ന്യൂഡൽഹി: വിദേശ സാങ്കേതികവിദ്യയുടെ സഹായമില്ലാതെ ഇന്ത്യ സ്വന്തം നിലയിൽ രൂപകൽപ്പന ചെയ്ത് നിർമിക്കുന്ന ആദ്യ ബുള്ളറ്റ് ട്രെയിൻ പുറത്തിറക്കാനുള്ള ഒരുക്കങ്ങൾ അവസാനഘട്ടത്തിൽ. മുംബൈ–അഹമ്മദാബാദ് ഹൈസ്പീഡ് റെയിൽ ഇടനാഴിക്കായി നിർമിക്കുന്ന ട്രെയിനിന്റെ നിർമാണം ബെംഗളൂരുവിലെ ഭാരത് എർത്ത് മൂവേഴ്‌സ് ലിമിറ്റഡ് (ബിഇഎംഎൽ) പ്ലാന്റിലാണ് പുരോഗമിക്കുന്നത്. ഇന്ത്യൻ കാലാവസ്ഥയും രാജ്യത്തെ റെയിൽവേ പ്രവർത്തന സാഹചര്യങ്ങളും പരിഗണിച്ചാണ് ട്രെയിൻ രൂപകൽപ്പന ചെയ്തിരിക്കുന്നത്.

പരീക്ഷണ ഓട്ടത്തിൽ മണിക്കൂറിൽ 280 കിലോമീറ്റർ വരെ വേഗം കൈവരിക്കാൻ ശേഷിയുള്ള ട്രെയിൻ, വാണിജ്യ സർവീസിൽ മണിക്കൂറിൽ 249 കിലോമീറ്റർ വേഗത്തിലായിരിക്കും ഓടുക. എട്ട് കോച്ചുകളുള്ള ട്രെയിനിന് 202 മീറ്റർ നീളമുണ്ടാകും. നാല് മോട്ടോർ കോച്ചുകളും നാല് ട്രെയിലർ കോച്ചുകളും ഉൾപ്പെടുന്ന ട്രെയിനിൽ ഭിന്നശേഷിക്കാർക്കായി മാറ്റിവച്ച രണ്ട് സീറ്റുകൾ ഉൾപ്പെടെ 557 പേർക്ക് യാത്ര ചെയ്യാം.

ഏഴ് സ്റ്റാൻഡേർഡ് ക്ലാസ് കോച്ചുകളും ഒരു എക്സിക്യൂട്ടീവ് ക്ലാസ് കോച്ചുമാണ് ട്രെയിനിലുണ്ടാകുക. സ്റ്റാൻഡേർഡ് ക്ലാസിൽ 3x2 ക്രമത്തിലും എക്സിക്യൂട്ടീവ് ക്ലാസിൽ 2x2 ക്രമത്തിലുമാണ് സീറ്റുകൾ ഒരുക്കുന്നത്. ട്രെയിനിന്റെ ഇരുവശങ്ങളിലും ഡ്രൈവർ ക്യാബുകളുണ്ടാകും. ഓപ്പറേഷൻ കൺട്രോൾ സെന്ററുമായി ബന്ധിപ്പിച്ചുള്ള ഇന്റലിജന്റ് ഓൺബോർഡ് കൺട്രോൾ സംവിധാനവും ഇതിന്റെ ഭാഗമാണ്. യാത്രക്കാരുടെ എണ്ണം വർധിക്കുന്ന സാഹചര്യത്തിൽ രണ്ട് എട്ട് കോച്ച് ട്രെയിനുകൾ കൂട്ടിച്ചേർത്ത് 16 കോച്ചുകളുള്ള സർവീസായി മാറ്റാനും കഴിയും.

യാത്രാസൗകര്യങ്ങൾക്ക് പ്രത്യേക പരിഗണന നൽകിയാണ് അകത്തളത്തിന്റെ രൂപകൽപ്പന. വിശാലമായ സീറ്റുകൾ, കൂടുതൽ ലെഗ് സ്പേസ്, വലിയ ജനലുകൾ, ആധുനിക എൽഇഡി ലൈറ്റുകൾ എന്നിവയാണ് പ്രധാന സവിശേഷതകൾ. ഓരോ യാത്രക്കാരനും മൊബൈൽ ഫോണും ലാപ്ടോപ്പും ചാർജ് ചെയ്യുന്നതിനുള്ള വ്യക്തിഗത പവർ ഔട്ട്ലെറ്റുകളുണ്ടാകും. സാധാരണ ലഗേജ് റാക്കുകൾക്ക് പുറമേ വലിയ ബാഗുകൾ സൂക്ഷിക്കാൻ കോച്ചുകളുടെ തറയിലും പ്രത്യേക സംവിധാനമുണ്ട്.

ഭിന്നശേഷിക്കാർക്ക് തടസ്സമില്ലാതെ ട്രെയിനിൽ പ്രവേശിക്കാനും യാത്ര ചെയ്യാനും കഴിയുന്ന രീതിയിലാണ് സൗകര്യങ്ങൾ ഒരുക്കിയിരിക്കുന്നത്. ലെവൽ ബോർഡിങ്, പ്രത്യേക സീറ്റുകൾ, ഭിന്നശേഷി സൗഹൃദ വാതിലുകൾ, ടോയ്‌ലറ്റുകൾ എന്നിവ ഇതിലുണ്ട്. കാഴ്ചപരിമിതിയുള്ള യാത്രക്കാർക്ക് സഹായകമാകുന്ന ബ്രെയിലി ലിപിയിലുള്ള സൂചനകളും നൽകും. കോച്ചുകൾക്കിടയിൽ തടസ്സമില്ലാതെ സഞ്ചരിക്കാൻ കഴിയുന്ന ഒറ്റത്തുണ്ടിലുള്ള ഗാങ്‌വേ സംവിധാനവും മറ്റൊരു പ്രത്യേകതയാണ്.

