ഇന്ത്യ ലോകത്തെ നാലാമത്തെ വലിയ സമ്പദ്‌വ്യവസ്ഥയായി. രാജ്യാന്തര നാണ്യനിധിയുടെ (ഐഎംഎഫ്) രേഖകൾ അനുസരിച്ചു രാജ്യം ജപ്പാനെ മറികടന്നുവെന്ന് നിതി ആയോഗ് സിഇഒ ബി.വി.ആർ. സുബ്രഹ്മണ്യം വ്യക്തമാക്കി. കഴിഞ്ഞവർഷംവരെ പട്ടികയിൽ അഞ്ചാമതായിരുന്നു ഇന്ത്യ. ജപ്പാനെ പിന്തള്ളിയതോടെ ഇനി ഇന്ത്യക്ക് മുന്നിൽ അമേരിക്ക, ചൈന , ജർമനി എന്നീ രാജ്യങ്ങൾ മാത്രമാണുള്ളത്.
ഐഎംഎഫിന്റെ പുതിയ കണക്കുപ്രകാരം ഇന്ത്യയുടെ ജിഡിപി 4.187 ലക്ഷംകോടി യുഎസ് ഡോളറാണ്. ജപ്പാന്റേത് 4.186 ലക്ഷംകോടി ഡോളറും. ഇരുരാജ്യങ്ങളും തമ്മിൽ നേരിയ വ്യത്യാസമാണുള്ളത്. ചൈനയുടേതു 19.23 ലക്ഷംകോടി ഡോളറാണ്. ഒന്നാം സ്ഥാനത്തുള്ള അമേരിക്കയുടേതാകട്ടെ 30.51 ലക്ഷംകോടി ഡോളറും.
ഐഎംഎഫ് കഴിഞ്ഞ മാസം പ്രസിദ്ധീകരിച്ച വേൾഡ് ഇക്കണോമിക് ഔട്ട്‌ലോക് റിപ്പോർട്ടിൽ 2025–26 സാമ്പത്തിക വർഷം ഇന്ത്യ 6.2 ശതമാനം വളർച്ച കൈവരിക്കുമെന്നാണു വിലയിരുത്തൽ. അതേസമയം, ആഗോള വളർച്ച 2.5 ശതമാനം മാത്രമാണു പ്രതീക്ഷിക്കുന്നത്.
