ഹോർമുസ് കടലിടുക്കിലൂടെ ഇന്ത്യൻ കപ്പലുകൾക്ക് സുരക്ഷിത ഗതാഗതം അനുവദിക്കുമെന്ന് ഇറാൻ അറിയിച്ചു. നിലവിലെ സാഹചര്യത്തിൽ ഇന്ത്യയെ ‘സൗഹൃദ രാജ്യങ്ങൾ’ എന്ന പട്ടികയിൽ ഉൾപ്പെടുത്തിയിട്ടുണ്ടെന്നും ഇറാൻ വ്യക്തമാക്കി. ഇന്ത്യക്ക് പുറമേ ചൈന, റഷ്യ, പാകിസ്ഥാൻ, ഇറാഖ്, ബംഗ്ലാദേശ് എന്നിവിടങ്ങളിലെ കപ്പലുകൾക്ക് ഈ കടലിടുക്ക് വഴി യാത്ര തുടരാൻ കഴിയും. എന്നാൽ അതിന് മുൻപ് ഇറാനുമായി ബന്ധപ്പെട്ട അധികാരികളുമായി ആശയവിനിമയം നടത്തി ആവശ്യമായ ഏകോപനം ഉറപ്പാക്കണം.
അമേരിക്ക, ഇസ്രായേൽ, കൂടാതെ യുദ്ധത്തിൽ നേരിട്ട് പങ്കാളികളായ ചില ഗൾഫ് രാജ്യങ്ങൾ എന്നിവരുടെ കപ്പലുകൾക്ക് കടന്നുപോകാൻ അനുമതി നൽകില്ലെന്ന് ഇറാൻ വിദേശകാര്യ മന്ത്രി അബ്ബാസ് അരാഗ്ചി വ്യക്തമാക്കി. പ്രദേശം ഇപ്പോൾ യുദ്ധമേഖലയായതിനാൽ ശത്രുരാജ്യങ്ങളുടെ കപ്പലുകൾക്ക് അനുമതി നൽകേണ്ട സാഹചര്യമില്ലെന്നും അദ്ദേഹം കൂട്ടിച്ചേർത്തു.
ലോകത്തിലെ എണ്ണ വിതരണത്തിൽ നിർണായക പങ്ക് വഹിക്കുന്ന ഹോർമുസ് കടലിടുക്ക് വഴി കപ്പൽ ഗതാഗതം കുത്തനെ കുറഞ്ഞിട്ടുണ്ട്. സാധാരണ ദിവസങ്ങളിൽ ഏകദേശം 120 കപ്പലുകൾ കടന്നുപോകുന്നിടത്ത്, മാർച്ച് 1 മുതൽ 25 വരെ ആകെ 155 കപ്പലുകൾ മാത്രമാണ് സഞ്ചരിച്ചത്. ചില ദിവസങ്ങളിൽ വെറും രണ്ട് കപ്പലുകൾ മാത്രമാണ് കടന്നുപോയതെന്നും റിപ്പോർട്ടുകൾ പറയുന്നു.
എണ്ണ വിതരണം തടസ്സപ്പെട്ടതോടെ ആഗോളതലത്തിൽ ഇന്ധനക്ഷാമവും വിലക്കയറ്റവും രൂക്ഷമായി. ഇതിന്റെ ആഘാതം ചെറുക്കാൻ പല രാജ്യങ്ങളും കോവിഡ് കാലത്തെപ്പോലെ സാമ്പത്തിക പിന്തുണാ പദ്ധതികൾ ഒരുക്കാനുള്ള ശ്രമത്തിലാണ്.
