കൊച്ചി:  പ്രമുഖ ബാങ്കിംഗ് ഇതര ധനകാര്യ കമ്പനിയായ ഇന്‍ഡല്‍ മണിയുടെ സാമ്പത്തിക വര്‍ഷം രണ്ടാം പാദത്തിലെ നികുതിക്കു ശേഷമുള്ള ലാഭം 79.98 കോടി രൂപയായി ഉയര്‍ന്നു. മുന്‍വര്‍ഷത്തെയപേക്ഷിച്ച് 222 ശതമാനം വളര്‍ച്ചയാണ് രേഖപ്പെടുത്തിയത്.

2026 സെപ്തംബറില്‍ അവസാനിച്ച സാമ്പത്തിക വര്‍ഷം ഒന്നാം പകുതിയിലെ  നികുതിക്കു ശേഷമുള്ള ലാഭം 107.62 കോടി രൂപയാണ്. മുന്‍വര്‍ഷത്തെയപേക്ഷിച്ച് 121 ശതമാനം അര്‍ധ വാര്‍ഷിക വളര്‍ച്ചയാണ്  കമ്പനി നേടിയത്.  കൈകാര്യം ചെയ്യുന്ന മൊത്തം ആസ്തി (AUM ) 83 ശതമാനം വളര്‍ന്ന് 5015 കോടി രൂപയായി. അറ്റാദായം മുന്‍വര്‍ഷത്തെയപേക്ഷിച്ച് 111 ശതമാനം ഉയര്‍ന്ന് 159.81 കോടി രൂപയിലെത്തി.  പലിശയില്‍ നിന്നുള്ള മൊത്ത വരുമാനം 118 ശതമാനം ഉയര്‍ന്ന് 145 കോടി രൂപയായി.

സ്വര്‍ണ്ണവായ്പ എന്‍ബിഎഫ്‌സിയായ കമ്പനിയുടെ പ്രീപ്രൊവിഷന്‍ ഓപറേറ്റിംഗ് ലാഭം (PPOP ) 182 ശതമാനം വളര്‍ച്ചയോടെ 98.95 കോടി രൂപയിലെത്തി. നിഷ്്ക്രിയ ആസ്തി വെറും 1.41 ശതമാനം മാത്രമാണ്. മുന്‍ പാദത്തിലേതിനേക്കാള്‍ കുറവാണിത്.  

രണ്ടാം പാദത്തിലെ കമ്പനിയുടെ ആസ്തി നേട്ടം 6.85 ശതമാനവും അര്‍ധ വര്‍ഷത്തിലേത് 4.85 ശതമാനവും  CRAR അനുപാതം 22.20 ശതമാനവുമാണ്.  നിയമപരമായി 15 ശതമാനം മാത്രമാണ് ഈയിനത്തില്‍ ആവശ്യമുള്ളത്. ഓഹരികളാക്കി മാറ്റാനാവാത്ത കടപ്പത്രങ്ങളിലൂടെ ( NCD  ) യും വായ്പകളിലൂടെയും രണ്ടാം പാദത്തില്‍ കമ്പനി 1496 കോടി രൂപയും അര്‍ധ വര്‍ഷം 2,220 കോടി രൂപയും  സംഭരിച്ചു. രണ്ടാം പാദത്തില്‍ 2,480 കോടി രൂപയുടേയും അര്‍ധ വര്‍ഷം 4,500 കോടിയോളം രൂപയുടേയും  വായ്പകള്‍ വിതരണം ചെയ്തിട്ടുണ്ട്. മൂന്നു മാസത്തിനിടെ പുതുതായി 17 ശാഖകള്‍ തുറന്നതോടെ മൊത്തം ശാഖകളുടെ എണ്ണം 427 ആയി ഉയര്‍ന്നു.

കഴിഞ്ഞ ഏതാനും പാദങ്ങളിലായി കമ്പനി കൈവരിച്ച വളര്‍ച്ചയുടെ തുടര്‍ച്ചയാണ് ഈ കുതിപ്പെന്ന്  ഇന്‍ഡല്‍ മണി എക്‌സിക്യൂട്ടീവ് ഡയറക്ടറും സിഇഒയുമായ ഉമേഷ് മോഹനന്‍ പറഞ്ഞു. ലാഭത്തിലുണ്ടായ ഗണ്യമായ വളര്‍ച്ചയും കൈകാര്യം ചെയ്യുന്ന ആസ്തിയിലെ വര്‍ധനയും സൂചിപ്പിക്കുന്നത് കമ്പനിയുടെ പ്രവര്‍ത്തന വ്യാപ്തിയും ഇടപാടുകാര്‍ അര്‍പ്പിച്ച വിശ്വാസവുമാണ്. അദ്ദേഹം വിലയിരുത്തി.

Photo Courtesy - Google