ഇന്ത്യയിലെ കുഴിയുള്ള റോഡുകളിൽ ഓട്ടോറിക്ഷയിലെ ചലനം സൈക്ലിങ്ങായി തെറ്റായി തിരിച്ചറിഞ്ഞത് കണ്ടെത്തി; തുടർന്ന്  സാംസങ് എൻജിനീയർമാർ അൽഗൊരിതം പരിഷ്കരിച്ചു.ഗുരുഗ്രാം, സെപ്റ്റംബർ 26, 2026: ഗാലക്‌സി വാച്ച്9, ഗാലക്‌സി വാച്ച് അൾട്രാ2 എന്നിവയിലെ ആരോഗ്യ-വെൽനെസ് ഫീച്ചറുകൾ വികസിപ്പിക്കുന്നതിലും ഇന്ത്യൻ സാഹചര്യങ്ങളിൽ വെയറബിൾ സോഫ്റ്റ്‌വെയർ പരീക്ഷിച്ച് മെച്ചപ്പെടുത്തുന്നതിലും സാംസങ് റിസർച്ച് ഇൻസ്റ്റിറ്റ്യൂട്ട്-നോയ്ഡ (എസ്.ആർ.ഐ.-എൻ) പ്രധാന പങ്കുവഹിക്കുന്നു. ഇന്ത്യയിലെ ഡിജിറ്റൽ ആരോഗ്യ സംവിധാനവുമായി സാംസങ് ഹെൽത്തിനെ ബന്ധിപ്പിക്കുന്ന സേവനങ്ങളുടെ വികസനത്തിലും എസ്.ആർ.ഐ.-എൻ പ്രവർത്തിക്കുന്നു. സർക്കാർ നടപ്പാക്കുന്ന ആയുഷ്മാൻ ഭാരത് ഡിജിറ്റൽ മിഷൻ (എ.ബി.ഡി.എം.) സംരംഭവുമായി യോജിച്ചുള്ള പ്രവർത്തനങ്ങളും ഇതിന്റെ ഭാഗമാണ്.

“വാച്ചുമായി ബന്ധപ്പെട്ട ഫീച്ചറുകൾ ഉൾപ്പെടെയുള്ള ഡിജിറ്റൽ ആരോഗ്യസാങ്കേതികവിദ്യ ഞങ്ങളുടെ പ്രധാന ശ്രദ്ധാകേന്ദ്രങ്ങളിലൊന്നാണ്,” സാംസങ് റിസർച്ച് ഇൻസ്റ്റിറ്റ്യൂട്ട്-നോയ്ഡയുടെ മാനേജിങ് ഡയറക്ടർ ക്യുങ്യുൻ റൂ പറഞ്ഞു. “കഴിഞ്ഞ മൂന്ന് മുതൽ നാല് വർഷത്തിനിടെ ഇന്ത്യയ്ക്ക് പ്രത്യേകമായി രൂപകൽപ്പന ചെയ്ത നിരവധി സേവനങ്ങൾ ഞങ്ങൾ അവതരിപ്പിച്ചിട്ടുണ്ട്,” അദ്ദേഹം കൂട്ടിച്ചേർത്തു.

2007ൽ സ്ഥാപിതമായ എസ്.ആർ.ഐ.-എൻ, സാംസങ്ങിന്റെ ആഗോള ഗവേഷണ-വികസന കേന്ദ്രങ്ങളുമായി സഹകരിച്ചാണ് ഗാലക്‌സി മൊബൈൽ ഡിവൈസുകൾ, വെയറബിൾസ്, ടാബ്‌ലെറ്റുകൾ, സോഫ്റ്റ്‌വെയർ തുടങ്ങിയ മേഖലകളിൽ പ്രവർത്തിക്കുന്നത്. ഗാലക്‌സി വാച്ചിലെ സെൻസർ വിവരങ്ങളെ സാംസങ് ഹെൽത്ത് വഴി ആരോഗ്യ-വെൽനെസ് വിവരങ്ങളാക്കി മാറ്റുന്നതിലും ഇന്ത്യയിലെ എൻജിനീയർമാർ പങ്കാളികളാകുന്നു. പ്രവർത്തനം, ഉറക്കം, പോഷണം, മൈൻഡ്‌ഫുൾനെസ്, ആരോഗ്യ സൂചകങ്ങൾ എന്നിവയുമായി ബന്ധപ്പെട്ട ഫീച്ചറുകൾ ഇതിൽ ഉൾപ്പെടുന്നു.

