ദോഹ: ആധുനിക സാങ്കേതിക വിദ്യകളായ ആർട്ടിഫിഷ്യൽ ഇന്റലിജൻസും (AI) ഇന്റർനെറ്റ് ഓഫ് തിങ്‌സും (IoT) സംയോജിക്കുന്നത് ലോകത്തെ പുതിയൊരു ഡിജിറ്റൽ വിപ്ലവത്തിലേക്ക് നയിക്കുകയാണെന്ന് വിദഗ്ധർ. ഇന്ത്യൻ ഇൻസ്റ്റിറ്റ്യൂഷൻ ഓഫ് എഞ്ചിനീയേഴ്സ് (IEI) ഖത്തർ ചാപ്റ്റർ സംഘടിപ്പിച്ച “AI Transforming IoT Eco System” എന്ന വെബിനാറിലാണ് സാങ്കേതിക മേഖലയിലെ ഈ നൂതന മാറ്റങ്ങൾ ചർച്ചയായത്.
​ഖത്തറിലെ എഞ്ചിനീയറിംഗ് സമൂഹത്തിനായി സംഘടിപ്പിച്ച പരിപാടിയിൽ IEI ഖത്തർ ചാപ്റ്റർ ചെയർമാൻ അബ്ദുൽ സത്താർ അധ്യക്ഷത വഹിച്ചു. AI, IoT എന്നീ രണ്ട് ശക്തമായ സാങ്കേതിക വിദ്യകളുടെ സംഗമം നമ്മുടെ ജീവിതരീതികളെയും തൊഴിൽ മേഖലകളെയും പൂർണ്ണമായും മാറ്റിമറിക്കുകയാണെന്ന് അദ്ദേഹം പറഞ്ഞു.
ഇന്ത്യൻ എഞ്ചിനീയേഴ്സ് ഇൻസ്റ്റിറ്റ്യൂഷൻ പ്രസിഡന്റ് മനീഷ് മഹേന്ദ്ര കോത്താരി പരിപാടി ഉദ്ഘാടനം ചെയ്തു. സാങ്കേതിക മേഖലയിൽ വിപ്ലവകരമായ മാറ്റങ്ങൾ കൊണ്ടുവരാൻ AI-ക്ക് സാധിക്കുമെന്ന് അദ്ദേഹം ചൂണ്ടിക്കാട്ടി. ഖത്തറിലെയും മറ്റ് ജി.സി.സി രാജ്യങ്ങളിലെയും എഞ്ചിനീയർമാർക്കായി 15 വിവിധ എഞ്ചിനീയറിംഗ് ശാഖകളെ ഉൾപ്പെടുത്തിക്കൊണ്ട് സമഗ്രമായ 'AI അവബോധ പരിപാടി' സംഘടിപ്പിക്കുമെന്നും അദ്ദേഹം പ്രഖ്യാപിച്ചു. വെറും ഡാറ്റാ ശേഖരണത്തിനപ്പുറം, കാര്യങ്ങൾ മുൻകൂട്ടി പ്രവചിക്കാനും സ്വയം തീരുമാനങ്ങളെടുക്കാനും ശേഷിയുള്ള രീതിയിലേക്ക് സിസ്റ്റങ്ങൾ മാറിക്കഴിഞ്ഞുവെന്ന് അദ്ദേഹം കൂട്ടിച്ചേർത്തു.
ചടങ്ങിൽ പ്രത്യേക അതിഥിയായി പങ്കെടുത്ത സീനിയർ പെട്രോളിയം എഞ്ചിനീയർ എർ. ഖാലിദ് ഫഖ്രൂ, ഇന്ത്യയും ഖത്തറും തമ്മിലുള്ള 51 വർഷത്തെ സുദൃഢമായ ദ്വിപക്ഷ ബന്ധത്തെയും എഞ്ചിനീയറിംഗ് മേഖലയിൽ IEI നൽകുന്ന സംഭാവനകളെയും പ്രശംസിച്ചു.
​കർണാടക കോളാറിലെ CBIT പ്രിൻസിപ്പൽ ഡോ. ചന്ദ്രശേഖര എസ്.എൻ മുഖ്യപ്രഭാഷണം നടത്തി. വരും കാലത്ത് നവോത്ഥാനത്തിനും സാമൂഹിക സ്വാധീനത്തിനും AIoT (Artificial Intelligence of Things) വലിയ അവസരങ്ങൾ തുറന്നുനൽകുമെന്ന് അദ്ദേഹം വിശദീകരിച്ചു.
​എഞ്ചിനീയർ അബ്ദുൽ സമീർ സാബ് (സെക്രട്ടറി) സ്വാഗതവും എഞ്ചിനീയർ ആഷിക് (ട്രഷറർ) നന്ദിയും രേഖപ്പെടുത്തി. കഴിഞ്ഞ 36 വർഷമായി ഖത്തറിലെ എഞ്ചിനീയറിംഗ് മേഖലയുടെ വളർച്ചയ്ക്കായി പ്രവർത്തിക്കുന്ന IEI ഖത്തർ ചാപ്റ്റർ, വരും തലമുറയെ നൂതന സാങ്കേതിക വിദ്യകളിൽ പ്രാപ്തരാക്കാൻ ഇത്തരം സെമിനാറുകൾ തുടരുമെന്ന് ഭാരവാഹികൾ അറിയിച്ചു.