ദോഹ: പ്രശസ്തമായ അന്താരാഷ്ട്ര ഭൗതികശാസ്ത്ര ഒളിമ്പ്യാഡുകളിൽ ഇരട്ട വെങ്കല മെഡൽ നേടി ഖത്തറിന് അഭിമാനമായി ഇന്ത്യൻ സ്കൂൾ വിദ്യാർത്ഥി. ഡി.പി.എസ് മോഡേൺ ഇന്ത്യൻ സ്കൂളിലെ (DPS Modern Indian School) വിദ്യാർത്ഥിയായ റിതേഷ് വർദ്ധൻ റെഡ്ഡി കംഗൂളയാണ് ലോകത്തിലെ ഏറ്റവും പ്രശസ്തമായ രണ്ട് ശാസ്ത്ര മത്സരങ്ങളിൽ രാജ്യത്തിനായി വെങ്കല മെഡലുകൾ നേടിയത്.
ആഗോള ശാസ്ത്ര വേദികളിൽ ഖത്തറിന്റെ മികച്ച മുന്നേറ്റത്തിന് അടിവരയിടുന്നതാണ് ഈ നേട്ടം.റഷ്യൻ ഫെഡറേഷന്റെ മേൽനോട്ടത്തിൽ ജൂൺ 21 മുതൽ 30 വരെ ഓൺലൈനായി സംഘടിപ്പിച്ച നാലാമത് ഇന്റർനാഷണൽ സയൻസ് ഫിസിക്സ് ഒളിമ്പ്യാഡിലാണ് (ISPhO 2026) റിതേഷ് ആദ്യ വെങ്കലം നേടിയത്.ജൂലൈ 4 മുതൽ 12 വരെ കൊളംബിയയിലെ ബുക്കാരാമംഗയിൽ നടന്ന 56-ാമത് ഇന്റർനാഷണൽ ഫിസിക്സ് ഒളിമ്പ്യാഡിലാണ് (IPhO 2026) രണ്ടാമത്തെ വെങ്കല നേട്ടം. 90-ലധികം രാജ്യങ്ങളിൽ നിന്നായി നാന്നൂറോളം വിദ്യാർത്ഥികളാണ് ഈ മത്സരത്തിൽ പങ്കെടുത്തത്.ഖത്തർ വിദ്യാഭ്യാസ ഉന്നത വിദ്യാഭ്യാസ മന്ത്രാലയത്തിന് കീഴിലുള്ള ഫിസിക്സ് ഡിപ്പാർട്ട്‌മെന്റ് അന്താരാഷ്ട്ര പരിശീലകരുടെ സഹകരണത്തോടെ നൽകിയ തീവ്ര പരിശീലനമാണ് ഈ ചരിത്ര നേട്ടത്തിന് റിതേഷിനെ പ്രാപ്തനാക്കിയത്.
സെക്കൻഡറി സ്കൂൾ വിദ്യാർത്ഥികൾക്കായി സംഘടിപ്പിക്കപ്പെടുന്ന ലോകത്തിലെ ഏറ്റവും പഴക്കമേറിയതും വലുതുമായ ശാസ്ത്ര മത്സരങ്ങളിലൊന്നാണ് ഇന്റർനാഷണൽ ഫിസിക്സ് ഒളിമ്പ്യാഡ് (IPhO).
