ദോഹ:ഇന്ത്യ-ഖത്തർ വിദേശകാര്യ മന്ത്രാലയങ്ങളുടെ ഉദ്യോഗസ്ഥതലത്തിലുള്ള ആറാം ഘട്ട ചർച്ചകൾ ന്യൂഡൽഹിയിൽ നടന്നു. ഇന്ത്യയും ഖത്തറും തമ്മിലുള്ള ഉഭയകക്ഷി സഹകരണവും ബന്ധങ്ങളും മെച്ചപ്പെടുത്തുന്നത് വിലയിരുത്താനാണ് ഈ യോഗം സംഘടിപ്പിച്ചത്.
ഇന്ത്യൻ വിദേശകാര്യ മന്ത്രാലയത്തിലെ കോൺസുലാർ, പാസ്പോർട്ട്, പ്രവാസി കാര്യ സെക്രട്ടറി ശ്രീപ്രിയ രംഗനാഥനും, ഖത്തർ വിദേശകാര്യ മന്ത്രാലയം സെക്രട്ടറി ജനറൽ ഡോ. അഹ്മദ് ബിൻ ഹസൻ അൽ ഹമ്മാദും സംയുക്തമായാണ് യോഗത്തിന് അധ്യക്ഷത വഹിച്ചത്. ഇരു രാജ്യങ്ങളും തമ്മിൽ നടക്കുന്ന പതിവ് നയതന്ത്ര ചർച്ചകളുടെ തുടർച്ചയായാണ് ഈ യോഗം സംഘടിപ്പിക്കപ്പെട്ടത്.
യോഗത്തിൽ ഇരു രാജ്യങ്ങളും തമ്മിലുള്ള നിലവിലുള്ള സഹകരണം അവലോകനം ചെയ്യുകയും, രാഷ്ട്രീയം, വ്യാപാരം, നിക്ഷേപം, ഊർജം, കോൺസുലാർ കാര്യങ്ങൾ എന്നിവയുൾപ്പെടെയുള്ള വിവിധ മേഖലകളിലെ പരസ്പര താൽപ്പര്യമുള്ള വിഷയങ്ങൾ ചർച്ച ചെയ്യുകയും ചെയ്തു. പശ്ചിമേഷ്യയിലെ സംഭവവികാസങ്ങളും യോഗത്തിൽ ചർച്ചയായി.
ഇന്ത്യയിലെ ഖത്തർ അംബാസഡർ മുഹമ്മദ് ബിൻ ഹസൻ അൽ ജാബീർ, ഖത്തർ വിദേശകാര്യ മന്ത്രാലയ ഏഷ്യൻ അഫയേഴ്സ് വകുപ്പ് ഡയറക്ടർ അൽ ജോഹറ ഫഖ്റു എന്നിവരും യോഗത്തിൽ പങ്കെടുത്തു. ഇതുമായി ബന്ധപ്പെട്ട അടുത്ത ഘട്ട വിദേശകാര്യതല കൂടിയാലോചനകൾ ദോഹയിൽ നടക്കും.
