണെങ്കിലും, കേസിലെ മറ്റ് വ്യക്തികൾക്കെതിരെയും പെട്ടെന്നുള്ള കർശന നടപടികളിലേക്ക് ഇ.ഡി കടക്കാൻ സാധ്യതയില്ല. റെയ്ഡ്, ചോദ്യം ചെയ്യൽ, അറസ്റ്റ് തുടങ്ങിയ തിടുക്കത്തിലുള്ള നീക്കങ്ങൾ വിപരീതഫലമുണ്ടാക്കുമെന്ന വിലയിരുത്തലിൽ തത്കാലം ഇവ ഒഴിവാക്കും. എന്നാൽ ഡിജിറ്റൽ തെളിവ് ശേഖരണവും കടലാസ് ജോലികളും ഇ.ഡി ഊർജിതമായി തുടരും.