ന്യൂഡൽഹി: ഇന്ത്യ-ചൈന-ഭൂട്ടാൻ അതിർത്തിയോട് ചേർന്ന തന്ത്രപ്രധാന മേഖലയിലേക്കുള്ള കണക്റ്റിവിറ്റി ശക്തിപ്പെടുത്താൻ പുതിയ റെയിൽപാത പദ്ധതിക്ക് കേന്ദ്ര സർക്കാർ അനുമതി നൽകി. വടക്കൻ ബംഗാളിലെ ഖുനിയ മോർ മുതൽ ജൽധാക്ക വരെ 17 കിലോമീറ്റർ ദൈർഘ്യമുള്ള റെയിൽവേ പാതയ്ക്കായി 272 കോടി രൂപ റെയിൽവേ മന്ത്രാലയം അനുവദിച്ചു.

സിലിഗുരി എംപി രാജു ബിസ്തയാണ് പദ്ധതിയുടെ വിവരങ്ങൾ സോഷ്യൽ മീഡിയയിലൂടെ പങ്കുവെച്ചത്. ഖുനിയ മോറിൽ നിന്ന് ആരംഭിക്കുന്ന പാത ജൽപായ്ഗുരി, കാലിംപോങ് ഫോറസ്റ്റ് ഡിവിഷനുകളിലൂടെയാണ് കടന്നുപോകുന്നത്. അതിർത്തി മേഖലയിലേക്കുള്ള ഗതാഗത സൗകര്യം മെച്ചപ്പെടുത്തുന്നതിനൊപ്പം ഡൂവാർസ് മേഖലയിലെ വിനോദസഞ്ചാര വികസനത്തിനും പദ്ധതി സഹായകരമാകുമെന്നാണ് വിലയിരുത്തൽ.

ഇന്ത്യ, ചൈന, ഭൂട്ടാൻ എന്നീ രാജ്യങ്ങൾ അതിർത്തി പങ്കിടുന്ന ഡോക്‌ലാം മേഖലയ്ക്ക് സമീപത്തുകൂടിയാണ് ഈ റെയിൽപാത കടന്നുപോകുക. 2017-ൽ ഇന്ത്യയും ചൈനയും തമ്മിൽ സൈനിക ഏറ്റുമുട്ടലിന് വഴിവെച്ച ഡോക്‌ലാം മേഖലയുടെ സമീപത്ത് അടിസ്ഥാന സൗകര്യ വികസനം ലക്ഷ്യമിടുന്ന പദ്ധതിയെന്ന നിലയിൽ ഇതിന് പ്രത്യേക തന്ത്രപ്രധാനതയുണ്ട്.

അതിർത്തി മേഖലകളിൽ ചൈന അടിസ്ഥാന സൗകര്യ വികസനം വേഗത്തിലാക്കുന്ന സാഹചര്യത്തിൽ, ഇന്ത്യയും പ്രതിരോധ-ഗതാഗത ശൃംഖല ശക്തിപ്പെടുത്തുന്നതിന്റെ ഭാഗമായാണ് പുതിയ റെയിൽപാത നടപ്പാക്കുന്നത്. ഭാവിയിൽ അതിർത്തി മേഖലയിലേക്ക് വിഭാവനം ചെയ്യുന്ന 200 കിലോമീറ്റർ ദൈർഘ്യമുള്ള തന്ത്രപ്രധാന റെയിൽ ശൃംഖലയുടെ ആദ്യഘട്ടമായും ഈ പദ്ധതിയെ വിലയിരുത്തുന്നു.

മൺസൂൺ അവസാനിച്ചതിന് ശേഷം റെയിൽവേയും പശ്ചിമ ബംഗാൾ വനംവകുപ്പും സംയുക്തമായി സർവേ നടപടികൾ ആരംഭിക്കുമെന്നാണ് റിപ്പോർട്ടുകൾ. അതിർത്തി പ്രദേശങ്ങളിലേക്കുള്ള യാത്രാസൗകര്യം മെച്ചപ്പെടുത്തുന്നതിനും പ്രതിരോധ ആവശ്യങ്ങൾക്കും വിനോദസഞ്ചാര വികസനത്തിനും ഒരുപോലെ പ്രയോജനപ്പെടുന്ന പദ്ധതിയായിരിക്കും ഇത്. നിലവിൽ നിർമാണം പുരോഗമിക്കുന്ന സിവോക്ക്–രംഗ്പോ റെയിൽപാതയ്ക്ക് പുറമെ, ചൈന അതിർത്തി മേഖലയെ ലക്ഷ്യമിട്ടുള്ള രണ്ടാമത്തെ പ്രധാന റെയിൽവേ പദ്ധതിയായും ഇത് മാറും.