കൊച്ചി: കൊച്ചി ശാസ്ത്ര സാങ്കേതിക സർവകലാശാലയിൽ സമുദ്രത്തെയും സമുദ്ര ഉല്പന്നങ്ങളെയും കുറിച്ച് ‘ഇൻറർനാഷ്ണൽ കോൺഫറൻസ് ഓൺ മറൈൻ ബയോഡൈവേഴ്സിറ്റി, ജീനോമിക്സ്, ആൻറ് സസ്റ്റെയിനബിൾ ഡെവലപ്മെൻറ്’ (ICMBGSD ‘2025) അന്താരാഷ്ട്ര സമ്മേളനം സംഘടിപ്പിക്കുന്നു.  കുസാറ്റിലെ സമുദ്ര ജീവശാസ്ത്രം, മൈക്രോബയോളജി & ബയോകെമിസ്ട്രി വിഭാഗം, ഭൂമിശാസ്ത്ര മന്ത്രാലയത്തിന്റെ ദേശീയ ധ്രുവ സഞ്ചാര സമിതിയായ നാഷണൽ സെന്റർ ഫോർ പോളാർ ആൻഡ് ഓഷ്യൻ റിസർച്ച് (NCPOR), കുസാറ്റ്–NCPOR പോളാർ സയൻസസ് സെന്റർ എന്നിവയുടെ സഹകരണത്തിൽ ഏപ്രിൽ 9 മുതൽ 11 വരെ സ്കൂൾ ഓഫ് മറൈൻ സയൻസസ് ക്യാമ്പസ് വെച്ചാണ് സമ്മേളനം സംഘടിപ്പിക്കുന്നത്

ഏപ്രിൽ 9 ന് രാവിലെ 10 മണിക്ക് ഫോർഷോർ റോഡിലുള്ള സിഫ്നെറ്റ് ഓഡിറ്റോറിയത്തിൽ നടക്കുന്ന സമ്മേളനം ഭൗമശാസ്ത്ര മന്ത്രാലയത്തിൻറെ ദേശീയ പോളാർ ആൻഡ് ഓഷ്യൻ റിസർച്ച് സെന്ററിന്റെ ഡയറക്ടർ ഡോ. തമ്പാൻ മേലോത്ത് ഉദ്‌ഘാടനം ചെയ്യും. ഇന്ത്യയിലെയും വിദേശത്തെയും 30-ലധികം വിദ്യാഭ്യാസ, ഗവേഷണ സ്ഥാപനങ്ങളിൽ നിന്നായി ഏകദേശം 400-ലധികം പേർ ഈ സമ്മേളനത്തിൽ പങ്കെടുക്കും.

ഈ സമ്മേളനം സമുദ്രവും തീരദേശവും ഉൾപ്പെടെയുള്ള പരിസ്ഥിതികൾ നേരിടുന്ന പ്രധാനപ്രശ്നങ്ങൾ ചർച്ച ചെയ്യുകയും ആഗോള പരിസ്ഥിതി പ്രതിസന്ധികളുമായി അതിന്റെ ബന്ധം വിശകലനം ചെയ്യുകയും ചെയ്യുന്നതാണ്. സമുദ്ര ജൈവവൈവിധ്യ സംരക്ഷണവും, സുസ്ഥിര മത്സ്യബന്ധനവും, ആക്വാകൾച്ചർ, ബ്ലൂ ഇക്കോണമി, സമുദ്ര ബയോടെക്‌നോളജി, ജീനോമിക്സ്, മൈക്രോബയോളജി, ആന്റിമൈക്രോബിയൽ റെസിസ്റ്റൻസ്, പോളാർ ബയോളജി, കാലാവസ്ഥാ വ്യതിയാനം, സമുദ്രാരോഗ്യം, സമുദ്ര ഉത്പന്നങ്ങൾ, പുതിയ മരുന്നുകളുടെ കണ്ടെത്തൽ തുടങ്ങിയ മേഖലയുമായി ബന്ധപ്പെട്ട ആറ് പ്രധാന വിഷയങ്ങളിലായാണ് സമ്മേളനത്തിലെ പ്രധാന ചർച്ചകൾ നടക്കുന്നത്.

