വാഷിംഗ്ടൺ: ഇറാനും അമേരിക്കയും തമ്മിലുള്ള സംഘർഷത്തിൽ താൽക്കാലിക ശമനത്തിന് സാധ്യതയുണ്ടെന്ന് സൂചനകൾ. തുടർച്ചയായി 13 ദിവസം നീണ്ടുനിന്ന സൈനിക നടപടികൾക്ക് പിന്നാലെ, കൂടുതൽ ആക്രമണങ്ങൾക്ക് അമേരിക്കൻ പ്രസിഡന്റ് ഡൊണാൾഡ് ട്രംപ് വെള്ളിയാഴ്ച അനുമതി നൽകിയില്ലെന്നാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്. സൈനിക ഏറ്റുമുട്ടൽ വ്യാപിപ്പിക്കുന്നതിനുപകരം നയതന്ത്ര ചർച്ചകളിലൂടെ പ്രശ്നപരിഹാരത്തിനാണ് അമേരിക്ക മുൻഗണന നൽകുന്നതെന്നാണ് വിലയിരുത്തൽ.

ഇറാനുമായി ചർച്ചകൾ പുരോഗമിക്കുകയാണെന്ന് വൈറ്റ് ഹൗസിൽ മാധ്യമങ്ങളോട് പ്രതികരിച്ച ട്രംപ് വ്യക്തമാക്കി. നിലവിലെ സാഹചര്യത്തെ ഇറാൻ കൂടുതൽ ഗൗരവത്തോടെ സമീപിക്കുന്നുണ്ടെന്നും, ധാരണയിലെത്തുന്നതാണ് എല്ലാവർക്കും ഗുണകരമെന്നും അദ്ദേഹം പറഞ്ഞു.

അതേസമയം, ഹോർമുസ് കടലിടുക്ക് വീണ്ടും പൂർണമായി തുറക്കുന്നതുമായി ബന്ധപ്പെട്ട ചർച്ചകൾക്കായി ഒമാന്റെ പ്രതിനിധി സംഘം ടെഹ്റാനിലെത്തിയിട്ടുണ്ട്. ഈ ചർച്ചകൾ അനുകൂല ദിശയിലാണ് നീങ്ങുന്നതെന്നും, ഈ ആഴ്ചയ്ക്കുള്ളിൽ തന്നെ ഒരു കരാറിൽ എത്താനാകുമെന്ന പ്രതീക്ഷയും വിവിധ റിപ്പോർട്ടുകൾ പങ്കുവെക്കുന്നു.

ഇതിനിടെ, ഇസ്രായേൽ ആക്രമണം കൂടുതൽ വ്യാപിപ്പിക്കുന്നത് അമേരിക്ക തടഞ്ഞുവെന്ന വിവരങ്ങളും പുറത്തുവരുന്നുണ്ട്. അതേസമയം, ഇറാനെതിരായ സൈനിക നടപടികളിൽ കുവൈത്ത് പങ്കാളിയായിരുന്നുവെന്ന വാൾ സ്ട്രീറ്റ് ജേണൽ റിപ്പോർട്ട് കുവൈത്ത് സർക്കാർ തള്ളിക്കളഞ്ഞു.

സംഘർഷത്തിനിടെ അമേരിക്കയുടെ 11 യുദ്ധവിമാനങ്ങൾ തകർത്തതായി ഇറാൻ അവകാശപ്പെട്ടു. അമേരിക്കയ്ക്ക് പിന്തുണ തുടരുകയാണെങ്കിൽ ബ്രിട്ടനെയും ലക്ഷ്യമാക്കുമെന്ന് ഇറാൻ മുന്നറിയിപ്പ് നൽകിയിട്ടുണ്ട്. ചെങ്കടൽ മേഖലയിലും സംഘർഷസാഹചര്യം നിലനിൽക്കുന്നതിനിടെ, ഇറാനെതിരായ സൈനിക നടപടികൾ താൽക്കാലികമായി നിർത്തിവെച്ച് നയതന്ത്ര ചർച്ചകൾക്ക് മുൻഗണന നൽകാനാണ് അമേരിക്കയുടെ നിലവിലെ നീക്കമെന്നാണ് സൂചന.