വാഷിങ്ടൺ: യുഎസ് പ്രസിഡന്റ് ഡോണാൾഡ് ട്രംപിനെ വധിക്കാൻ ഇറാൻ പുതിയ ഗൂഢാലോചന ആസൂത്രണം ചെയ്യുന്നുവെന്ന രഹസ്യാന്വേഷണ വിവരം ഇസ്രയേൽ അമേരിക്കയ്ക്ക് കൈമാറിയതായി റിപ്പോർട്ട്. അമേരിക്കൻ ഉദ്യോഗസ്ഥരെ ഉദ്ധരിച്ച് വാൾ സ്ട്രീറ്റ് ജേണൽയും സിഎൻഎൻയും പുറത്തുവിട്ട റിപ്പോർട്ടുകളിലാണ് ഇക്കാര്യം പറയുന്നത്.
കഴിഞ്ഞ ഏതാനും ആഴ്ചകളായി ട്രംപിനെ ലക്ഷ്യമിട്ടുള്ള ഭീഷണികളെക്കുറിച്ച് അമേരിക്കയ്ക്ക് വിവിധ രഹസ്യാന്വേഷണ വിവരങ്ങൾ ലഭിച്ചിരുന്നെങ്കിലും, ഇസ്രയേൽ നൽകിയ ഏറ്റവും പുതിയ വിവരം ഒരു പ്രത്യേക വധപദ്ധതിയെക്കുറിച്ചുള്ളതാണെന്നാണ് അമേരിക്കൻ വൃത്തങ്ങൾ വ്യക്തമാക്കുന്നത്. അതേസമയം, ഇറാനെതിരായ അമേരിക്കയുടെ സൈനിക നിലപാട് കൂടുതൽ കടുപ്പിക്കാൻ ട്രംപിനെ പ്രേരിപ്പിക്കാനുള്ള ശ്രമത്തിന്റെ ഭാഗമായും ഈ മുന്നറിയിപ്പിനെ ചില ഉദ്യോഗസ്ഥർ വിലയിരുത്തുന്നതായി സിഎൻഎൻ റിപ്പോർട്ട് ചെയ്തു.
ഇറാൻ തന്നെ വധിക്കാൻ ശ്രമിക്കുന്നുണ്ടെന്നും അവരുടെ പ്രധാന ലക്ഷ്യം താനാണെന്നും ട്രംപ് കഴിഞ്ഞ ദിവസങ്ങളിൽ തുറന്നുപറഞ്ഞിരുന്നു. വൈറ്റ് ഹൗസിനോട് പ്രതികരണം തേടിയ വാൾ സ്ട്രീറ്റ് ജേണലിന്, ട്രംപിന്റെ സമീപകാല പ്രസ്താവനകൾ പരിശോധിക്കണമെന്ന മറുപടിയാണ് ലഭിച്ചത്.
"ഞാനാണ് അവരുടെ ഒന്നാം നമ്പർ ലക്ഷ്യം. അവർക്ക് മുമ്പുണ്ടായിരുന്ന നേതാക്കൾ ഇല്ലാതായി. ഇപ്പോഴുള്ളവർക്കും അതേ അവസ്ഥ വന്നേക്കാം. എനിക്കും എന്തും സംഭവിക്കാം," എന്നാണ് ട്രംപ് പറഞ്ഞത്. താൻ ഇറാന്റെ ലക്ഷ്യപ്പട്ടികയിലുണ്ടെന്നും ഇതുവരെ ഭാഗ്യംകൊണ്ടാണ് രക്ഷപ്പെട്ടതെന്നും അദ്ദേഹം അവകാശപ്പെട്ടു. എന്നാൽ അദ്ദേഹം പരാമർശിച്ച 'ലിസ്റ്റ്' ഇസ്രയേൽ കൈമാറിയ രഹസ്യാന്വേഷണ വിവരവുമായി ബന്ധപ്പെട്ടതാണോയെന്നത് വ്യക്തമല്ല.
ഇസ്രയേൽ–ഇറാൻ സംഘർഷം വീണ്ടും രൂക്ഷമായ പശ്ചാത്തലത്തിലാണ് ഈ റിപ്പോർട്ടുകൾ പുറത്തുവരുന്നത്. ഇറാന്റെ ഉന്നത നേതാക്കളെ ലക്ഷ്യമിട്ട ആക്രമണങ്ങൾക്ക് പിന്നാലെ ട്രംപിന്റെ സുരക്ഷയും അമേരിക്ക ശക്തമാക്കിയിട്ടുണ്ട്.
നാറ്റോ ഉച്ചകോടിക്ക് ശേഷം തുർക്കിയിൽ നിന്ന് മടങ്ങുമ്പോൾ ട്രംപ് ഖത്തർ സമ്മാനിച്ച പുതിയ എയർഫോഴ്സ് വൺ ഉപയോഗിക്കാതെ പഴയ വിമാനത്തിലാണ് യാത്ര ചെയ്തത്. പിന്നീട് യുകെയിലെ സൈനിക താവളത്തിൽ എത്തിയ ശേഷമാണ് പുതിയ വിമാനത്തിലേക്ക് മാറിയത്. സുരക്ഷാ കാരണങ്ങളാണ് ഇതിന് പിന്നിലെന്നാണ് വിലയിരുത്തലുകൾ. എന്നാൽ, സൈനികർക്ക് പുതിയ വിമാനം കാണാനുള്ള അവസരം ഒരുക്കാനാണ് ഇത്തരമൊരു ക്രമീകരണം നടത്തിയതെന്നാണ് ട്രംപിന്റെ വിശദീകരണം.
