റിയാദ്: ഈ വർഷത്തെ ഉംറ സീസൺ ആരംഭിച്ചതിന് ശേഷം ഉംറ വിസയിലെത്തിയ തീർത്ഥാടകരുടെ എണ്ണത്തിൽ വൻ വർധനവ് രേഖപ്പെടുത്തി. ദുൽഹിജ്ജ 15 മുതൽ മുഹറം അവസാനം വരെയുള്ള കാലയളവിൽ 9,31,500 തീർത്ഥാടകരാണ് രാജ്യത്തെത്തിയത്. മുൻവർഷത്തെ ഇതേ കാലയളവിനെ അപേക്ഷിച്ച് 22.5 ശതമാനം വളർച്ചയാണ് ഈ രംഗത്തുണ്ടായിരിക്കുന്നത്. സൗദി ഹജ്ജ്-ഉംറ മന്ത്രാലയവും ഗസ്റ്റ് ഓഫ് ഗോഡ് സർവീസ് പ്രോഗ്രാമും സംയുക്തമായാണ് ഈ കണക്കുകൾ പുറത്തുവിട്ടത്.
വിദേശങ്ങളിൽ നിന്ന് ഇതേ കാലയളവിൽ രാജ്യത്തെത്തിയ ആകെ തീർത്ഥാടകരുടെ എണ്ണം 1.27 ദശലക്ഷം (12.7 ലക്ഷം) കവിഞ്ഞതായും മന്ത്രാലയം വ്യക്തമാക്കി. വിവിധ സർക്കാർ ഏജൻസികളുടെ ഏകോപനവും ഡിജിറ്റൽ-ഓപ്പറേഷൻ സേവനങ്ങളുടെ തുടർച്ചയായ വികസനവുമാണ് തീർത്ഥാടകരുടെ എണ്ണത്തിലുണ്ടായ ഈ വർധനവിന് കാരണം.
"സൗദി വിഷൻ 2030-ന്റെ ലക്ഷ്യങ്ങൾക്ക് അനുസൃതമായി ഉംറ സംവിധാനം കൂടുതൽ കാര്യക്ഷമമാക്കാനുള്ള പ്രവർത്തനങ്ങൾ തുടരുകയാണ്. തീർത്ഥാടകർ യാത്ര ആസൂത്രണം ചെയ്യുന്നത് മുതൽ രാജ്യം വിടുന്നത് വരെയുള്ള എല്ലാ ഘട്ടങ്ങളിലും ഡിജിറ്റൽ സേവനങ്ങൾ വഴി മികച്ച അനുഭവവും ഗുണനിലവാരവുമുള്ള സേവനവും ഉറപ്പാക്കാൻ മന്ത്രാലയം പ്രതിജ്ഞാബദ്ധമാണെന്ന് സൗദി ഹജ്ജ്-ഉംറ മന്ത്രാലയംവ്യക്തമാക്കി
