മണിപ്പൂരില് വീണ്ടും കലാപം. സംസ്ഥാനത്തിന്റെ വിവിധ ഭാഗങ്ങളിൽ കലാപം പൊട്ടിപ്പുറപ്പെട്ടതോടെ അഞ്ചു ജില്ലകളിലെ ഇന്റർനെറ്റ് സേനങ്ങൾ വിച്ഛേദിച്ചു. ഇംഫാല്, വെസ്റ്റ് ഇംഫാല്, ഥൗബല്, ബിഷ്ണുപുര്, കാചിങ് ജില്ലകളിലാണ് ഇന്റര്നെറ്റ് സേവനങ്ങൾ വിച്ഛേദിച്ചത്. ഇംഫാലില് പ്രതിഷേധക്കാര് തെരുവിലിറങ്ങുകയും ടയറുകൾ കത്തിക്കുകയും ചെയ്തു. ചിലയിടങ്ങളിൽ വെടിവെയ്പ്പ് നടന്നതായും റിപ്പോർട്ടുകളുണ്ട്.
ശനിയാഴ്ച രാത്രി 11.45 ഓടെയാണ് പ്രതിഷേധം തുടങ്ങിയത്. മെയ്തേയ് തീവ്രസംഘടനയായ ആംരംഭായ് തെങ്കോലിന്റെ നേതാവ് കനാന് സിങ്ങിനെ അറസ്റ്റ് ചെയ്തതിനെ തുടര്ന്നാണ് സംഘർഷാവസ്ഥ സംജാതമായത്. ഇയാളെ വിട്ടയയ്ക്കണമെന്നാണ് പ്രതിഷേധക്കാരുടെ ആവശ്യം. വംശീയ കലാപത്തില് പങ്കുള്ള കുക്കി സായുധ സംഘടനാ നേതാക്കളെയും പ്രവര്ത്തകരെയും അറസ്റ്റ് ചെയ്യണമെന്നും പ്രതിഷേധക്കാര് ആവശ്യപ്പെട്ടു. വിദ്വേഷ സന്ദേശങ്ങള് പ്രചരിക്കാതിരിക്കാനാണ് ഇന്റര്നെറ്റ് റദ്ദാക്കിയതെന്ന് ആഭ്യന്തര സെക്രട്ടറി എന്. അശോക് കുമാര് വിശദീകരിച്ചു.
മണിപ്പൂരിലെ വംശീയ കലാപത്തിന്റെ കേസുകള് ദേശീയ അന്വേഷണ ഏജന്സി (എന്ഐഎ)യാണ് അന്വേഷിക്കുന്നത്. ഇരുവിഭാഗത്തിലുമുള്ള കേസുകളില് ഉള്പ്പെട്ടവരെ അറസ്റ്റ് ചെയ്യാനുള്ള ശ്രമം നടക്കുമ്പോഴൊക്കെ വലിയ എതിര്പ്പാണ് അന്വേഷണ ഉദ്യോഗസ്ഥര്ക്ക് നേരിടേണ്ടി വരുന്നത്. ഗവര്ണര് എ.കെ ഭല്ലയുടെ ഉത്തരവിനെ തുടര്ന്ന് ആരംഭായ് തെങ്കോല് ആയുധങ്ങള് അടിയറവ് ചെയ്തിരുന്നു.
