​ദോഹ: ഖത്തറിലെ ജനവാസ കേന്ദ്രങ്ങളെയും തന്ത്രപ്രധാന മേഖലകളെയും ലക്ഷ്യം വെച്ച് ഇറാൻ നടത്തുന്ന മിസൈൽ-ഡ്രോൺ ആക്രമണങ്ങളുടെ ഞെട്ടിപ്പിക്കുന്ന വിവരങ്ങൾ പുറത്ത്. വിദേശകാര്യ മന്ത്രാലയ വക്താവും പ്രധാനമന്ത്രിയുടെ ഉപദേശകനുമായ ഡോ. മാജിദ് ബിൻ മുഹമ്മദ് അൽ അൻസാരിയാണ് തിങ്കളാഴ്ച നടന്ന പ്രതിവാര വാർത്താ സമ്മേളനത്തിൽ ഇക്കാര്യങ്ങൾ വ്യക്തമാക്കിയത്.
​കഴിഞ്ഞ ഞായറാഴ്ച മാത്രം അഞ്ച് ഡ്രോണുകൾ ഉപയോഗിച്ച് ഇറാൻ ഖത്തറിനെ ആക്രമിക്കാൻ ശ്രമിച്ചുവെന്നും രാജ്യം ശക്തമായ സ്വയംപ്രതിരോധം തുടരുമെന്നും അദ്ദേഹം അറിയിച്ചു.കഴിഞ്ഞ ശനിയാഴ്ച ദോഹയുടെ ചില ഭാഗങ്ങളിൽ നിന്ന് ആളുകളെ ഒഴിപ്പിച്ചത് ഒരു ജനവാസ സമുച്ചയത്തിന് നേരെ ഇറാൻ തൊടുത്ത മിസൈൽ ഖത്തർ പ്രതിരോധ സേന തകർത്തതിനെ തുടർന്നാണെന്ന് ഡോ. അൽ അൻസാരി വെളിപ്പെടുത്തി. ജനങ്ങളുടെ സുരക്ഷ ഉറപ്പാക്കാനാണ് അടിയന്തരമായി ഈ നടപടി സ്വീകരിച്ചത്.ജനവാസ മേഖലകൾക്ക് പുറമെ റാസ് ലഫാൻ (Ras Laffan), മിസൈദ് (Mesaieed) എന്നിവിടങ്ങളിലെ വ്യവസായ കേന്ദ്രങ്ങളെയും ഹമദ് അന്താരാഷ്ട്ര വിമാനത്താവളത്തെയും ഇറാൻ ലക്ഷ്യം വെച്ചു. കൂടാതെ, ഇറാനിലെ അനൗദ്യോഗിക മാധ്യമങ്ങൾ വഴി ഖത്തറിലെ ചില പ്രത്യേക റസിഡൻഷ്യൽ ഏരിയകളെ ആക്രമിക്കുമെന്ന ഭീഷണിയും നിലനിൽക്കുന്നുണ്ട്.ഖത്തർ സായുധ സേനയുടെ അസാമാന്യമായ ജാഗ്രതയെ വക്താവ് പ്രശംസിച്ചു. ഇറാൻ തൊടുത്തുവിടുന്ന മിസൈലുകളുടെയും ഡ്രോണുകളുടെയും 90 ശതമാനത്തിലധികം തകർക്കാൻ സൈന്യത്തിന് സാധിക്കുന്നുണ്ട്. ഇത് രാജ്യത്തിന് സംഭവിക്കുമായിരുന്ന വലിയ നാശനഷ്ടങ്ങൾ ഒഴിവാക്കി.ആക്രമണങ്ങൾ അവസാനിപ്പിക്കാൻ അന്വേഷണ കമ്മീഷനുകളുടെയോ സംയുക്ത സമിതികളുടെയോ ആവശ്യമില്ലെന്നും, മറിച്ച് ആക്രമണം നടത്തുന്ന രാജ്യം സ്വയം പിന്തിരിയുകയാണ് വേണ്ടതെന്നും അദ്ദേഹം പറഞ്ഞു. തങ്ങളെ ലക്ഷ്യം വെക്കാത്ത രാജ്യങ്ങളെ ആക്രമിക്കുന്നത് ഇറാൻ നിർത്തണമെന്നും ഇതിന് മറുപടി നൽകാനുള്ള അവകാശം ഖത്തറിൽ നിക്ഷിപ്തമാണെന്നും അദ്ദേഹം കൂട്ടിച്ചേർത്തു.
ഖത്തറിലെ സ്വദേശികളുടെയും പ്രവാസികളുടെയും സുരക്ഷ ഉറപ്പാക്കാൻ സർക്കാർ എല്ലാവിധ മുൻകരുതലുകളും സ്വീകരിച്ചിട്ടുണ്ടെന്നും നിലവിൽ ആശങ്കപ്പെടേണ്ട സാഹചര്യമില്ലെന്നും മന്ത്രാലയം അറിയിച്ചു.