​ദോഹ: ഭാരതത്തിന്റെ 80-ാം സ്വാതന്ത്ര്യദിനം ഖത്തറിലെ ഇന്ത്യൻ സമൂഹം സമുചിതമായി ആഘോഷിച്ചു. ഇന്ത്യൻ കൾച്ചറൽ സെന്ററിൽ (ഐ.സി.സി) നടന്ന പ്രൗഢഗംഭീരമായ ചടങ്ങിൽ അഞ്ഞൂറിലധികം പ്രവാസികളും വിശിഷ്ടാതിഥികളും പങ്കെടുത്തു.
​ദേശീയ ഗാനമായ 'വന്ദേമാതരം' ആലപിച്ചുകൊണ്ട് ആഘോഷങ്ങൾക്ക് തുടക്കമായി. തുടർന്ന് ഇന്ത്യൻ എംബസി ചാർജ് ഡി അഫയേഴ്സ് സന്ദീപ് കുമാർ ദേശീയ പതാക ഉയർത്തുകയും, രാഷ്ട്രപിതാവ് മഹാത്മാഗാന്ധിയുടെ ഛായാചിത്രത്തിൽ പുഷ്പാർച്ചന നടത്തുകയും ചെയ്തു. രാജ്യത്തെ അഭിസംബോധന ചെയ്തുകൊണ്ട് ഇന്ത്യൻ രാഷ്ട്രപതി ദ്രൗപദി മുർമു നൽകിയ സ്വാതന്ത്ര്യദിന സന്ദേശത്തിലെ പ്രസക്തഭാഗങ്ങൾ അദ്ദേഹം ചടങ്ങിൽ വായിച്ചു.
​ഇന്ത്യയും ഖത്തറും തമ്മിലുള്ള ഉഭയകക്ഷി ബന്ധവും നയതന്ത്ര സഹകരണവും കൂടുതൽ കരുത്താർജ്ജിക്കുകയാണെന്ന് ചടങ്ങിൽ സംസാരിച്ച സന്ദീപ് കുമാർ ചൂണ്ടിക്കാട്ടി. ഇരുരാജ്യങ്ങളും തമ്മിൽ അടുത്തിടെ നടന്ന ഉന്നതതല സന്ദർശനങ്ങൾ ഈ സഹകരണത്തെ കൂടുതൽ ദൃഢമാക്കിയതായി അദ്ദേഹം വ്യക്തമാക്കി. പ്രധാനമന്ത്രി നരേന്ദ്ര മോദിയുടെ 'വികസിത് ഭാരത് @2047' എന്ന ലക്ഷ്യത്തിലേക്കുള്ള ഇന്ത്യയുടെ പ്രയാണത്തെക്കുറിച്ചും, സാമ്പത്തിക വളർച്ച, യുവജന ശാക്തീകരണം, അടിസ്ഥാന സൗകര്യ വികസനം, നിർമ്മിത ബുദ്ധി (AI), ബഹിരാകാശം, സെമികണ്ടക്ടർ തുടങ്ങിയ സാങ്കേതിക മേഖലകളിലെ രാജ്യത്തിന്റെ മുന്നേറ്റത്തെക്കുറിച്ചും അദ്ദേഹം സംസാരിച്ചു.
​ഖത്തറിലെ ഇന്ത്യൻ സമൂഹത്തിന് നൽകുന്ന എല്ലാവിധ പിന്തുണയ്ക്കും അമീർ ശൈഖ് തമീം ബിൻ ഹമദ് അൽതാനിക്കും ഖത്തർ ഭരണകൂടത്തിനും പ്രജകൾക്കും അദ്ദേഹം നന്ദി അറിയിച്ചു. ഖത്തറിന്റെ വികസനത്തിൽ ഇന്ത്യൻ പ്രവാസി സമൂഹം നൽകുന്ന സംഭാവനകളെയും പങ്കാളിത്തത്തെയും അദ്ദേഹം പ്രശംസിച്ചു.
ഐ സി സി പ്രസിഡന്റ് എ പി മണികണ്ഠൻ, ഐ സി ബി എഫ് പ്രസിഡന്റ് ഷാനവാസ് ബാവ, ഐ എസ് സി പ്രസിഡന്റ് ഇ പി അബ്ദുറഹ്മാൻ ഐ ബി സി പ്രസിഡന്റ് താഹ അബ്ദുൽ കരീം, ഐ സി സി ഉപദേശകസമിതി ചെയർമാൻ പി എൻ ബാബുരാജൻ   എന്നിവർ സാന്നിധ്യം വഹിച്ചു.എംബസിഉദ്യോഗസ്ഥർ,
സാമൂഹ്യ സാംസ്‌കാരിക പ്രതിനിധികൾ,വിവിധ ഇന്ത്യൻ സ്കൂൾ മേധാവികൾ, വാണിജ്യ പ്രമുഖർ, മാധ്യമപ്രവർത്തകർ എന്നിവർ പങ്കാളിത്തം വഹിച്ചു.
 ഇന്ത്യൻ കൾച്ചറൽ സെന്ററിന്റെയും മറ്റ് പ്രവാസി കൂട്ടായ്മകളുടെയും നേതൃത്വത്തിൽ വർണ്ണാഭമായ സാംസ്കാരിക പരിപാടികളും ദേശഭക്തി ഗാനാലപനവും അരങ്ങേറി. പ്രവാസികളുടെ സജീവ പങ്കാളിത്തം കൊണ്ട് ആഘോഷങ്ങൾ ഏറെ ശ്രദ്ധേയമായി.