“വെയറബിൾ ഡിവൈസുകളിൽ നിന്നുള്ള വിവരങ്ങളെ സ്മാർട്ട്ഫോണുകളുമായി ബന്ധിപ്പിച്ച് ദിനേനയുള്ള ആക്ടിവിറ്റികൾ, ഉറക്കം, പോഷണം, മൈൻഡ്‌ഫുൾനെസ്, പ്രധാന ആരോഗ്യ സൂചകങ്ങൾ എന്നിവയുമായി ബന്ധപ്പെട്ട വിവിധ സൗകര്യങ്ങൾ നൽകുന്നു. വെൽനെസും പ്രതിരോധ ആരോഗ്യപരിചരണവും ലക്ഷ്യമിട്ടുള്ള ആരോഗ്യ നിരീക്ഷണ ആപ്ലിക്കേഷനുകളുടെ വികസനത്തിലും ഞങ്ങൾ സംഭാവന നൽകുന്നുണ്ട്,” സാംസങ് റിസർച്ച് ഇൻസ്റ്റിറ്റ്യൂട്ട്-നോയ്ഡയിലെ സർവീസ് ഡെവലപ്‌മെന്റ് വൈസ് പ്രസിഡന്റ് ഡോ. അമിതാഭ് തപ്ലിയാൽ പറഞ്ഞു.

ഇന്ത്യയിൽ പരീക്ഷിച്ച് വികസിപ്പിച്ച ആരോഗ്യ ഫീച്ചറുകൾ

ഗാലക്‌സി വാച്ച്9, ഗാലക്‌സി വാച്ച് അൾട്രാ2 എന്നിവയിലെ വൈറ്റൽ ട്രാക്കർ, ഡെയ്‌ലി കാർഡിയോ ലോഡ്, ഹിയറിങ് ഹെൽത്ത്, ട്രെയിൽ റണ്ണിങ് തുടങ്ങിയ ഫീച്ചറുകളുടെ വികസനത്തിൽ എസ്.ആർ.ഐ.-എൻ സംഭാവന നൽകിയിട്ടുണ്ട്.

വൈറ്റൽ ട്രാക്കർ: ഹൃദയമിടിപ്പ്, ഹൃദയമിടിപ്പിലെ വ്യതിയാനം, ചർമ താപനില, ശ്വാസനിരക്ക്, ഉറക്കത്തിനിടയിലെ രക്തത്തിലെ ഓക്സിജൻ നില എന്നിവ നിരീക്ഷിക്കുന്നു. സാധാരണ നിലയിൽ നിന്ന് വ്യത്യാസം കണ്ടെത്തിയാൽ വിശദീകരണങ്ങളും നിർദേശങ്ങളും നൽകുന്നു.

ഡെയ്‌ലി കാർഡിയോ ലോഡ്: പ്രവർത്തനവും വീണ്ടെടുക്കലും, ഉറക്കവും ഉൾപ്പെടെയുള്ള വിവരങ്ങൾ സംയോജിപ്പിച്ച് വ്യായാമത്തിന്റെ തീവ്രതയെക്കുറിച്ച് വ്യക്തിഗതമായ ധാരണ നൽകുന്നു.

ട്രെയിൽ റണ്ണിങ്: നാവിഗേഷനും കയറ്റമുള്ള പാതകളിലെ മാർഗനിർദേശവും നൽകുന്നു. ഓട്ടത്തിനിടെ വിയർപ്പുമായി ബന്ധപ്പെട്ട വിവരങ്ങൾ ഉപയോഗിച്ച് വെള്ളം കുടിക്കേണ്ട സമയത്തെക്കുറിച്ചും അലർട്ട് നൽകുന്നു.

ഹിയറിങ് ഹെൽത്ത്: ശ്രവണാരോഗ്യവുമായി ബന്ധപ്പെട്ട വിവരങ്ങൾ നിരീക്ഷിക്കാൻ സഹായിക്കുന്നു.

ഇന്ത്യയിലെ പ്രാദേശിക സാഹചര്യങ്ങളിൽ സോഫ്റ്റ്‌വെയർ പരീക്ഷിക്കുന്നതും എസ്.ആർ.ഐ.-എൻ പ്രവർത്തനങ്ങളുടെ പ്രധാന ഭാഗമാണ്. പരീക്ഷണത്തിനിടെ കുഴിയുള്ള റോഡുകളിലൂടെ സഞ്ചരിക്കുന്ന ഓട്ടോറിക്ഷയിലെ ചലനം സൈക്കിൾ ചവിട്ടലായി തെറ്റായി തിരിച്ചറിഞ്ഞ സംഭവമാണ് ഇതിന് ഉദാഹരണം. ഇന്ത്യൻ എൻജിനീയർമാർ ഈ തെറ്റായ കണ്ടെത്തൽ പരിശോധിച്ച്  അൽഗൊരിതത്തിൽ ആവശ്യമായ മാറ്റങ്ങൾ വരുത്തി.

