അതിവേഗം സഞ്ചരിക്കുന്ന ട്രെയിനിൽ നിന്നുപോലും തൊടുക്കും; അഗ്നി-പ്രൈം മിസൈൽ വിജയകരമായി പരീക്ഷിച്ച് ഇന്ത്യ
ഓടിക്കൊണ്ടിരിക്കുന്ന ട്രെയിനിൻറെ കോച്ചിൽ നിന്നും മിസൈൽ വിക്ഷേപിച്ച് ഇന്ത്യ. അഗ്നി-പ്രൈം മിസൈലിൻറെ പുതിയ പരീക്ഷണമാണ് ഡിആർഡിഒ വിജയകരമായി നടത്തിയത്. ട്രെയിൻ കോച്ചിൽ നിന്നും ആദ്യമായാണ് ഇന്ത്യ മിസൈൽ വിക്ഷേപണം പരീക്ഷിക്കുന്നത്. ഇത് വിജയകരമായിരുന്നു എന്നും ഡിആർഡിഒ അറിയിച്ചു.
അത്യാധുനിക ഇൻറർമീഡിയേറ്റ്-റേഞ്ച് ബാലിസ്റ്റിക് മിസൈലാണ് അഗ്നി-പ്രൈം. 2,000 കിലോമീറ്റർ പ്രഹരശേഷിയുള്ള അഗ്നി-പ്രൈമിന് ചൈനയും പാകിസ്ഥാനും താണ്ടാനുള്ള കരുത്തുള്ളണ്ട്. ഇതിനെ റെയിൽ അടിസ്ഥാനത്തിലുള്ള ലോഞ്ചറിൽ നിന്ന് വിജയകരമായി വിക്ഷേപിച്ചാണ് ഇന്ത്യയുടെ ഡിഫൻസ് റിസർച്ച് ആൻഡ് ഡവലപ്മെൻറ് ഓർഗനൈസേഷൻ പുത്തൻ ചരിത്രമെഴുതിയിരിക്കുന്നത്.
ഇതോടെ, സഞ്ചരിച്ചുകൊണ്ടിരിക്കുന്ന ഒരു ട്രെയിനിൽ നിന്ന് മിസൈൽ വിക്ഷേപിക്കാനുള്ള സാങ്കേതികവിദ്യയുള്ള എലൈറ്റ് രാജ്യങ്ങളുടെ പട്ടികയിൽ ഇന്ത്യ ഇടംപിടിച്ചതായി പ്രതിരോധ മന്ത്രി രാജ്നാഥ് സിംഗ് വ്യക്തമാക്കി. അഗ്നി-പ്രൈം മിസൈൽ പരീക്ഷണ വിജയത്തിൽ ഡിആർഡിഒയെയും സ്ട്രാറ്റജിക് ഫോഴ്സസ് കമാൻഡിനെയും (എസ്എഫ്സി), പ്രതിരോധ സേനകളെയും രാജ്നാഥ് സിംഗ് അഭിനന്ദിച്ചു.
