ന്യൂഡൽഹി: മുഖ്യ തിരഞ്ഞെടുപ്പ് കമ്മിഷണർ ഏകപക്ഷീയമായി തീരുമാനങ്ങൾ കൈക്കൊള്ളുന്നുവെന്ന ആരോപണങ്ങളിൽ സുപ്രീം കോടതി വിശദമായ പരിശോധന നടത്തും. ക്രിമിനൽ നടപടി നേരിടുന്നതിൽ നിന്ന് മുഖ്യ തിരഞ്ഞെടുപ്പ് കമ്മിഷണർക്ക് പരിരക്ഷ നൽകുന്ന വ്യവസ്ഥയുടെ ഭരണഘടനാ സാധുതയും പരിശോധിക്കുമെന്ന് ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ച് വ്യക്തമാക്കി.

തിരഞ്ഞെടുപ്പ് കമ്മിഷനെതിരായ വിവിധ ഹർജികളിൽ മറുപടി തേടി സുപ്രീം കോടതി നോട്ടിസ് അയച്ചു. ഏകപക്ഷീയമായ തീരുമാനങ്ങൾ തടയാൻ ഇടക്കാല ഉത്തരവ് പുറപ്പെടുവിക്കണമെന്ന ഹർജിക്കാരുടെ ആവശ്യം കോടതി അംഗീകരിച്ചില്ല. എന്നാൽ തീരുമാനങ്ങൾ ഏകപക്ഷീയമായാണ് എടുത്തതെന്ന് പരിശോധനയിൽ ബോധ്യപ്പെട്ടാൽ അവ റദ്ദാക്കാൻ മടിക്കില്ലെന്ന് ബെഞ്ചിലെ ജസ്റ്റിസ് ജോയ്മല്യ ബാഗ്ചി വ്യക്തമാക്കി.

ഫോം 6ലെ മാറ്റത്തിൽ കോടതി നിലപാട് വ്യക്തമാക്കി

ഫോം 6ൽ വരുത്തിയ ഭേദഗതിക്ക് സുപ്രീം കോടതി അംഗീകാരം നൽകിയിട്ടില്ലെന്നും ബെഞ്ച് പ്രത്യേകം വ്യക്തമാക്കി. ഡൽഹിയിലെ എസ്ഐആർ നടപടികളുമായി ബന്ധപ്പെട്ട വിഷയങ്ങൾ ഹർജിക്കാരിലൊരാൾക്കായി ഹാജരായ അഭിഭാഷക മേനക ഗുരുസ്വാമി കോടതിയുടെ ശ്രദ്ധയിൽപ്പെടുത്തിയപ്പോഴായിരുന്നു പരാമർശം.

ഫോം 6ൽ രണ്ട് അധിക വ്യവസ്ഥകൾ ഉൾപ്പെടുത്തിയെന്നും പരിഷ്കരിച്ച ഫോം 6 ആണ് ഇപ്പോൾ ഉപയോഗിക്കുന്നതെന്നും മേനക ഗുരുസ്വാമി ചൂണ്ടിക്കാട്ടി. ജനപ്രാതിനിധ്യ നിയമപ്രകാരം ഇത്തരത്തിൽ ഫോം 6 മാറ്റാൻ കഴിയില്ലെന്നും അവർ വാദിച്ചു. ഇതോടെയാണ് ഫോമിലെ മാറ്റത്തിന് തങ്ങളുടെ അംഗീകാരം ഉണ്ടായിരുന്നില്ലെന്ന് സുപ്രീം കോടതി വ്യക്തമാക്കിയത്.

നീതിപൂർവവും സുതാര്യവുമായ തിരഞ്ഞെടുപ്പുകളിലൂടെയാണ് രാജ്യം മുന്നോട്ടുപോയതെന്നും ഇപ്പോഴത്തെ സാഹചര്യത്തിൽ അത് സംഭവിക്കുന്നില്ലെന്നും മേനക ഗുരുസ്വാമി വാദിച്ചു. എസ്ഐആർ നടപടിയിലൂടെ വോട്ടവകാശം ഭീഷണി നേരിടുകയാണെന്നും മുഖ്യ തിരഞ്ഞെടുപ്പ് കമ്മിഷണറുടെ ഭാഗത്തുനിന്ന് പക്ഷപാതപരമായ സമീപനമുണ്ടെന്നും അവർ ആരോപിച്ചു.

‘കേസിനെക്കുറിച്ച് ഞങ്ങൾക്ക് ബോധ്യമുണ്ട്’

ഹർജികളിലെ വിഷയങ്ങൾ വിശദമായി പഠിച്ചാണ് കോടതി പരിഗണിക്കുന്നതെന്ന് ചീഫ് ജസ്റ്റിസ് സൂര്യകാന്ത് വ്യക്തമാക്കി. ‘‘ഞങ്ങളും ഗൃഹപാഠം ചെയ്താണ് വരുന്നത്. കേസിനെക്കുറിച്ച് ഞങ്ങൾക്ക് ബോധ്യമുണ്ട്’’ എന്നായിരുന്നു ചീഫ് ജസ്റ്റിസിന്റെ പ്രതികരണം.

മുഖ്യ തിരഞ്ഞെടുപ്പ് കമ്മിഷണർ ഏകപക്ഷീയമായി പ്രവർത്തിക്കുന്നുവെന്ന ആരോപണങ്ങൾ അഭിഭാഷകൻ വികാസ് സിങ്ങും ഉന്നയിച്ചു. 2023ലെ നിയമത്തിലെ വ്യവസ്ഥകളിലെ പഴുതുകളും അദ്ദേഹം ചൂണ്ടിക്കാട്ടി. മാധ്യമ റിപ്പോർട്ടുകൾക്ക് പിന്നാലെ തിരഞ്ഞെടുപ്പ് കമ്മിഷൻ പുറത്തിറക്കിയ പത്രക്കുറിപ്പ് തന്നെ ഉയർന്നുവന്ന ആരോപണങ്ങൾക്ക് സ്ഥിരീകരണമാണെന്നും വികാസ് സിങ് വാദിച്ചു.

തിരഞ്ഞെടുപ്പ് കമ്മിഷനിലെ തീരുമാനമെടുക്കൽ നടപടികളുമായി ബന്ധപ്പെട്ട വിവിധ ഹർജികൾ സുപ്രീം കോടതി ഒരുമിച്ച് പരിഗണിക്കുന്നതിനായി മാറ്റി. ഏകപക്ഷീയമായ തീരുമാനങ്ങൾ തടയാൻ അടിയന്തര ഇടക്കാല ഉത്തരവ് വേണമെന്ന ആവശ്യം ഹർജിക്കാർ വീണ്ടും ഉന്നയിച്ചെങ്കിലും അതിൽ കോടതി തൽക്കാലം അനുകൂല നിലപാട് സ്വീകരിച്ചില്ല.