മസ്കത്ത്: അവസാന പന്തുവരെ നീണ്ടുനിന്ന ആവേശപ്പോരാട്ടത്തിൽ പാക്കിസ്ഥാനെ ഒരു വിക്കറ്റിന് തകർത്ത് ഇന്ത്യയ്ക്ക് അണ്ടർ 19 ഏഷ്യാകപ്പ് കിരീടം. പാക്കിസ്ഥാൻ ഉയർത്തിയ 338 റൺസിന്റെ കൂറ്റൻ വിജയലക്ഷ്യം ഇന്നിങ്സിലെ അവസാന പന്തിൽ ഒൻപത് വിക്കറ്റ് നഷ്ടത്തിൽ ഇന്ത്യ മറികടന്നു. 26 പന്തിൽ പുറത്താകാതെ 49 റൺസ് നേടിയ മോഹിത് ഉൾവയാണ് ഇന്ത്യയുടെ അവിശ്വസനീയ വിജയത്തിലെ നായകൻ. അവസാന പന്തിൽ ലോങ് ഓഫിലൂടെ ബൗണ്ടറി പായിച്ചാണ് താരം ഇന്ത്യയെ കിരീടത്തിലേക്ക് നയിച്ചത്.

ആദ്യം ബാറ്റിങ്ങിൽ പാക്കിസ്ഥാൻ ഉയർത്തിയ 337 റൺസ് വിജയലക്ഷ്യം പിന്തുടർന്ന ഇന്ത്യയ്ക്ക് മികച്ച തുടക്കമാണ് ഓപ്പണർമാരായ ക്യാപ്റ്റൻ ലക്ഷ്യ റായ്ചന്ദാനിയും ആര്യവീർ സേവാഗും നൽകിയത്. ഇരുവരും ചേർന്ന് ഒന്നാം വിക്കറ്റിൽ 95 റൺസ് കൂട്ടിച്ചേർത്തു. 101 പന്തിൽ 80 റൺസെടുത്ത ലക്ഷ്യയും 61 പന്തിൽ 58 റൺസ് നേടിയ ആര്യവീറും അർധസെഞ്ചറി പൂർത്തിയാക്കി. എന്നാൽ ഇരുവരും പുറത്തായതോടെ ഇന്ത്യ സമ്മർദത്തിലായി.

പിന്നീടെത്തിയ ബാറ്റർമാർക്ക് വലിയ കൂട്ടുകെട്ടുകൾ സൃഷ്ടിക്കാനായില്ല. വി.കെ. വിനീത് 24 റൺസും അർജുൻ രാജ്പുത് 16 റൺസും നേടി മടങ്ങി. ഒൻപത് റൺസെടുത്ത യാഷ്ബർധൻ ചൗഹാനും 19 റൺസുമായി മുന്നേറിയ അന്വയ് ദ്രാവിഡും പുറത്തായതോടെ ഇന്ത്യയുടെ നില പരുങ്ങലിലായി. 37-ാം ഓവറിൽ അന്വയ് റണ്ണൗട്ടായതും തിരിച്ചടിയായി.

ഇതിനിടെ ഒരറ്റത്ത് ഉറച്ചുനിന്ന മനാൽ ചൗഹാൻ ഇന്ത്യയുടെ പ്രതീക്ഷകൾ നിലനിർത്തി. 32 പന്തിൽ 47 റൺസെടുത്ത താരം വാലറ്റത്തിനൊപ്പം ചേർന്ന് പോരാട്ടം തുടർന്നു. ആര്യൻ സവ്സാനി ഒൻപത് റൺസിനും കാവ്യ പരേഷ് പട്ടേൽ പൂജ്യത്തിനും പുറത്തായതോടെ ഇന്ത്യ വീണ്ടും പ്രതിസന്ധിയിലായി.

എന്നാൽ മോഹിത് ഉൾവ ക്രീസിലെത്തിയതോടെ മത്സരത്തിന്റെ ഗതി മാറി. മനാലിനൊപ്പം ചേർന്ന് താരം പാകിസ്ഥാന്റെ ബോളർമാരെ നേരിട്ടു. ഒൻപതാം വിക്കറ്റിൽ ഇരുവരും ചേർന്ന് 57 റൺസാണ് കൂട്ടിച്ചേർത്തത്. യൂത്ത് ഏകദിനത്തിൽ ഒൻപതാം വിക്കറ്റിൽ ഇന്ത്യയുടെ മികച്ച കൂട്ടുകെട്ടായി ഇത് മാറി.

അവസാന മൂന്ന് ഓവറിൽ ഇന്ത്യയ്ക്ക് ജയിക്കാൻ 30 റൺസ് വേണമെന്ന നിലയിലായിരുന്നു മത്സരം. 309 റൺസിൽ നിൽക്കെ മനാൽ ചൗഹാൻ പുറത്തായതോടെ ഇന്ത്യയുടെ പ്രതീക്ഷകൾക്ക് വീണ്ടും മങ്ങലേറ്റു. എന്നാൽ മുഹമ്മദ് സയ്യാമിന്റെ 49-ാം ഓവറിൽ ആദ്യ രണ്ട് പന്തുകളിൽ ഫോറും സിക്സും നേടി മോഹിത് ഇന്ത്യയെ വിജയത്തിലേക്ക് അടുപ്പിച്ചു. സി. വെങ്കടയും നിർണായക ബൗണ്ടറികളുമായി പിന്തുണ നൽകി.

