ഇന്ത്യ ഇന്ന് 79-ാമത് സ്വാതന്ത്ര്യദിനം ആഘോഷിക്കുന്നു. സ്വാതന്ത്ര്യദിനാഘോഷങ്ങളുടെ ഭാഗമായി പ്രധാനമന്ത്രി നരേന്ദ്രമോദി ഇന്ന് ഡൽഹിയിലെ ചെങ്കോട്ടയിൽ ദേശീയ പതാക ഉയർത്തും. ചെങ്കോട്ടയിൽ നടക്കുന്ന സ്വാതന്ത്ര്യദിനാഘോഷത്തിൽ പതാക ഉയർത്തലിന് പുറമേ ആചാരപരമായ ഗാർഡ് ഓഫ് ഓണർ, 21 വെടിയുണ്ടകളുടെ സല്യൂട്ട്, പ്രധാനമന്ത്രിയുടെ പ്രസംഗം എന്നിവ ഉൾപ്പെടും.
പ്രധാനമന്ത്രി, പ്രതിരോധ മന്ത്രി, പ്രതിരോധ സെക്രട്ടറി, സായുധ സേനാ മേധാവികൾ എന്നിവരുൾപ്പെടെ ഉന്നത വ്യക്തികൾ ആഘോഷങ്ങളിൽ പങ്കെടുക്കും. സ്വാതന്ത്ര്യദിനാഘോഷത്തിൽ അയ്യായിരത്തോളം വിശിഷ്ടാതിഥികളെയും ക്ഷണിച്ചിട്ടുണ്ട്. സ്വാതന്ത്ര്യദിനാഘോഷങ്ങളുടെ ഭാഗമായി രാജ്യമെങ്ങും വിപുലമായ ആഘോഷങ്ങളാണ് സംഘടിപ്പിക്കുന്നത്. കനത്ത സുരക്ഷയിലാണ് രാജ്യം.
നവഭാരതം എന്നതാണ് ഇത്തവണത്തെ ആഘോഷങ്ങളുടെ പ്രമേയം. ഓപ്പറേഷൻ സിന്ദൂർ വിജയാഘോഷവുമുണ്ടാകും. പ്രധാനമന്ത്രിയായി ചെങ്കോട്ടയിൽനിന്നുള്ള നരേന്ദ്രമോദിയുടെ പന്ത്രണ്ടാമത്തെ സ്വാതന്ത്ര്യദിനപ്രസംഗമാണ് ഇന്നത്തേത്.
