ദോഹ: അന്താരാഷ്‌ട്ര യോഗാ ദിനാചരണത്തിന്റെ ഭാഗമായി ഖത്തറിലെ ഇന്ത്യൻ എംബസി വിവിധ അനുബന്ധ സംഘടനകളുമായി ചേർന്ന് ജൂൺ 20 ശനിയാഴ്ച വൈകുന്നേരം 6 മണി മുതൽ ദോഹയിലെ യു.ഡി.എസ്.ടി (UDST) ക്രിക്കറ്റ് ഗ്രൗണ്ടിൽ വെച്ച് വിപുലമായ പരിപാടികൾ സംഘടിപ്പിക്കുന്നു. ഇന്ത്യൻ സ്പോർട്സ് സെന്റർ (ISC), ഇന്ത്യൻ കൾച്ചറൽ സെന്റർ (ICC), ഇന്ത്യൻ കമ്മ്യൂണിറ്റി ബെനവലന്റ് ഫോറം (ICBF), ഇന്ത്യൻ ബിസിനസ് ആൻഡ് പ്രൊഫഷണൽസ് കൗൺസിൽ (IBPC) എന്നിവയുടെ സംയുക്ത ആഭിമുഖ്യത്തിലാണ് പരിപാടി നടക്കുന്നത്.
​"ആരോഗ്യകരമായ വാർദ്ധക്യത്തിന് യോഗ" (Yoga for Healthy Ageing) എന്നതാണ് ഈ വർഷത്തെ യോഗാ ദിനത്തിന്റെ മുഖ്യ പ്രമേയം. ഖത്തറിലെ ഇന്ത്യൻ അംബാസഡർ ഹിസ് എക്സലൻസി ശ്രീ വിപുൽ, ഇന്ത്യൻ സമൂഹത്തിലെ പ്രമുഖ വ്യക്തിത്വങ്ങൾ, യോഗാ പ്രേമികൾ തുടങ്ങിയവർ ചടങ്ങിൽ പങ്കാളികളാകും.
​ശാരീരിക ആരോഗ്യം, മാനസിക ഉല്ലാസം, ആന്തരിക സമാധാനം എന്നിവ വർദ്ധിപ്പിക്കുന്നതിൽ യോഗയ്ക്കുള്ള പ്രാധാന്യം ജനങ്ങളിലേക്ക് എത്തിക്കുകയാണ് ഈ ആഗോള ആഘോഷത്തിലൂടെ ലക്ഷ്യമിടുന്നത്. പരിചയസമ്പന്നരായ അധ്യാപകരുടെ നേതൃത്വത്തിലുള്ള യോഗാ സെഷനുകളും കൂട്ടായ യോഗാ പ്രദർശനവും (Mass Yoga Demonstration) പരിപാടിയുടെ ഭാഗമായി ഉണ്ടായിരിക്കും. കൂടാതെ, യോഗ ജീവിതശൈലിയുടെ ഭാഗമാക്കാൻ പ്രേരിപ്പിക്കുന്ന ആരോഗ്യ-ക്ഷേമ ബോധവൽക്കരണ പരിപാടികളും ഇതിനോടനുബന്ധിച്ച് സംഘടിപ്പിച്ചിട്ടുണ്ട്.മുൻകൂട്ടി രജിസ്റ്റർ ചെയ്തവർക്ക് മാത്രമായിരിക്കും പ്രവേശനം. എല്ലാ പ്രായക്കാർക്കും  പങ്കെടുക്കാം.ഇന്ത്യൻ എംബസിയുടെ ഔദ്യോഗിക സോഷ്യൽ മീഡിയ (ഫേസ്ബുക്ക്) പേജുകളിൽ ലഭ്യമായ ലിങ്ക് വഴി താല്പര്യമുള്ളവർക്ക് പേര് രജിസ്റ്റർ ചെയ്യാവുന്നതാണ്.പരിപാടി നടക്കുന്ന സ്ഥലത്ത് വെച്ചുള്ള രജിസ്ട്രേഷൻ ലഭ്യമായ സീറ്റുകളുടെ എണ്ണത്തിന് അനുസരിച്ച് മാത്രമായിരിക്കും.
​മനസ്സിനും ശരീരത്തിനും ഉന്മേഷം പകരുന്ന ഈ ആഗോള യോഗാദിനാഘോഷത്തിലേക്ക് എല്ലാ കമ്മ്യൂണിറ്റി അംഗങ്ങളെയും സ്വാഗതം ചെയ്യുന്നതായി സംഘാടകർ അറിയിച്ചു.