ജമ്മു കശ്മീരിനെ പാകിസ്ഥാന്റെ ഭാഗമായി ചിത്രീകരിക്കുന്ന ഭൂപടം പോസ്റ്റ് ചെയ്ത സംഭവത്തിൽ ഇസ്രയേൽ പ്രതിരോധ സേന ക്ഷമാപണം നടത്തി. അതിർത്തികളെ കൃത്യമായി ചിത്രീകരിക്കുന്നതിൽ പരാജയപ്പെട്ടെന്നും ആ ചിത്രം മൂലമുണ്ടായ എല്ലാ പ്രശ്നങ്ങൾക്കും ക്ഷമ ചോദിക്കുന്നു എന്നുമാണ് ഇസ്രയേൽ സൈന്യത്തിന്റെ പ്രതികരണം. എക്സിൽ പങ്കുവെച്ച കുറിപ്പിലാണ് ഇസ്രയേൽ സൈന്യം ക്ഷമ പറഞ്ഞത്.
'പോസ്റ്റ് ആ പ്രദേശത്തിന്റെ ഒരു ചിത്രീകരണമാണ്. ഈ ഭൂപടം അതിർത്തികളെ കൃത്യമായി ചിത്രീകരിക്കുന്നതിൽ പരാജയപ്പെട്ടു. ഈ ചിത്രം മൂലമുണ്ടായ എല്ലാ പ്രശ്നങ്ങൾക്കും ഞങ്ങൾ ക്ഷമ ചോദിക്കുന്നു' ഇസ്രയേൽ പ്രതിരോധ സേന എക്സിൽ കുറിച്ചു.
ഇറാൻ ഒരു ആഗോള ഭീഷണിയാണെന്ന് ചൂണ്ടിക്കാട്ടിയുള്ള ഭൂപടത്തിലാണ് കശ്മീരിനെ പാകിസ്ഥാന്റെ ഭാഗമായി ചിത്രീകരിച്ചിരുന്നത്. ഇറാന്റെ സമീപപ്രദേശങ്ങളെയും ഭൂപടത്തിൽ ഉൾക്കൊള്ളിച്ചിരുന്നു. ഈ മാപ്പിലാണ് ഇസ്രയേൽ സേന ഇന്ത്യൻ പ്രദേശത്തെ തെറ്റായി നൽകിയത്. ഇതിനെതിരെ വ്യാപക പ്രതിഷേധമുയർന്നിരുന്നു. ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിനെ അടക്കം ടാഗ് ചെയ്തുകൊണ്ട് എക്‌സിലൂടെയായിരുന്നു പ്രതിഷേധങ്ങൾ. അതേസമയം കേന്ദ്ര സർക്കാരിന്റെ ഭാഗത്ത് നിന്ന് ഇതുസംബന്ധിച്ച് യാതൊരു പ്രതികരണവും ഉണ്ടായിരുന്നില്ല.
