ന്യൂഡൽഹി: മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിനെതിരെ അസാധാരണ പ്രതിഷേധവുമായി ഇന്ത്യാ സഖ്യം. ഗ്യാനേഷ് കുമാറിന്റെ നേതൃത്വത്തിൽ നടന്ന സമഗ്ര വോട്ടർ പട്ടിക പരിഷ്കരണത്തിൽ (എസ്ഐആർ) വ്യാപക ക്രമക്കേടുകൾ നടന്നെന്ന ആരോപണവുമായി ‘ജനകീയ കുറ്റവിചാരണ’ സംഘടിപ്പിച്ചു. കോൺഗ്രസ് അധ്യക്ഷൻ മല്ലികാർജുൻ ഖർഗെയുടെ വസതിയിൽ നടന്ന പരിപാടിക്ക് മുൻ ലോക്‌സഭാ സ്പീക്കർ മീരാ കുമാർ നേതൃത്വം നൽകി. ലോക്‌സഭയിലെ നടപടിക്രമങ്ങൾക്ക് സമാനമായ രീതിയിലായിരുന്നു വിചാരണ സംഘടിപ്പിച്ചത്.

മുഖ്യ തിരഞ്ഞെടുപ്പ് കമ്മിഷണറെ പുറത്താക്കണമെന്ന പ്രമേയം ഖർഗെ അവതരിപ്പിച്ചു. ഇത് ഒരാളോടുള്ള വ്യക്തിപരമായ വിരോധത്തിന്റെ പേരിലുള്ള നീക്കമല്ലെന്നും രാജ്യത്തെ ജനാധിപത്യ സംവിധാനത്തെ സംരക്ഷിക്കാനുള്ള പോരാട്ടമാണെന്നും അദ്ദേഹം വ്യക്തമാക്കി. തിരഞ്ഞെടുപ്പ് കമ്മിഷൻ നിഷ്പക്ഷമായി പ്രവർത്തിക്കണമെന്നാണ് പ്രതിപക്ഷത്തിന്റെ ആവശ്യം. പ്രധാനമന്ത്രി നരേന്ദ്ര മോദിയുടെയും ആഭ്യന്തരമന്ത്രി അമിത് ഷായുടെയും നിർദേശങ്ങൾക്കനുസരിച്ചാണ് ഗ്യാനേഷ് കുമാർ പ്രവർത്തിക്കുന്നതെന്നും ഖർഗെ ആരോപിച്ചു.

ഗ്യാനേഷ് കുമാറിനെതിരെ ആറു പ്രധാന ആരോപണങ്ങളാണ് ഖർഗെ ഉന്നയിച്ചത്.

വോട്ടർ പട്ടിക പരിഷ്കരണത്തിൽ ക്രമക്കേട്: തിരഞ്ഞെടുപ്പ് അട്ടിമറിക്കാനുള്ള ഗൂഢാലോചന നടന്നുവെന്നാണ് ആദ്യ ആരോപണം. 13.2 കോടി വോട്ടർമാരുടെ വോട്ടവകാശം ഇല്ലാതാക്കിയ നടപടി രാജ്യത്തിനെതിരായ കുറ്റകൃത്യമാണെന്നും അദ്ദേഹം പറഞ്ഞു.

ഫോം 6ൽ മാറ്റം: പാർലമെന്റിന്റെ അനുമതിയില്ലാതെ വോട്ടർ പട്ടികയിൽ പേര് ചേർക്കുന്നതിനുള്ള ഫോം 6ൽ മാറ്റങ്ങൾ വരുത്തിയെന്നാണ് മറ്റൊരു ആരോപണം.

ആപ്ലിക്കേഷൻ ദുരുപയോഗം: ഇസിഐനെറ്റ് (ECINET) മൊബൈൽ ആപ്ലിക്കേഷൻ ഉപയോഗിച്ച് വോട്ടർ പട്ടികയുടെ നിയന്ത്രണം കൈക്കലാക്കിയെന്നും അർഹരായവരെ പട്ടികയിൽ ഉൾപ്പെടുത്തുന്നതും യഥാർഥ വോട്ടർമാരുടെ വോട്ടവകാശം സംരക്ഷിക്കുന്നതും തടസ്സപ്പെടുത്തിയെന്നും ഖർഗെ ആരോപിച്ചു.

മറ്റ് കമ്മിഷണർമാരുടെ അധികാരം കുറച്ചു: തിരഞ്ഞെടുപ്പ് കമ്മിഷനിലെ മൂന്നു അംഗങ്ങൾക്കും തുല്യമായ അവകാശങ്ങളുണ്ടെന്നിരിക്കെ മറ്റ് രണ്ട് കമ്മിഷണർമാരുടെ അഭിപ്രായങ്ങൾക്കും അധികാരങ്ങൾക്കും വിലങ്ങുതടിയിട്ടത് മുഖ്യ തിരഞ്ഞെടുപ്പ് കമ്മിഷണറാണെന്നും ഖർഗെ കുറ്റപ്പെടുത്തി.

രാഷ്ട്രീയ നേതൃത്വത്തിന്റെ സ്വാധീനം: പ്രധാനമന്ത്രി നരേന്ദ്ര മോദിയുടെയും ആഭ്യന്തരമന്ത്രി അമിത് ഷായുടെയും താൽപര്യങ്ങൾക്കനുസരിച്ചാണ് ഗ്യാനേഷ് കുമാർ പ്രവർത്തിക്കുന്നതെന്നാണ് മറ്റൊരു ആരോപണം.

വിശ്വാസവഞ്ചനയും നിയമലംഘനവും: രാജ്യത്തോടും ജനങ്ങളോടുമുള്ള വിശ്വാസം ലംഘിക്കുകയും നിയമവിരുദ്ധ നടപടികളിലൂടെ ക്രിമിനൽ ഗൂഢാലോചനയിൽ പങ്കാളിയാകുകയും ചെയ്തുവെന്നും ഖർഗെ ആരോപിച്ചു.

ജനാധിപത്യത്തിന്റെ അടിസ്ഥാന മൂല്യങ്ങൾക്കേറ്റ പ്രഹരമാണ് തിരഞ്ഞെടുപ്പ് കമ്മിഷന്റെ നടപടികളെന്ന് മീരാ കുമാർ പറഞ്ഞു. ലോകത്തിലെ ഏറ്റവും വലിയ ജനാധിപത്യ രാജ്യമായ ഇന്ത്യയുടെ തിരഞ്ഞെടുപ്പ് സംവിധാനത്തെ ലോകം ഉറ്റുനോക്കുകയാണ്. നിരവധി രാജ്യങ്ങൾ ഇന്ത്യൻ ജനാധിപത്യ മാതൃക പിന്തുടരുന്നുണ്ട്. തിരഞ്ഞെടുപ്പുകളുടെ വിശ്വാസ്യതയും കരുത്തുമാണ് ജനാധിപത്യത്തെ മുന്നോട്ടുനയിക്കുന്നതെന്നും അവർ വ്യക്തമാക്കി.

മുഖ്യ തിരഞ്ഞെടുപ്പ് കമ്മിഷണർക്കെതിരായ ആരോപണങ്ങൾ ഉന്നയിച്ചുകൊണ്ട് ഇന്ത്യാ സഖ്യം നടത്തിയ ഈ ജനകീയ കുറ്റവിചാരണ ദേശീയ രാഷ്ട്രീയത്തിൽ പുതിയ ചർച്ചകൾക്ക് വഴിതുറന്നിരിക്കുകയാണ്.