ദോഹ: റാസ് ലഫാൻ ഊർജ്ജ സമുച്ചയത്തിന് നേരെ ഇറാൻ നടത്തിയ മിസൈൽ ആക്രമണങ്ങൾ മേഖലയിലെ സമാധാനത്തിന് വലിയ ഭീഷണിയാണെന്നും ഇത് അംഗീകരിക്കാനാവാത്ത ലംഘനമാണെന്നും ഖത്തർ പ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് മുഹമ്മദ് ബിൻ അബ്ദുൽറഹ്മാൻ ബിൻ ജാസിം അൽതാനി പ്രസ്താവിച്ചു.
​തുർക്കി വിദേശകാര്യ മന്ത്രി ഹക്കാൻ ഫിദാനുമായി ദോഹയിൽ നടത്തിയ സംയുക്ത വാർത്താ സമ്മേളനത്തിലാണ് അദ്ദേഹം ഇക്കാര്യം വ്യക്തമാക്കിയത്. ഇസ്രായേൽ, അമേരിക്ക, ഇറാൻ എന്നിവർക്കിടയിലുള്ള യുദ്ധത്തിലേക്ക് മേഖലയെ വലിച്ചിഴയ്ക്കാനാണ് ഇറാൻ ശ്രമിക്കുന്നത്. സമാധാനപരമായ നയം സ്വീകരിക്കുന്ന ഖത്തറിനെ ലക്ഷ്യം വെക്കുന്നത് ഇറാന്റെ നിരുത്തരവാദപരമായ സമീപനമാണ്.ഖത്തർ ജനതയുടെ പ്രധാന വരുമാന സ്രോതസ്സായ പ്രകൃതിവാതക നിലയത്തിന് നേരെയുള്ള ആക്രമണം ആഗോള ഊർജ്ജ വിതരണത്തെയും ബാധിക്കും. കൂടാതെ, ഖത്തർ ലോകമെമ്പാടും നടത്തുന്ന മാനുഷിക സഹായ പ്രവർത്തനങ്ങളെയും ഇത് പ്രതികൂലമായി ബാധിക്കും.മിസൈൽ ആക്രമണങ്ങളിൽ ഭൂരിഭാഗവും പ്രതിരോധിക്കാൻ സാധിച്ചു. എങ്കിലും ചില സൗകര്യങ്ങൾക്ക് നാശനഷ്ടങ്ങൾ സംഭവിച്ചിട്ടുണ്ട്. മുൻകരുതൽ നടപടികൾ സ്വീകരിച്ചതിനാൽ ആർക്കും ജീവഹാനി സംഭവിച്ചിട്ടില്ല.ഖത്തറിലെ അമേരിക്കൻ താവളങ്ങളെയാണ് ലക്ഷ്യം വെച്ചതെന്ന ഇറാന്റെ അവകാശവാദം ഖത്തർ പൂർണ്ണമായും തള്ളിക്കളഞ്ഞു. ഇത് ഒരു കാരണവശാലും അംഗീകരിക്കാനാവില്ലെന്ന് പ്രധാനമന്ത്രി വ്യക്തമാക്കി.ഈ ആക്രമണത്തിന് അന്താരാഷ്ട്ര നിയമങ്ങൾക്കനുസൃതമായി നിയമപരമായ രീതിയിൽ മറുപടി നൽകാനുള്ള എല്ലാ അവകാശവും ഖത്തറിൽ നിക്ഷിപ്തമാണെന്ന് അദ്ദേഹം കൂട്ടിച്ചേർത്തു.
പ്രതിസന്ധി പരിഹരിക്കാൻ മധ്യസ്ഥത വഹിക്കുന്ന ഖത്തറിന് നേരെ ഇത്തരം ആക്രമണങ്ങൾ ഉണ്ടാകുന്നത് അവിശ്വസനീയമാണ്," എന്ന് തുർക്കി വിദേശകാര്യ മന്ത്രി ഹക്കാൻ ഫിദാൻ പറഞ്ഞു. എല്ലാ സാഹചര്യങ്ങളിലും തുർക്കി ഖത്തറിനൊപ്പം നിൽക്കുമെന്നും അദ്ദേഹം ഉറപ്പുനൽകി. റിയാദിൽ ചേർന്ന പ്രാദേശിക രാജ്യങ്ങളുടെ യോഗവും ഇത്തരം ആക്രമണങ്ങളെ ഒറ്റക്കെട്ടായി അപലപിച്ചതായും അദ്ദേഹം ഓർമ്മിപ്പിച്ചു