ദോഹ: ഖത്തറിലെ പുതിയ ഇന്ത്യൻ അംബാസഡറായി ചുമതലയേറ്റ ഡോ. കെ. ശ്രീകർ റെഡ്ഡിക്ക് ഇന്ത്യൻ സമൂഹത്തിന്റെ ആദരവോടെ പ്രവാസി സംഘടനകൾ ഇന്ന് പൗരസ്വീകരണം നൽകുന്നു. ഖത്തറിലെ ഇന്ത്യൻ എംബസിയുടെ രക്ഷാകർതൃത്വത്തിൽ പ്രവർത്തിക്കുന്ന ഇന്ത്യൻ കൾച്ചറൽ സെന്ററിന്റെ (ഐ.സി.സി) നേതൃത്വത്തിലാണ് സ്വീകരണ ചടങ്ങ് സംഘടിപ്പിക്കുന്നത്.
ഇന്ന് (തിങ്കൾ) വൈകുന്നേരം 7 മണിക്ക് അബു ഹമൂറിലെ ഐ.സി.സി അശോകാ ഹാളിലാണ് ചടങ്ങ് നടക്കുക. ഐ.സി.സിക്ക് പുറമെ ഇന്ത്യൻ കമ്മ്യൂണിറ്റി ബെനവലന്റ് ഫോറം (ഐ.സി.ബി.എഫ്), ഇന്ത്യൻ സ്പോർട്സ് സെന്റർ (ഐ.എസ്.സി), ഇന്ത്യൻ ബിസിനസ് ആൻഡ് പ്രൊഫഷണൽ കൗൺസിൽ (ഐ.ബി.പി.സി) എന്നീ പ്രമുഖ കൂട്ടായ്മകളും സംയുക്തമായാണ് സ്വീകരണമൊരുക്കുന്നത്.
ഖത്തറിലെ തങ്ങളുടെ ഔദ്യോഗിക പ്രവർത്തന കാലാവധി ആരംഭിക്കുന്ന അംബാസഡർക്ക് ഊഷ്മളമായ വരവേൽപ്പ് നൽകാനും വരും നാളുകളിലെ പ്രവർത്തനങ്ങൾക്ക് ആശംസകൾ നേരനുമായി ദോഹയിലെ സാമൂഹിക, സാംസ്കാരിക, ബിസിനസ് മേഖലകളിലെ നിരവധി പ്രമുഖർ ചടങ്ങിൽ സംബന്ധിക്കും. എല്ലാ പ്രവാസികളെയും ചടങ്ങിലേക്ക് സ്വാഗതം ചെയ്യുന്നതായി ഐ.സി.സി മാനേജിംഗ് കമ്മിറ്റി ഭാരവാഹികൾ അറിയിച്ചു