യാത്രക്കാർക്ക് ആവശ്യമായ വിവരങ്ങൾ സമയബന്ധിതമായി ലഭ്യമാക്കാൻ വിപുലമായ പാസഞ്ചർ ഇൻഫർമേഷൻ സംവിധാനവും സജ്ജീകരിച്ചിട്ടുണ്ട്. ഇംഗ്ലീഷ്, ഹിന്ദി, പ്രാദേശിക ഭാഷകൾ എന്നിവയിൽ വിവരങ്ങൾ നൽകുന്ന എൽസിഡി ഡിസ്പ്ലേകൾ, പബ്ലിക് അഡ്രസ് സംവിധാനം, ഓട്ടോമാറ്റിക് അനൗൺസ്മെന്റ് സൗകര്യം എന്നിവ ട്രെയിനിലുണ്ടാകും. മുൻകൂട്ടി അപ്‌ലോഡ് ചെയ്ത വിനോദ പരിപാടികൾ ആസ്വദിക്കാൻ ഹൈസ്പീഡ് വൈഫൈ അധിഷ്ഠിത ഇൻഫോടെയ്ൻമെന്റ് സംവിധാനവും ഒരുക്കിയിട്ടുണ്ട്. അടിയന്തര സാഹചര്യങ്ങളിൽ ജീവനക്കാരുമായി ബന്ധപ്പെടാൻ പാസഞ്ചർ കാബിനുകളിലും കോച്ചുകൾക്കിടയിലും എമർജൻസി ടോക്ക് ബാക്ക് യൂണിറ്റുകളും സ്ഥാപിക്കും.

പ്ലാറ്റ്‌ഫോമിനും ട്രെയിനിനുമിടയിലെ ഉയരവ്യത്യാസവും വിടവും കുറയ്ക്കുന്നതിനായി പ്രത്യേക സംവിധാനങ്ങളുണ്ട്. വാതിലുകൾക്കു സമീപം ഉള്ളിലേക്ക് മടങ്ങുന്ന ഫുട്‌സ്റ്റെപ്പുകൾ നൽകിയിട്ടുണ്ട്. വർഷം മുഴുവൻ യാത്രക്കാർക്ക് അനുയോജ്യമായ താപനിലയും ഈർപ്പവും നിലനിർത്താൻ ഓരോ കോച്ചിലും രണ്ട് യൂണിറ്റുകളുള്ള എച്ച്‌വിഎസി സംവിധാനവും സ്ഥാപിക്കും. പരിസ്ഥിതി സൗഹൃദ ബയോ ടോയ്‌ലറ്റുകളും ട്രെയിനിന്റെ ഭാഗമാണ്.

യാത്രയ്ക്കിടയിലെ ശബ്ദം കുറയ്ക്കാൻ ബോഡിയിലും തറയിലും സൗണ്ട് ഇൻസുലേഷൻ സംവിധാനവും പ്രത്യേക ശബ്ദനിയന്ത്രണ കോട്ടിങ്ങുകളും ഉപയോഗിച്ചിട്ടുണ്ട്. 25 കെവി എസി ഓവർഹെഡ് വൈദ്യുതി സംവിധാനത്തിലാണ് ട്രെയിൻ പ്രവർത്തിക്കുക. ബ്രേക്കിങ് സമയത്ത് ഉൽപ്പാദിപ്പിക്കുന്ന ഊർജം വീണ്ടും പ്രയോജനപ്പെടുത്തുന്ന റീജനറേറ്റീവ് ബ്രേക്കിങ് സംവിധാനവും ഊർജക്ഷമത വർധിപ്പിക്കും.

ഉയർന്ന വേഗത്തിൽ സഞ്ചരിക്കുമ്പോൾ വായുവിന്റെ പ്രതിരോധം കുറയ്ക്കുന്നതിനും തുരങ്കങ്ങളിലൂടെ കടന്നുപോകുമ്പോൾ ഉണ്ടാകുന്ന ശബ്ദപ്രശ്നങ്ങൾ നിയന്ത്രിക്കുന്നതിനുമായി കമ്പ്യൂട്ടർ സിമുലേഷനുകളുടെ സഹായത്തോടെയാണ് ട്രെയിനിന്റെ രൂപകൽപ്പന പൂർത്തിയാക്കിയത്. വായുതരംഗങ്ങൾ സൃഷ്ടിക്കുന്ന ആഘാതവും സോണിക് ബൂം എന്നറിയപ്പെടുന്ന ശക്തമായ ശബ്ദപ്രതിഭാസവും കുറയ്ക്കാൻ സഹായിക്കുന്ന തരത്തിലാണ് മുൻഭാഗവും ബോഡിയും നിർമിച്ചിരിക്കുന്നത്.

ഇന്ത്യയുടെ ഹൈസ്പീഡ് റെയിൽ പദ്ധതിയിൽ നിർണായകമായ ചുവടുവയ്പ്പായാണ് തദ്ദേശീയമായി രൂപകൽപ്പന ചെയ്ത ഈ ബുള്ളറ്റ് ട്രെയിനിനെ വിലയിരുത്തുന്നത്.