ദോഹ:ഇന്ത്യൻ ബിസിനസ് ആൻഡ് പ്രൊഫഷണൽ കൗൺസിൽ (IBPC Qatar) തങ്ങളുടെ പ്രമുഖ വിജ്ഞാന വിനിമയ വേദിയായ 'മൺഡേ ബൈറ്റ്‌സിന്റെ' (Monday Bites) 50-ാം സെഷൻ ദോഹ ഐബിസ് ഹോട്ടലിൽ വെച്ച് വിപുലമായി ആഘോഷിച്ചു. 'ദി ഗോൾഡൻ 50: ദി മിനി ബൈറ്റ്‌സ് എൻകോർ' എന്ന പ്രമേയത്തിൽ നടന്ന ചടങ്ങിൽ മുൻ സെഷനുകളിലെ പ്രമുഖ സ്പീക്കർമാർ പങ്കെടുത്ത് സംസാരിച്ചു.
ഇന്ത്യൻ എംബസി ഡെപ്യൂട്ടി ചീഫ് ഓഫ് മിഷൻ ശ്രീ സന്ദീപ് കുമാർ മുഖ്യാതിഥിയായിരുന്നു. പ്രൊഫഷണൽ രംഗത്തെ ഐബിപിസിയുടെ ക്രിയാത്മക ഇടപെടലുകളെ അദ്ദേഹം പ്രശംസിച്ചു.ഇതുവരെ നടന്ന 50 സെഷനുകളിലായി 40 വിദഗ്ധർ വിവിധ വിഷയങ്ങളിൽ സംസാരിക്കുകയും 2,250-ലധികം പേർ പങ്കെടുക്കുകയും ചെയ്തു.ഐബിപിസി അംഗങ്ങൾക്കായി 'IBPC AI Advantage Certification' എന്ന സൗജന്യ എഐ പരിശീലന പരിപാടി ചടങ്ങിൽ പ്രഖ്യാപിച്ചു. ബിസിനസ് രംഗത്തും തൊഴിൽ മേഖലയിലും ആർട്ടിഫിഷ്യൽ ഇന്റലിജൻസ് പ്രായോഗികമായി നടപ്പിലാക്കാൻ ഈ പ്രോഗ്രാം സഹായിക്കും.
വിവിധ പരിപാടികളിൽ സജീവമായി പങ്കെടുത്ത വോളന്റിയർമാരെ ചടങ്ങിൽ ആദരിക്കുകയും സർട്ടിഫിക്കറ്റുകൾ വിതരണം ചെയ്യുകയും ചെയ്തു.
ഐബിപിസി ഖത്തർ പ്രസിഡന്റ് താഹ മുഹമ്മദ് അബ്ദുൽ കരീം പരിപാടി നിയന്ത്രിച്ചു. ബിസിനസ് ഉടമകൾക്കും പ്രൊഫഷണലുകൾക്കും തങ്ങളുടെ കഴിവുകൾ മെച്ചപ്പെടുത്തുന്നതിനും നെറ്റ്‌വർക്കിംഗിനുമുള്ള മികച്ച വേദിയായി 'മൺഡേ ബൈറ്റ്‌സ്' മാറിയെന്ന് അദ്ദേഹം പറഞ്ഞു.
എഐ പ്രോഗ്രാമിൽ പങ്കെടുക്കാൻ താൽപ്പര്യമുള്ള അംഗങ്ങൾ ഐബിപിസി ഓഫീസുമായോ ഔദ്യോഗിക ചാനലുകൾ വഴിയോ ബന്ധപ്പെടേണ്ടതാണ്.
