ന്യൂഡൽഹി: വ്യാജരേഖ ഉപയോഗിച്ച് സാമ്പത്തികമോ മറ്റെന്തെങ്കിലുമോ ആയ നേട്ടമുണ്ടാക്കിയിട്ടില്ലെങ്കിൽ വഞ്ചനാക്കുറ്റം ചുമത്താനാവില്ലെന്ന് സുപ്രീം കോടതി. ഇന്ത്യൻ ശിക്ഷാ നിയമത്തിലെ 420, 468, 471 വകുപ്പുകൾ പ്രകാരം വഞ്ചനാക്കുറ്റം ചുമത്തണമെങ്കിൽ വ്യാജരേഖ ഒരു നേട്ടമുണ്ടാക്കാൻ കാരണമായെന്ന് തെളിയിക്കണമെന്നും കോടതി വ്യക്തമാക്കി.
ജുപ്പള്ളി ലക്ഷ്മികാന്ത റെഡ്ഡിക്ക് അനുകൂലമായി പുറപ്പെടുവിച്ച വിധിയിലാണ് കോടതി ഇക്കാര്യം വ്യക്തമാക്കിയത്. ഒരു വിദ്യാഭ്യാസ സ്ഥാപനത്തിന് അംഗീകാരം ലഭിച്ചതുമായി ബന്ധപ്പെട്ട കേസിലാണ് വിധി. സ്ഥാപനത്തിന് വിദ്യാഭ്യാസ വകുപ്പ് അംഗീകാരം നൽകിയത്, കേസിലെ പ്രതി ഹാജരാക്കിയ എൻഒസി (നോ ഒബ്ജക്ഷൻ സർട്ടിഫിക്കറ്റ്) പരിഗണിച്ചല്ലെന്ന് കോടതി കണ്ടെത്തി. അതുകൊണ്ടുതന്നെ, വ്യാജരേഖ നൽകിയതിലൂടെ പ്രതിക്ക് ഒരു നേട്ടവും ലഭിച്ചിട്ടില്ലെന്നും കോടതി നിരീക്ഷിച്ചു.
വ്യാജരേഖ ചമച്ചതിലൂടെ സ്ഥാപനത്തിന് അനുകൂലമായ തീരുമാനം എടുക്കാൻ അധികാരികളെ പ്രേരിപ്പിച്ചില്ലാത്തതിനാൽ "വഞ്ചിക്കാനുള്ള ദുരുദ്ദേശ്യം" ഉണ്ടായിരുന്നില്ലെന്നും കോടതി വ്യക്തമാക്കി. ഈ കാരണങ്ങളാൽ, റെഡ്ഡിക്ക് എതിരായ അപ്പീൽ തള്ളിക്കൊണ്ട് കോടതി അദ്ദേഹത്തിന് അനുകൂലമായ വിധി പുറപ്പെടുവിച്ചു.
