ദോഹ: ആഭ്യന്തര മന്ത്രാലയത്തിന്റെ മെട്രാഷ് (Metrash) ആപ്പ് വഴി ഫീസുകൾ, പിഴകൾ, യാത്രാ ടിക്കറ്റുകൾ എന്നിവയുൾപ്പെടെയുള്ള വിവിധ സാമ്പത്തിക ബാധ്യതകൾ (Financial Claims) ഡിജിറ്റലായി അടയ്ക്കാനുള്ള സൗകര്യം ലഭ്യമാണെന്ന് അധികൃതർ അറിയിച്ചു. വളരെ ലളിതമായ ഘട്ടങ്ങളിലൂടെ ഉപഭോക്താക്കൾക്ക് ഈ സേവനം പ്രയോജനപ്പെടുത്താം. മെട്രാഷ് ആപ്പിന് പുറമെ മന്ത്രാലയത്തിന്റെ ഔദ്യോഗിക വെബ്‌സൈറ്റ് വഴിയും ഈ പെയ്‌മെന്റുകൾ പൂർത്തിയാക്കാവുന്നതാണ്.മെട്രാഷ് ആപ്പ് തുറന്ന ശേഷം ആദ്യം 'സെക്യൂരിറ്റി' (Security) എന്ന ഓപ്ഷനിലാണ് പ്രവേശിക്കേണ്ടത്. തുടർന്ന് അതിൽ കാണുന്ന 'ഫിനാൻഷ്യൽ ക്ലെയിംസ്' (Financial claims) എന്നത് തിരഞ്ഞെടുക്കുക. അടുത്ത ഘട്ടമായി ഉപഭോക്താവിന്റെ വ്യക്തിഗത നമ്പറോ (QID) അല്ലെങ്കിൽ ബന്ധപ്പെട്ട മറ്റ് വിവരങ്ങളോ ഇവിടെ രേഖപ്പെടുത്തേണ്ടതുണ്ട്. വിവരങ്ങൾ നൽകിക്കഴിഞ്ഞാൽ നിങ്ങളുടെ പേരിൽ നിലവിലുള്ള സാമ്പത്തിക ബാധ്യതകളുടെ ലിസ്റ്റ് സ്ക്രീനിൽ തെളിയും; ഇതിൽ നിന്നും അടയ്ക്കാനാഗ്രഹിക്കുന്ന പ്രത്യേക ക്ലെയിം തിരഞ്ഞെടുക്കുകയാണ് അടുത്തതായി ചെയ്യേണ്ടത്. തുടർന്ന് നിർദ്ദേശിച്ചിരിക്കുന്ന ഫീസ് തുക കൃത്യമായി അടയ്ക്കുന്നതോടെ പെയ്‌മെന്റ് വിജയകരമായി പൂർത്തിയായതായി (Completed) കാണിച്ചുകൊണ്ടുള്ള സന്ദേശം സ്ക്രീനിൽ ദൃശ്യമാകും.ജനങ്ങൾക്ക് സേവനങ്ങൾ കൂടുതൽ വേഗത്തിലും സുതാര്യമായും ലഭ്യമാക്കുന്നതിന്റെ ഭാഗമായാണ് ആഭ്യന്തര മന്ത്രാലയം ഡിജിറ്റൽ പേയ്‌മെന്റ് സംവിധാനങ്ങൾ കൂടുതൽ ലളിതമാക്കിയിരിക്കുന്നത്.