 ‘ഐ.സി.എം.ബി.ജി.എസ്.ഡി. 2025’ സമുദ്രശാസ്ത്ര രംഗത്തെ മുൻനിര ഗവേഷകരെയും ശാസ്ത്രജ്ഞരെയും അക്കാദമികരെയും തമ്മിൽ ആശയവിനിമയത്തിനുള്ള വേദിയാകുന്നതിനോടൊപ്പം, സമുദ്ര പരിസ്ഥിതികളുടെ നിലവിലെ അവസ്ഥ വിലയിരുത്തുകയും സമുദ്ര ജൈവ വിഭവങ്ങളുടെ നിലനിൽപ്പുള്ള ഉപയോഗത്തിനായുള്ള തന്ത്രങ്ങൾ രൂപപ്പെടുത്തുകയും ചെയ്യുന്ന വലിയൊരു വേദിയായി പ്രവർത്തിക്കും.

സ്റ്റേറ്റ് യൂണിവേഴ്സിറ്റി, ഡെൻമാർക്കിലെ ടെക്നിക്കൽ യൂണിവേഴ്സിറ്റി, ക്രൊയേഷ്യയിലെ ബോസ്‌കോവിച്ച് ഇൻസ്റ്റിറ്റ്യൂട്ട്, നെതർലൻഡ്സിലെ ഗ്രോണിംഗൻ യൂണിവേഴ്സിറ്റി, റഷ്യയിലെ ഇൻസ്റ്റിറ്റ്യൂട്ട് ഓഫ് എക്സ്പെറിമെന്റൽ മെഡിസിൻ, ജപ്പാനിലെ സാഡോ ദ്വീപിലെ ഇകോളജിക്കൽ സസ്റ്റൈനബിലിറ്റിയ്ക്ക് വേണ്ടുള്ള സെന്റർ പ്രവർത്തിക്കുന്ന മറൈൻ ബയോളജിക്കൽ സ്റ്റേഷൻ, ഭൂമിശാസ്ത്ര മന്ത്രാലയം, ഐഐഎസ്ഇആർ മൊഹാലി (IISER Mohali), ദേശീയ സമുദ്ര ഗവേഷണ കേന്ദ്രമായ നാഷണൽ ഇൻസ്റ്റിറ്റ്യൂട്ട് ഓഫ് ഓഷ്യൻോഗ്രഫി (NIO), സെൻട്രൽ മറൈൻ ഫിഷറീസ് റിസർച്ച് ഇൻസ്റ്റിറ്റ്യൂട്ട് (CMFRI), സെൻട്രൽ ഡ്രഗ് റിസർച്ച് ഇൻസ്റ്റിറ്റ്യൂട്ട്, കേരള കേന്ദ്ര സർവകലാശാല, മഹാത്മാഗാന്ധി സർവകലാശാല, കേരള സർവകലാശാല, കേരള ഫിഷറീസ് ആൻഡ് ഒഷ്യൻ സ്റ്റഡീസ് സർവകലാശാല എന്നിവയുൾപ്പെടെയുള്ള പ്രമുഖ സ്ഥാപനങ്ങളിൽ നിന്നുള്ള വിദഗ്ധരുടെ സജീവ സാന്നിധ്യം സമ്മേളനത്തിൽ ഉണ്ടായിരിക്കും.

കുസാറ്റ് രജിസ്‌ട്രാർ പ്രൊഫ. എ. യു. അരുണ്‍, ക്രൊയേഷ്യയിലെ റൂഡർ ബോസ്കോവിച് ഇന്‍സ്റ്റിറ്റ്യൂട്ടിലെ മുതിര്‍ന്ന ശാസ്ത്രജ്ഞനായ പ്രൊഫ. ഡോ. സാന്‍ഡി ഓര്‍ലിച്, , ഭൂമിശാസ്ത്ര മന്ത്രാലയത്തിലെ ശാസ്ത്രജ്ഞൻ ഡോ. നോബി ഇ.പി, കുസാറ്റ് മറൈൻ സയൻസസ് ഡീനും ഫാക്കല്‍ട്ടിയുമായ ഡോ. എസ്. ബിജോയ് നന്ദൻ എന്നിവര്‍ പരിപാടിയിൽ പങ്കെടുക്കും.സമുദ്ര ജീവശാസ്ത്രം, മൈക്രോബയോളജി & ബയോകെമിസ്ട്രി വിഭാഗം തലവൻ പ്രൊഫസർ ഡോ സജീവ് ടി പി ആണ് സമ്മേളനത്തിൻറെ ചീഫ് കൺവീനർ.