ഇന്ത്യയ്ക്കായി വികസിപ്പിച്ച ഡിജിറ്റൽ ആരോഗ്യ സംവിധാനം

സാംസങ് ഹെൽത്തിന് ചുറ്റുമുള്ള ഇന്ത്യാ-കേന്ദ്രീകൃത ഡിജിറ്റൽ ആരോഗ്യ സംവിധാനത്തിന്റെ വികസനത്തിലും എസ്.ആർ.ഐ.-എൻ പ്രവർത്തിക്കുന്നു. ഏക കെയറുമായി ചേർന്ന് എ.ബി.ഡി.എം.-അനുസൃത ഡിജിറ്റൽ ആരോഗ്യ രേഖാ സംവിധാനം, ടാറ്റ 1എംജിയുമായി ചേർന്ന് മരുന്നിന്റെ സമയക്രമം നിരീക്ഷിക്കുന്ന സംവിധാനം, ടാറ്റ 1എംജിയും ഫാർമ്ഈസിയും ചേർന്നുള്ള ‘ഫൈൻഡ് കെയർ’ സേവനം എന്നിവ ഇതിൽ ഉൾപ്പെടുന്നു. ഡോക്ടർ കൺസൾട്ടേഷൻ, മരുന്ന് ഓർഡർ, ലാബ് പരിശോധന ബുക്കിങ് തുടങ്ങിയ സേവനങ്ങൾ സാംസങ് ഹെൽത്തിലൂടെ ലഭ്യമാക്കുകയാണ് ഇതിന്റെ ലക്ഷ്യം.

ഉപയോക്താവിന്റെ സമ്മതത്തോടെ എ.ബി.ഡി.എം.-അനുസൃത ആരോഗ്യ സേവനദാതാക്കളുമായി ആരോഗ്യ രേഖകൾ പങ്കിടാനും സംവിധാനത്തിലൂടെ കഴിയും. ഉദാഹരണത്തിന്, സാംസങ് ഹെൽത്തിലൂടെ നടത്തിയ കൺസൾട്ടേഷനിൽ ലഭിക്കുന്ന ഡിജിറ്റൽ കുറിപ്പിൽനിന്ന് എ.ഐ. ഉപയോഗിച്ച് മരുന്ന് വിവരങ്ങൾ തിരിച്ചറിഞ്ഞ് മെഡിക്കേഷൻ മാനേജ്‌മെന്റ് ട്രാക്കറിലേക്ക് ചേർക്കാം. ഈ വിവരങ്ങൾ ഉപയോക്താവിന്റെ ആരോഗ്യ രേഖയിലും എ.ബി.ഡി.എം. സംവിധാനത്തിലൂടെ ആയുഷ്മാൻ ഭാരത് ഹെൽത്ത് അക്കൗണ്ടിലും സൂക്ഷിക്കാനാകും. മരുന്ന് കഴിക്കേണ്ട സമയത്തെ അറിയിപ്പുകൾ ഗാലക്‌സി വാച്ചിലും ലഭിക്കും.

വൈവിധ്യമാർന്ന ആവശ്യങ്ങൾക്കനുസരിച്ചുള്ള പരിഹാരങ്ങൾ ഞങ്ങൾ രൂപകൽപ്പന ചെയ്യുമ്പോൾ ജനസംഖ്യാ ഘടനയും പ്രാദേശിക രീതികളും പരിഗണിച്ചുകൊണ്ടാണ് സോഫ്റ്റ്‌വെയർ വികസിപ്പിക്കുന്നതെന്ന്  ഡോ. തപ്ലിയാൽ പറഞ്ഞു. ഇന്ത്യയിലെ എൻജിനീയർമാർ സെൻസർ സാങ്കേതികവിദ്യയിൽ വരുത്തിയ മെച്ചപ്പെടുത്തലുകൾ സാംസങ്ങിന്റെ ആഗോള ഉൽപ്പന്നങ്ങളിലും ഉൾപ്പെടുത്തിയിട്ടുണ്ട്. ഇന്ത്യയിലെ സാഹചര്യങ്ങളിൽ സാങ്കേതികവിദ്യ പരീക്ഷിച്ച് മെച്ചപ്പെടുത്തുന്നതിനൊപ്പം ആഗോള ഉൽപ്പന്നങ്ങൾക്കായുള്ള സാങ്കേതികവിദ്യ വികസിപ്പിക്കുന്നതിലും എസ്.ആർ.ഐ.-എൻ പങ്കുവഹിക്കുന്നു.

ആരോഗ്യ വിവരങ്ങളെ അടിസ്ഥാനമാക്കി വ്യക്തിഗത നിർദേശങ്ങൾ നൽകുകയും ഉപയോക്താക്കളെ അവരുടെ ആരോഗ്യത്തെക്കുറിച്ച് കൂടുതൽ ബോധപൂർവമായ തീരുമാനങ്ങളെടുക്കാൻ സഹായിക്കുകയും ചെയ്യുന്നതിലാണ് സാംസങ് ഹെൽത്തിന്റെ ഈ സമീപനം.

Photo Courtesy - Google