ദോഹ: മിഡിൽ ഈസ്റ്റിലെ സംഘർഷം ആഗോള സമ്പദ്‌വ്യവസ്ഥയെ തളർത്തുന്ന സാഹചര്യത്തിൽ, വികസ്വര രാജ്യങ്ങൾ സ്വീകരിക്കേണ്ട അടിയന്തിര മുൻകരുതലുകളെക്കുറിച്ച് അന്താരാഷ്ട്ര നാണയ നിധി (IMF) മേധാവി ക്രിസ്റ്റലീന ജോർജിയേവ വ്യക്തമായ നിർദ്ദേശങ്ങൾ മുന്നോട്ടുവെച്ചു. രാജ്യങ്ങൾ തങ്ങളുടെ സാമ്പത്തിക അടിത്തറ ഭദ്രമാക്കണമെന്നതാണ് പ്രധാന മുന്നറിയിപ്പ്.വിദേശ നാണയ ശേഖരം (Foreign Exchange Reserves) വർധിപ്പിക്കുന്നത് ആഗോള സാമ്പത്തിക ആഘാതങ്ങളെ പ്രതിരോധിക്കാൻ സഹായിക്കും. അതോടൊപ്പം തന്നെ ബാങ്കുകളും മറ്റ് സാമ്പത്തിക സ്ഥാപനങ്ങളും കൂടുതൽ കരുത്തുറ്റതാക്കണമെന്നും അവർ നിർദ്ദേശിച്ചു.
വിപണിയിലെ ഏറ്റക്കുറച്ചിലുകൾക്ക് അനുസൃതമായി കറൻസി മൂല്യത്തിൽ മാറ്റങ്ങൾ വരുത്താൻ അനുവദിക്കണം. അത്യന്താപേക്ഷിതമായ സാഹചര്യങ്ങളിൽ മാത്രമേ വിദേശ നാണയ വിപണിയിൽ സർക്കാർ ഇടപെടാൻ പാടുള്ളൂ.അപ്രതീക്ഷിതമായി ഉണ്ടാകുന്ന വലിയ സാമ്പത്തിക ആഘാതങ്ങളെ (Economic Shocks) നേരിടാൻ രാജ്യത്തെ സാമ്പത്തിക സംവിധാനങ്ങൾ സജ്ജമാണോ എന്ന് ഉറപ്പുവരുത്തണം.യുദ്ധം മൂലമുണ്ടാകുന്ന പ്രത്യാഘാതങ്ങൾ കുറയ്ക്കാൻ ലോകരാഷ്ട്രങ്ങൾ ഒന്നിച്ചുനിൽക്കണം. സാമ്പത്തികമായി പ്രയാസം നേരിടുന്ന രാജ്യങ്ങളെ സഹായിക്കാൻ നിലവിലുള്ള വായ്പാ പദ്ധതികൾ വിപുലീകരിക്കാൻ ഐ.എം.എഫ് തയ്യാറാണെന്നും ജോർജിയേവ കൂട്ടിച്ചേർത്തു.ആഗോള വിപണികളിൽ വിശ്വാസം വീണ്ടെടുക്കുന്നതിനും സാമ്പത്തിക സ്ഥിരത ഉറപ്പാക്കുന്നതിനും പ്രമുഖ രാജ്യങ്ങൾ തമ്മിലുള്ള നയപരമായ ഏകോപനം അനിവാര്യമാണെന്ന് ക്രിസ്റ്റലീന ജോർജിയേവവ്യക്തമാക്കി
