ഇറാനിൽ അതിരൂക്ഷമായ രാഷ്ട്രീയ പ്രതിസന്ധിയെന്ന് റിപ്പോർട്ട്. അമേരിക്കയും യൂറോപ്യൻ രാജ്യങ്ങളും ഏർപ്പെടുത്തിയ കടുത്ത ഉപരോധങ്ങൾ മൂലം ഗുരുതരമായ സാമ്പത്തിക പ്രതിസന്ധിയിൽ അകപ്പെട്ട രാജ്യത്ത് ആഭ്യന്തര പ്രക്ഷോഭങ്ങളും ശക്തമായിരിക്കുകയാണ്.  മനുഷ്യാവകാശ സംഘടനകളുടെയും തൊഴിലാളി പ്രസ്ഥാനങ്ങളുടെയും നേതൃത്വത്തിൽ ആയിരങ്ങളാണ് ഇറാൻ ഭരണകൂടത്തിനെതിരെ തെരുവിലിറങ്ങിയിരിക്കുന്നത്. കുതിച്ചുയരുന്ന പണപ്പെരുപ്പം, ഭരണകൂടത്തിന്റെ കെടുകാര്യസ്ഥത, ചെറുതായ കുറ്റങ്ങൾക്കുപോലും വധശിക്ഷ വിധിക്കുന്ന കടുത്ത നയങ്ങൾ എന്നിവയ്ക്കെതിരെയാണ് പ്രക്ഷോഭം. 

ഔദ്യോഗിക കണക്കുകൾ പ്രകാരം 2025ൽ ഇതുവരെ ആയിരത്തിലധികം പേരെയാണ് ഇറാൻ വധശിക്ഷയ്ക്ക് വിധേയരാക്കിയിരിക്കുന്നത്. ഇസ്രായേലുമായും അമേരിക്കയുമായും അടുത്തിടെ നടന്ന സംഘർഷങ്ങൾ രാജ്യത്തിന്റെ സമ്പദ്‍വ്യവസ്ഥയ്ക്ക് വലിയ തിരിച്ചടിയായിരുന്നു. ഉപരോധങ്ങൾ ശക്തമായതോടെ പണപ്പെരുപ്പം നിയന്ത്രണം വിട്ടു, ദേശീയ കറൻസിയുടെ മൂല്യം കുത്തനെ ഇടിഞ്ഞു. ഇതിന്റെ പ്രതിഫലനമായി എണ്ണ വ്യവസായം ഉൾപ്പെടെ നിരവധി പ്രധാന മേഖലകൾ പ്രക്ഷോഭങ്ങളുടെ പശ്ചാത്തലത്തിൽ സ്തംഭനാവസ്ഥയിലേക്കാണ് നീങ്ങുന്നത്.

അന്താരാഷ്ട്ര നാണയനിധിയുടെ (ഐഎംഎഫ്) വിലയിരുത്തൽ പ്രകാരം 2025ൽ ഇറാന്റെ ജിഡിപി വളർച്ച പൂജ്യത്തിന് അടുത്തതായിരിക്കും. 2023ൽ 5.3 ശതമാനവും 2024ൽ 3.7 ശതമാനവുമായിരുന്നു വളർച്ചനിരക്ക്. നിലവിൽ 43.3 ശതമാനമാണ് രാജ്യത്തെ പണപ്പെരുപ്പം—ലോകത്തെ ഏറ്റവും ഉയർന്ന നിരക്കുകളിൽ ഒന്നായി ഇത് മാറിയിരിക്കുകയാണ്. (താരതമ്യത്തിനായി പറയുമ്പോൾ ഇന്ത്യയിൽ ഇത് ഒരു ശതമാനത്തിനും താഴെയാണ്.)

ഉപരോധങ്ങൾക്കൊപ്പം തന്നെ ഭരണതലത്തിലെ അഴിമതിയും ക്രമക്കേടുകളും ഇറാനെ കൂടുതൽ പ്രതിസന്ധിയിലാഴ്ത്തുന്നു. ഈ വർഷം ഇസ്രായേലും അമേരിക്കയും നടത്തിയ ആക്രമണങ്ങളിൽ ബില്യൺ കണക്കിന് ഡോളറിന്റെ നാശനഷ്ടമാണ് ഇറാൻ നേരിട്ടത്. അതിനുമേൽ അമേരിക്ക പ്രഖ്യാപിച്ച പുതിയ ഉപരോധങ്ങൾ—എണ്ണ കയറ്റുമതി, കപ്പൽഗതാഗതം, ബാങ്കിങ് മേഖല തുടങ്ങിയവയെ ലക്ഷ്യമിട്ടുള്ളത്—രാജ്യത്തിന്റെ സമ്പദ്‍വ്യവസ്ഥയുടെ നട്ടെല്ലുകളെ തന്നെ തളർത്തുന്ന തരത്തിലാണെന്ന് വിലയിരുത്തപ്പെടുന്നു.