തിരുവനന്തപുരം:സംസ്ഥാനത്തെ സ്കൂളുകളിലെ വേനലവധി മഴക്കാലത്തേക്ക് മാറ്റുന്നതിനെക്കുറിച്ച് വിദ്യാഭ്യാസ മന്ത്രി വി. ശിവൻകുട്ടി മുന്നോട്ടുവച്ച നിർദേശം വലിയ ചർച്ചകൾക്ക് തുടക്കമിട്ടിരിക്കുകയാണ്. നിലവിൽ ഏപ്രിൽ-മേയ് മാസങ്ങളിലാണ് സ്കൂളുകൾക്ക് അവധി. എന്നാൽ കനത്ത മഴയും പ്രകൃതിദുരന്തങ്ങളും കാരണം ജൂൺ-ജൂലൈ മാസങ്ങളിൽ പലപ്പോഴും ക്ലാസുകൾ മുടങ്ങുന്നുണ്ട്. ഇത് പരിഹരിക്കാനാണ് അവധി ഈ മാസങ്ങളിലേക്ക് മാറ്റുന്നതിനെക്കുറിച്ച് ആലോചിക്കുന്നത്.
ഈ നിർദേശത്തെ അനുകൂലിച്ചും പ്രതികൂലിച്ചും നിരവധി അഭിപ്രായങ്ങൾ ഉയരുന്നുണ്ട്. മഴക്കാലത്ത് കുട്ടികൾക്ക് വീട്ടിലിരിക്കുന്നത് കൂടുതൽ സുരക്ഷിതമാണെന്ന് ഒരു വിഭാഗം രക്ഷിതാക്കൾ പറയുന്നു. എന്നാൽ വേനലവധി നഷ്ടമാകുന്നതിലൂടെ കായിക വിനോദങ്ങളിൽ ഏർപ്പെടാൻ കുട്ടികൾക്ക് സമയം കിട്ടില്ലെന്നും, മഴക്കാലത്ത് പുറത്തിറങ്ങാൻ കഴിയാത്തതിനാൽ കുട്ടികൾ ഡിജിറ്റൽ ഉപകരണങ്ങൾക്ക് അടിമകളാകാൻ സാധ്യതയുണ്ടെന്നും ചിലർ ചൂണ്ടിക്കാട്ടുന്നു. കടുത്ത ചൂടും ജലക്ഷാമവും കാരണം വേനൽക്കാലത്ത് പഠനം ദുസ്സഹമാണെന്ന് അധ്യാപക സംഘടനകളും പറയുന്നു.
വിഷയത്തിൽ വിശദമായ ചർച്ചകൾക്കും വിദഗ്ധരുടെ അഭിപ്രായം തേടിയ ശേഷം മാത്രമേ അന്തിമ തീരുമാനമെടുക്കൂവെന്ന് മന്ത്രി അറിയിച്ചു.
