മൂവാറ്റുപുഴ: ചപ്പാത്തി നിർമാണത്തിനിടെ യന്ത്രത്തിൽ കൈ കുരുങ്ങി ഗുരുതരമായി പരുക്കേറ്റ വ്യാപാരിയായ വീട്ടമ്മ മരിച്ചു. വാഴക്കുളം സ്റ്റാർ ചപ്പാത്തി കട ഉടമ പള്ളിക്കുന്നേൽ റെജിമോൾ ജസ്റ്റിൻ (52) ആണ് മരിച്ചത്. വിൽപനയ്ക്കുള്ള ചപ്പാത്തി തയ്യാറാക്കുന്നതിനിടെയാണ് അപകടമുണ്ടായത്.
യന്ത്രത്തിൽനിന്ന് അസാധാരണമായ ശബ്ദവും മണവും കേട്ടതിനെ തുടർന്ന് സ്ഥാപനത്തോടു ചേർന്നുള്ള വീട്ടിൽനിന്ന് മകൻ എത്തി പരിശോധിച്ചപ്പോഴാണ് റെജിമോളുടെ കൈ യന്ത്രത്തിൽ കുടുങ്ങിയ നിലയിൽ കണ്ടെത്തിയത്. ഉടൻ ആശുപത്രിയിൽ എത്തിച്ചെങ്കിലും ചികിത്സയ്ക്കിടെ മരണം സംഭവിക്കുകയായിരുന്നു.
ഭർത്താവ് ജസ്റ്റിന്റെ മരണശേഷം മക്കളെ വളർത്തുന്നതിനായാണ് റെജിമോൾ സ്റ്റാർ ചപ്പാത്തി കട ആരംഭിച്ചത്. ഭർത്താവിന്റെ വിയോഗത്തിനുശേഷം കുടുംബത്തിന്റെ ഉത്തരവാദിത്തം ഏറ്റെടുത്ത് ജീവിതം മുന്നോട്ടുകൊണ്ടുപോകുന്നതിനിടെയാണ് അപ്രതീക്ഷിത അപകടം ദുരന്തമായി മാറിയത്.
റെജിമോളുടെ സംസ്കാരം ഇന്നു രാവിലെ 10.30ന് വസതിയിലെ ശുശ്രൂഷകൾക്ക് ശേഷം വാഴക്കുളം സെന്റ് ജോർജ് ഫൊറോന പള്ളിയിൽ നടക്കും. മക്കൾ: ജാസ്മിൻ, ജ്യോതി ദർശന, ജസ്റ്റോ.
