തന്ത്രപ്രധാനമായ ഹോർമുസ് കടലിടുക്ക് അടച്ചതായി ഇറാനിലെ ഇസ്ലാമിക് റെവല്യൂഷണറി ഗാർഡ് കോർപ്സ് (ഐആർജിസി) പ്രഖ്യാപിച്ചു. ജലപാത വഴി കടന്നുപോകാൻ ശ്രമിക്കുന്ന ഏതൊരു കപ്പലിനെയും ലക്ഷ്യമാക്കുമെന്ന മുന്നറിയിപ്പും ഐആർജിസി നേതൃത്വം നൽകിയിട്ടുണ്ട്. കമാൻഡർ ഇൻ ചീഫിന്റെ സീനിയർ അഡ്വൈസറായ സർദാർ ഇബ്രാഹിം ജബാരിയാണ് മുന്നറിയിപ്പ് പുറപ്പെടുവിച്ചത്. ഇറാന്റെ പരമോന്നത നേതാവ് ആയത്തുള്ള അലി ഖമനേയി കൊല്ലപ്പെട്ടതിനു പിന്നാലെ പശ്ചിമേഷ്യയിൽ സംഘർഷം രൂക്ഷമാകുന്നതിനിടെയാണ് ഇറാൻ ഹോർമുസ് കടലിടുക്ക് അടച്ചതായി പ്രഖ്യാപിച്ചിരിക്കുന്നത്.
ലോകത്തിലെ ആകെ എണ്ണ വ്യാപാരത്തിന്റെ ഏകദേശം അഞ്ചിലൊന്നോളം കടന്നുപോകുന്ന നിർണായക ജലപാതയാണ് ഹോർമുസ് കടലിടുക്ക്. സൗദി അറേബ്യ, കുവൈത്ത്, ഇറാഖ്, ഖത്തർ, ബഹ്റൈൻ, യുഎഇ തുടങ്ങിയ രാജ്യങ്ങളിൽ നിന്നുള്ള എണ്ണയും പ്രകൃതിവാതകവും പ്രധാനമായും ഇതുവഴിയാണ് ആഗോള വിപണികളിലേക്ക്—പ്രത്യേകിച്ച് ഏഷ്യയിലേക്ക്—എത്തുന്നത്. കടലിടുക്ക് അടയ്ക്കാനുള്ള ഇറാന്റെ നീക്കം ആഗോള എണ്ണവിതരണ ശൃംഖലയെ വലിയ തോതിൽ ബാധിക്കുമെന്ന ആശങ്ക ശക്തമാണ്. ഫെബ്രുവരിയിൽ ഇറാൻ നടത്തിയ സൈനിക അഭ്യാസങ്ങൾക്കിടെ ഗതാഗത നിയന്ത്രണം ഏർപ്പെടുത്തിയപ്പോഴും എണ്ണവിലയിൽ ഏകദേശം ആറു ശതമാനം വരെ വർധന രേഖപ്പെടുത്തിയിരുന്നു.
അതേസമയം, ഇറാന്റെ അവകാശവാദം യുഎസ് സെൻട്രൽ കമാൻഡ് നിഷേധിച്ചു. ഹോർമുസ് കടലിടുക്ക് ഇപ്പോഴും തുറന്നതാണെന്നും കപ്പൽ ഗതാഗതത്തിന് തടസ്സമില്ലെന്നും അമേരിക്കൻ വൃത്തങ്ങൾ വ്യക്തമാക്കി. സൗദി അറേബ്യയും യുഎഇയും ചില അളവിൽ പൈപ്പ്ലൈൻ മാർഗങ്ങൾ ഉപയോഗിക്കുന്നുണ്ടെങ്കിലും, മേഖലയിലെ ഭൂരിഭാഗം എണ്ണക്കയറ്റുമതിക്കും ഹോർമുസ് കടലിടുക്കിന് പകരം സമാനമായ സുരക്ഷിത വഴികൾ നിലവിൽ ഇല്ലെന്നതും ശ്രദ്ധേയമാണ്.
