ന്യൂഡൽഹി: രാജ്യത്തിന്റെ ചരക്ക് സേവന നികുതി (ജിഎസ്ടി) വരുമാനത്തിൽ ഏപ്രിൽ മാസത്തിൽ ചരിത്ര നേട്ടം. ഏപ്രിൽ മാസത്തിൽ കേന്ദ്രസർക്കാരിന് ജിഎസ്ടി ഇനത്തിൽ ലഭിച്ചത് 2.42 ലക്ഷം കോടി രൂപ. കഴിഞ്ഞ വർഷത്തേക്കാൾ 8.7 ശതമാനം വർധനയാണ് രേഖപ്പെടുത്തിയിരിക്കുന്നത്. ആഗോള സാമ്പത്തിക അനിശ്ചിതത്വങ്ങൾ നിലനിൽക്കുന്ന സാഹചര്യത്തിലും ഇന്ത്യൻ സമ്പദ്‌വ്യവസ്ഥയുടെ സ്ഥിരതയും ഉപഭോഗശേഷിയും ഈ കണക്കുകൾ വ്യക്തമാക്കുന്നതായി സാമ്പത്തിക വിദഗ്ധർ വിലയിരുത്തുന്നു.

റീഫണ്ടുകൾ പരിഗണിച്ച ശേഷമുള്ള അറ്റ ജിഎസ്ടി വരുമാനം 2.11 ലക്ഷം കോടി രൂപയായി. ഇത് വാർഷിക അടിസ്ഥാനത്തിൽ 7.3 ശതമാനം വർധനയാണ്. അതേസമയം, നികുതിദായകർക്ക് 31,793 കോടി രൂപ റീഫണ്ടായി അനുവദിച്ചു. മുൻവർഷത്തെ അപേക്ഷിച്ച് റീഫണ്ടിൽ 19.3 ശതമാനം വർധനയും ഉണ്ടായി. ഇതിന് മുമ്പ് ഏറ്റവും ഉയർന്ന ജിഎസ്ടി സമാഹരണം 2025 ഏപ്രിലിലായിരുന്നു. അന്ന് 2.37 ലക്ഷം കോടി രൂപയാണ് സർക്കാരിന് ലഭിച്ചിരുന്നത്. പുതിയ കണക്കുകൾ അതിനെ മറികടന്നിരിക്കുകയാണ്.

ഇറക്കുമതി മേഖലയിൽ നിന്നുള്ള നികുതി വരുമാനമാണ് ഇത്തവണത്തെ നേട്ടത്തിന് പ്രധാന കാരണം. ഇറക്കുമതിയിൽ നിന്നുള്ള ജിഎസ്ടി വരുമാനം 57,580 കോടി രൂപയായി ഉയർന്നു. കഴിഞ്ഞ വർഷത്തേക്കാൾ 25.8 ശതമാനം വർധനയാണ് ഇത്. മറുവശത്ത് ആഭ്യന്തര ഇടപാടുകളിൽ നിന്നുള്ള വരുമാനം 1.85 ലക്ഷം കോടി രൂപയായി, 4.3 ശതമാനം വളർച്ചയാണ് രേഖപ്പെടുത്തിയത്.

സംസ്ഥാനങ്ങളിലെ കണക്കുകൾ പരിശോധിക്കുമ്പോൾ മഹാരാഷ്ട്ര, കർണാടക, ഗുജറാത്ത് തുടങ്ങിയ സംസ്ഥാനങ്ങൾ സ്ഥിരതയാർന്ന വളർച്ച തുടരുന്നു. ഉത്തർപ്രദേശ്, ഹരിയാന, കേരളം, തെലങ്കാന എന്നിവ മികച്ച മുന്നേറ്റം കാഴ്ചവെച്ചപ്പോൾ ബിഹാർ, അസം, പശ്ചിമ ബംഗാൾ, ജാർഖണ്ഡ് സംസ്ഥാനങ്ങളിൽ വരുമാനത്തിൽ ഇടിവ് രേഖപ്പെടുത്തി.

സാമ്പത്തിക വർഷാവസാന ലക്ഷ്യങ്ങൾ കൈവരിക്കാൻ സ്ഥാപനങ്ങളും നികുതി വകുപ്പുകളും ശക്തമായ നടപടികൾ സ്വീകരിക്കുന്നതിനാൽ ഏപ്രിലിൽ സാധാരണയായി ഉയർന്ന ജിഎസ്ടി വരുമാനം രേഖപ്പെടാറുണ്ട്. അതിനാൽ വരാനിരിക്കുന്ന മാസങ്ങളിൽ സമാഹരണത്തിൽ നേരിയ കുറവ് സംഭവിക്കാമെന്ന വിലയിരുത്തലും നിലനിൽക്കുന്നു.