കൊച്ചി: പൊക്കിളിനു ചുറ്റും കടുത്ത വേദന അനുഭവപ്പെട്ട കപ്പല്‍ ജീവനക്കാരനായ യുക്രെയ്ന്‍ പൗരന് ഇന്ത്യന്‍ കോസ്റ്റ് ഗാര്‍ഡിന്റെ സമയോചിത സേവനം. മാള്‍ട്ട പതാകയുള്ള എം ടി മിനവര്‍വ വേരയില്‍ നിന്നും അടിയന്തര വൈദ്യസഹായ അഭ്യര്‍ഥന ലഭിച്ചതിനെ തുടര്‍ന്നാണ് കൊച്ചിയില്‍ ഇന്ത്യന്‍ നാവിക സേന രംഗത്തെത്തിയത്.
ഫുജൈറയിലേക്ക് പോവുകയായിരുന്ന കപ്പലിലെ യുക്രെയ്ന്‍ പൗരനായ ജീവനക്കാരന്‍ മിലിഷ്ചുക്ക് റോമന്‍ (58) ആണ് പൊക്കിളിനു ചുറ്റും വേദന അനുഭവപ്പെട്ടത്.
രോഗിയുടെ ആരോഗ്യസ്ഥിതി ഇന്ത്യന്‍ കോസ്റ്റ് ഗാര്‍ഡ് കപ്പലിലെ മെഡിക്കല്‍ അസിസ്റ്റന്റ് വിലയിരുത്തി പ്രാഥമിക ശുശ്രൂഷയും ആവശ്യമായ മരുന്നും നല്‍കിയ ശേഷം കൊച്ചിയിലെ ആശുപത്രിയില്‍ എത്തിക്കുകയായിരുന്നു. കോസ്റ്റ് ഗാര്‍ഡ് മെഡിക്കല്‍ അസിസ്റ്റന്റിനൊപ്പം ടഗ് ഓഷ്യന്‍ എലിറ്റ് വഴിയാണ് രോഗിയെ കപ്പലില്‍ നിന്ന് ഒഴിപ്പിച്ചത്.
കൊച്ചി തുറമുഖത്ത് എത്തിച്ച രോഗിയെ ആബുംലന്‍സില്‍ ലൂര്‍ദ് ആശുപത്രിയില്‍ എത്തിച്ച് തുടര്‍ ചികിത്സ നല്‍കുകയായിരുന്നു.
