ദോഹ, ഖത്തർ

ഖത്തറിലെ ഇന്ത്യൻ പ്രവാസി സമൂഹത്തിനായി സമർപ്പിത സേവനങ്ങൾ തുടർന്നുകൊണ്ടിരിക്കുന്ന ഇന്ത്യൻ കമ്മ്യൂണിറ്റി ബിനവലന്റ് ഫോറം (ICBF), ഹമദ് മെഡിക്കൽ കോർപ്പറേഷൻ (HMC) സഹകരണത്തോടെ ഖത്തർ നാഷണൽ ബ്ലഡ് ഡൊണേഷൻ സെന്ററിൽ തുടർച്ചയായ രണ്ടാം മാസവും രക്ത പ്ലേറ്റ്‌ലെറ്റ് ദാന ക്യാമ്പ് വിജയകരമായി സംഘടിപ്പിച്ചു. രക്ത പ്ലേറ്റ്‌ലെറ്റ് ദാനത്തിന്റെ അത്യന്താപേക്ഷിതമായ പ്രാധാന്യത്തെക്കുറിച്ച് പൊതുജനങ്ങളിൽ അവബോധം സൃഷ്ടിക്കുന്നതിനും ഈ ജീവൻ രക്ഷാ പ്രവർത്തനത്തിൽ കൂടുതൽ ആളുകളെ പങ്കാളികളാക്കുന്നതിനുമാണ് ഈ ക്യാമ്പ് സംഘടിപ്പിച്ചത്.

കാൻസർ ചികിത്സയിലുള്ള രോഗികൾക്കും, അവയവമാറ്റ ശസ്ത്രക്രിയയ്ക്ക് വിധേയരാകുന്നവർക്കും, വലിയ ശസ്ത്രക്രിയകൾക്ക് വിധേയരാകുന്നവർക്കും, രക്ത സംബന്ധമായ രോഗങ്ങളും ഗുരുതരമായ പരിക്കുകളും മൂലം ചികിത്സയിൽ കഴിയുന്നവർക്കും പ്ലേറ്റ്‌ലെറ്റുകൾ അനിവാര്യമാണ്. പ്ലേറ്റ്‌ലെറ്റുകൾക്ക് വളരെ കുറഞ്ഞ കാലാവധിയുള്ളതിനാൽ, ആവശ്യമായ അളവിൽ അവയുടെ ലഭ്യത ഉറപ്പാക്കാൻ സന്നദ്ധരായ ദാതാക്കളുടെ തുടർച്ചയായ പിന്തുണ അനിവാര്യമാണ്. ജീവൻ രക്ഷിക്കുന്നതിലും ഖത്തറിലെ ആരോഗ്യസംരക്ഷണ സംവിധാനത്തെ ശക്തിപ്പെടുത്തുന്നതിലും സന്നദ്ധ ദാതാക്കൾ വഹിക്കുന്ന വിലമതിക്കാനാവാത്ത പങ്കാണ് ഈ ബോധവൽക്കരണ ക്യാമ്പയിൻ ഉയർത്തിക്കാട്ടിയത്.

ഇന്ത്യയിലെ വിവിധ സംസ്ഥാനങ്ങളിൽ നിന്നുള്ള 60-ലധികം സന്നദ്ധ പ്രവർത്തകർ പ്ലേറ്റ്‌ലെറ്റ് ദാനത്തിനായി മുന്നോട്ടുവന്നു. ഇന്ത്യൻ സമൂഹത്തിന്റെ സേവന മനോഭാവത്തിന്റെയും മാനവിക പ്രതിബദ്ധതയുടെയും ഉത്തമ ഉദാഹരണമായി ഈ പങ്കാളിത്തം മാറി.

ഔദ്യോഗിക ചടങ്ങിൽ ഐസിബിഎഫ് പ്രസിഡന്റ് ശ്രീ ഷാനവാസ് ബാവ അധ്യക്ഷ പ്രസംഗം നടത്തി. സ്ഥിരമായി പ്ലേറ്റ്‌ലെറ്റ് ദാന ക്യാമ്പുകൾ സംഘടിപ്പിക്കുന്ന ഐ.സി.ബി.എഫിന്റെ ഈ സവിശേഷ സംരംഭത്തിന്റെ പ്രാധാന്യം അദ്ദേഹം വിശദീകരിച്ചു. സന്നദ്ധ ദാതാക്കളുടെ ആവേശകരമായ പങ്കാളിത്തത്തെ അദ്ദേഹം അഭിനന്ദിക്കുകയും, സമൂഹത്തിന്റെ തുടർച്ചയായ സഹകരണത്തിലൂടെ ഇത്തരം ജീവൻ രക്ഷാ പ്രവർത്തനങ്ങൾ കൂടുതൽ ശക്തിപ്പെടുത്തേണ്ടതിന്റെ ആവശ്യകത ഊന്നിപ്പറയുകയും ചെയ്തു.
ജനറൽ സെക്രട്ടറി ശ്രീ ദീപക് ഷെട്ടി സ്വാഗതപ്രസംഗം നടത്തി. ഹെൽത്ത് വിങ് ഇൻചാർജ് ശ്രീമതി മിനി സിബി നന്ദിപ്രസംഗം നിർവഹിച്ചു. ചടങ്ങിൽ ഐ.സി.ബി.എഫ് അഡ്വൈസറി കൗൺസിൽ ചെയർമാൻ ശ്രീ കെ. എസ്. പ്രസാദ് പങ്കെടുത്ത്, ഈ മഹത്തായ ദൗത്യത്തിന് പിന്തുണ നൽകിയ സന്നദ്ധ ദാതാക്കളുടെ സേവനസന്നദ്ധതയെ അഭിനന്ദിച്ചു.

പരിപാടിയുടെ ഏകോപനം സെക്രട്ടറി ശ്രീ ജാഫർ തയിൽ നേതൃത്വം നൽകി. മാനേജിംഗ് കമ്മിറ്റി അംഗങ്ങളായ ശ്രീ മണി ഭാരതി, ശ്രീമതി നീലാംബരി എസ്., ശ്രീ അമർ വീർ സിംഗ്, ശ്രീ ഖാജ നിസാമുദ്ദീൻ, ശ്രീ ശങ്കർ ഗൗഡ്, ശ്രീ ഇർഫാൻ അൻസാരി എന്നിവർ പരിപാടിയുടെ വിജയകരമായ നടത്തിപ്പിനായി സജീവമായി പ്രവർത്തിച്ചു.

സമൂഹത്തിന്റെ ആരോഗ്യക്ഷേമത്തിനും ജീവൻ രക്ഷിക്കുന്ന പ്രവർത്തനങ്ങൾക്കും മുൻഗണന നൽകി, ഇത്തരത്തിലുള്ള രക്ത പ്ലേറ്റ്‌ലെറ്റ് ദാന ക്യാമ്പുകൾ തുടർന്നും സംഘടിപ്പിക്കുമെന്ന് ഐസിബിഎഫ് ഭാരവാഹികൾ അറിയിച്ചു.