അവസാന ഓവറിൽ ജയിക്കാൻ വേണ്ടിയിരുന്നത് എട്ട് റൺസ്. പാക് സ്പിന്നർ അഹമ്മദ് ഹുസൈന്റെ ആദ്യ അഞ്ച് പന്തുകളിൽ നിന്ന് ഇന്ത്യയ്ക്ക് നേടാനായത് അഞ്ച് റൺസ് മാത്രം. അവസാന പന്തിൽ മൂന്ന് റൺസ് കൂടി വേണ്ടിയിരിക്കെ മോഹിത് ഉൾവ ലോങ് ഓഫിലേക്ക് പന്ത് അതിർത്തി കടത്തി. ഇതോടെ ഇന്ത്യയ്ക്ക് അവിശ്വസനീയമായ ഒരു വിക്കറ്റ് വിജയം.

പാക്കിസ്ഥാനായി ഉസ്മാൻ ഖാന്റെ സെഞ്ചറി

നേരത്തെ ടോസ് നേടി ബാറ്റിങ് തിരഞ്ഞെടുത്ത പാക്കിസ്ഥാൻ നിശ്ചിത 50 ഓവറിൽ ഒൻപത് വിക്കറ്റ് നഷ്ടത്തിൽ 337 റൺസെടുത്തു. ഓപ്പണർ ഉസ്മാൻ ഖാന്റെ സെഞ്ചറിയും അബ്ദുൽ ഖാദിറിന്റെയും ക്യാപ്റ്റൻ ഫർഹാൻ യൂസഫിന്റെയും അർധസെഞ്ചറികളുമാണ് പാക്കിസ്ഥാന് മികച്ച സ്കോർ സമ്മാനിച്ചത്.

111 പന്തിൽ 107 റൺസെടുത്ത ഉസ്മാൻ ഖാൻ ഇന്ത്യൻ ബോളർമാർക്ക് വലിയ വെല്ലുവിളിയാണ് ഉയർത്തിയത്. 54 പന്തിൽ 80 റൺസുമായി അബ്ദുൽ ഖാദിറും 60 പന്തിൽ 63 റൺസുമായി ഫർഹാൻ യൂസഫും തിളങ്ങി.

ഓപ്പണർമാരായ ഉസ്മാൻ ഖാനും ഹയം ഖാനും ചേർന്ന് 62 റൺസിന്റെ കൂട്ടുകെട്ടാണ് പടുത്തുയർത്തിയത്. 21 റൺസെടുത്ത ഹയം ഖാനെ പുറത്താക്കി കാവ്യ പട്ടേൽ ഇന്ത്യയ്ക്ക് ആദ്യ വിക്കറ്റ് സമ്മാനിച്ചു. തുടർന്ന് ഉസ്മാനും അബ്ദുൽ ഖാദിറും ചേർന്ന് പാക്കിസ്ഥാന്റെ സ്കോർ ഉയർത്തി. രണ്ടാം വിക്കറ്റിൽ ഇരുവരും 135 റൺസ് കൂട്ടിച്ചേർത്തു. പാക്കിസ്ഥാന്റെ സ്കോർ 197ൽ എത്തിയപ്പോഴാണ് അർജുൻ രാജ്പുത് അബ്ദുൽ ഖാദിറിനെ പുറത്താക്കിയത്.

തുടർന്നും ആക്രമണോത്സുക ബാറ്റിങ് തുടർന്ന ഉസ്മാൻ 46 പന്തിൽ അർധസെഞ്ചറിയും 35-ാം ഓവറിൽ സെഞ്ചറിയും പൂർത്തിയാക്കി. ടൂർണമെന്റിലെ താരത്തിന്റെ രണ്ടാം സെഞ്ചറിയായിരുന്നു ഇത്. 11 ഫോറും മൂന്ന് സിക്സും ഉൾപ്പെട്ട ഇന്നിങ്സിനാണ് കാവ്യ പട്ടേൽ വിരാമമിട്ടത്.

പിന്നീട് ക്യാപ്റ്റൻ ഫർഹാൻ യൂസഫ് പാക്കിസ്ഥാന്റെ സ്കോർ 300 കടത്തി. എന്നാൽ അവസാന ഓവറുകളിൽ ഇന്ത്യൻ ബോളർമാർ ശക്തമായി തിരിച്ചെത്തി. അവസാന ആറ് ഓവറുകളിൽ ആറ് വിക്കറ്റുകൾ വീഴ്ത്തിയ ഇന്ത്യ പാക്കിസ്ഥാനെ 350 റൺസ് കടക്കുന്നതിൽ നിന്ന് തടഞ്ഞു. കാവ്യ പട്ടേൽ നാല് വിക്കറ്റും ചിഗുരുപാട്ടി വെങ്കട മൂന്ന് വിക്കറ്റും സ്വന്തമാക്കി. ഒടുവിൽ അവസാന പന്തിലെ ത്രില്ലർ ജയത്തോടെ ഇന്ത്യ ഏഷ്യാകപ്പ് കിരീടവും സ്വന്തമാക്കി.