റായ്പൂർ: ആയുധപൂജയ്ക്കു പിന്നാലെ എകെ-47 റൈഫിൾ ഉപയോഗിച്ച് ആകാശത്തേക്ക് വെടിയുതിർത്ത സംഭവത്തിൽ ഛത്തീസ്ഗഡിലെ മുതിർന്ന ഐപിഎസ് ഉദ്യോഗസ്ഥയും രാജ്‌നന്ദ്‌ഗാവ് എസ്പിയുമായ അങ്കിത ശർമ്മയോട് വിശദീകരണം തേടി പോലീസ്. സർവീസ് ആയുധങ്ങൾ കൈകാര്യം ചെയ്യുന്നതിലെ സുരക്ഷാ മാനദണ്ഡങ്ങളും അച്ചടക്കച്ചട്ടങ്ങളും ലംഘിച്ചെന്ന ആരോപണത്തെ തുടർന്നാണ് കാരണം കാണിക്കൽ നോട്ടീസ് നൽകിയത്.

ഒക്ടോബർ 20-ന് വിജയദശമി ദിനത്തിൽ രാജ്‌നന്ദ്‌ഗാവ് പോലീസ് ലൈനിൽ നടന്ന ആയുധപൂജയ്ക്കു ശേഷമായിരുന്നു സംഭവം. സാരി ധരിച്ചെത്തിയ അങ്കിത ശർമ്മ, പൂജ പൂർത്തിയായതിന് പിന്നാലെ എകെ-47 ഉപയോഗിച്ച് തുടർച്ചയായി ആകാശത്തേക്ക് വെടിയുതിർക്കുന്ന ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെയാണ് സംഭവം വിവാദമായത്.

വെടിവയ്പ്പ് പോലീസ് സേനയുടെ അച്ചടക്കത്തെയും സുരക്ഷാ മാനദണ്ഡങ്ങളെയും ബാധിച്ചെന്ന് രാജ്‌നന്ദ്‌ഗാവ് റേഞ്ച് ഐജി അജയ് യാദവ് വ്യക്തമാക്കി. സർവീസ് ആയുധങ്ങൾ ഉപയോഗിക്കുന്നതുമായി ബന്ധപ്പെട്ട ചട്ടങ്ങൾ ലംഘിച്ചിട്ടുണ്ടോയെന്ന കാര്യത്തിൽ ഉദ്യോഗസ്ഥയുടെ വിശദീകരണം പരിശോധിക്കും. മറുപടി ലഭിച്ചശേഷം മേലധികാരികളുടെ നിർദേശപ്രകാരം തുടർനടപടികൾ സ്വീകരിക്കുമെന്നും അദ്ദേഹം അറിയിച്ചു.

വീഡിയോ പുറത്തുവന്നതോടെ സംഭവത്തിനെതിരെ മുൻ സൈനിക ഉദ്യോഗസ്ഥരും പൊതുജനങ്ങളും രംഗത്തെത്തി. ആയുധം ഉപയോഗിക്കുന്നതിലെ അടിസ്ഥാന സുരക്ഷാ മുൻകരുതലുകൾ പോലും പാലിച്ചില്ലെന്നാണ് വിമർശനം. ആകാശത്തേക്ക് വെടിയുതിർക്കുന്നത് അപകടസാധ്യത സൃഷ്ടിക്കുമെന്ന് മുൻ സൈനിക ഉദ്യോഗസ്ഥൻ കെ.ജെ.എസ്. ധില്ലൺ ചൂണ്ടിക്കാട്ടി.

ആയുധപൂജയുടെ ഭാഗമായി ആയുധങ്ങൾ ആരാധിക്കുന്നതാണ് പാരമ്പര്യമെന്നും തത്സമയ വെടിയുണ്ടകൾ ഉപയോഗിച്ചുള്ള വെടിവയ്പ്പ് ഒഴിവാക്കേണ്ടതായിരുന്നുവെന്നും വിരമിച്ച ഐപിഎസ് ഉദ്യോഗസ്ഥൻ ആർ.കെ. വിജും അഭിപ്രായപ്പെട്ടു. സംഭവത്തിന്റെ പശ്ചാത്തലത്തിൽ പോലീസ് സേനയുടെ പ്രതിച്ഛായയെക്കുറിച്ചും ചർച്ചകൾ ഉയർന്നിട്ടുണ്ട്.

അങ്കിത ശർമ്മയ്ക്ക് പിന്തുണയുമായി ഒരുവിഭാഗം

അതേസമയം, ആയുധപൂജയോടനുബന്ധിച്ച് വർഷങ്ങളായി പിന്തുടരുന്ന ആചാരത്തിന്റെ ഭാഗമായാണ് വെടിവയ്പ്പ് നടത്തിയതെന്നും സുരക്ഷ ഉറപ്പാക്കിയിരുന്നുവെന്നും വാദിച്ച് സമൂഹമാധ്യമങ്ങളിൽ ഒരുവിഭാഗം അങ്കിത ശർമ്മയെ പിന്തുണച്ചു.

അങ്കിത ശർമ്മയ്ക്ക് പുറമെ അഡീഷണൽ എസ്പി കീർത്തൻ റാത്തോഡ് വെടിയുതിർക്കുന്ന ദൃശ്യങ്ങളും പുറത്തുവന്നിട്ടുണ്ട്. റായ്പൂർ, ബിലാസ്പൂർ, ബസ്തർ തുടങ്ങിയ ജില്ലകളിലും പോലീസ് ഉദ്യോഗസ്ഥർ ആയുധപൂജയ്ക്കു പിന്നാലെ ആകാശത്തേക്ക് വെടിയുതിർക്കുന്നതിന്റെ വീഡിയോകൾ പ്രചരിക്കുന്നുണ്ട്.

സംഭവത്തിൽ ഉദ്യോഗസ്ഥയുടെ വിശദീകരണം ലഭിച്ചശേഷമായിരിക്കും തുടർനടപടികൾ സംബന്ധിച്ച തീരുമാനം.