ന്യൂഡൽഹി/ദോഹ : ഇന്ത്യയും ഗൾഫ് സഹകരണ കൗൺസിലും (GCC) തമ്മിലുള്ള തന്ത്രപരമായ സാമ്പത്തിക ബന്ധം കൂടുതൽ കരുത്തുറ്റതാക്കുന്നതിന്റെ ഭാഗമായി, സമഗ്രമായ സ്വതന്ത്ര വ്യാപാര കരാറിനായുള്ള (FTA) ചർച്ചകൾക്ക് ഔദ്യോഗിക തുടക്കമായി. ന്യൂഡൽഹിയിൽ നടന്ന ചടങ്ങിൽ ജിസിസി സെക്രട്ടറി ജനറൽ ജാസെം മുഹമ്മദ് അൽ-ബുദൈവിയും ഇന്ത്യൻ കേന്ദ്ര വാണിജ്യ-വ്യവസായ മന്ത്രി പിയൂഷ് ഗോയലും സംയുക്ത പ്രസ്താവനയിൽ ഒപ്പുവെച്ചു.
പ്രധാന ലക്ഷ്യങ്ങളും മേഖലകളും:
ഇന്ത്യയും ജിസിസി രാജ്യങ്ങളും തമ്മിലുള്ള ബന്ധത്തിലെ പുതിയൊരു ഘട്ടത്തിനാണ് ഇതോടെ തുടക്കമായിരിക്കുന്നത്.
ചരക്ക് സേവന വ്യാപാരത്തിലെ തടസ്സങ്ങൾ നീക്കുക, കസ്റ്റംസ് നടപടികൾ ലഘൂകരിക്കുക,ഡിജിറ്റൽ ട്രേഡ്, ഐടി, ഇന്നൊവേഷൻ എന്നിവയിലെ സഹകരണം,ഊർജ്ജ മേഖലയിലെ പങ്കാളിത്തവും ഭക്ഷ്യസുരക്ഷ ഉറപ്പാക്കുന്നതിനുള്ള നടപടികളും,ചെറുകിട, ഇടത്തരം സംരംഭങ്ങളെ പ്രോത്സാഹിപ്പിക്കുകഎന്നിവയ്ക്ക് മുൻഗണനനൽകും.ഇന്ത്യയുടെ ബൃഹത്തായ വിപണിയും സാങ്കേതിക മികവും ജിസിസി രാജ്യങ്ങൾക്ക് വലിയ അവസരങ്ങൾ നൽകുന്നുണ്ടെന്ന് അൽ-ബുദൈവി വ്യക്തമാക്കി. താരിഫ് നിരക്കുകൾ കുറയ്ക്കുന്നതിലൂടെയും വ്യാപാര തടസ്സങ്ങൾ നീക്കുന്നതിലൂടെയും ഇരുഭാഗത്തിനും ഗുണകരമായ ഒരു കരാറാണ് ലക്ഷ്യമിടുന്നത്. ഫെബ്രുവരി 5-ന് തയ്യാറാക്കിയ രൂപരേഖയുടെ അടിസ്ഥാനത്തിലാണ് ചർച്ചകൾ പുരോഗമിക്കുക.
ഒപ്പിടൽ ചടങ്ങിന് ശേഷം നടന്ന ഉഭയകക്ഷി യോഗത്തിൽ പിയൂഷ് ഗോയലും അൽ-ബുദൈവിയും സാമ്പത്തിക-നിക്ഷേപ മേഖലകളിലെ സഹകരണം കൂടുതൽ വിപുലമാക്കുന്നതിനെക്കുറിച്ച് ചർച്ച ചെയ്തു.
