ദോഹ: മേഖലയിലെ സംഘർഷങ്ങളും ഹോർമുസ് കടലിടുക്കിന്റെ (Strait of Hormuz) അടച്ചുപൂട്ടലും നിലനിൽക്കുന്നുണ്ടെങ്കിലും ഖത്തറിലെ വിപണികൾ സുസ്ഥിരമാണെന്നും അവശ്യസാധനങ്ങളുടെ ലഭ്യത ഉറപ്പാക്കിയിട്ടുണ്ടെന്നും വാണിജ്യ വ്യവസായ മന്ത്രി ഷെയ്ഖ് ഫൈസൽ ബിൻ താനി ബിൻ ഫൈസൽ അൽ താനി അറിയിച്ചു. ഖത്തർ ടെലിവിഷന് നൽകിയ അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്.
​ഏതൊരു സാഹചര്യത്തെയും നേരിടാൻ രാജ്യം ദീർഘകാലാടിസ്ഥാനത്തിലുള്ള പദ്ധതികൾ തയ്യാറാക്കിയിട്ടുണ്ടെന്ന് അദ്ദേഹം പറഞ്ഞു.പത്ത് വർഷം മുമ്പ് സ്ഥാപിച്ച ഓപ്പറേഷൻ സെന്റർ വഴി സാധനങ്ങളുടെ നീക്കം ഡിജിറ്റൽ സംവിധാനത്തിലൂടെ തത്സമയം നിരീക്ഷിക്കുന്നുണ്ട്. നിലവിൽ 300-ലധികം ഇൻസ്പെക്ടർമാർ വിപണിയിൽ പരിശോധന നടത്തുന്നു. പ്രതിദിനം 3,000 പരിശോധനകളാണ് നടക്കുന്നത്.തടസ്സപ്പെട്ട സാഹചര്യത്തിൽ നേരത്തെ നിശ്ചയിച്ചിരുന്ന ബദൽ ലോജിസ്റ്റിക്സ് പദ്ധതികൾ ഖത്തർ നടപ്പിലാക്കി കഴിഞ്ഞു. ഖത്തർ എയർവേയ്‌സുമായി സഹകരിച്ച് വിമാനമാർഗ്ഗം (Air freight) ഇതിനകം 300 ടൺ അവശ്യസാധനങ്ങൾ എത്തിച്ചു. ഇത് 1,000 ടണ്ണായി ഉയർത്താനാണ് ലക്ഷ്യം.  ആഗോളതലത്തിൽ ഗതാഗത ചെലവ് വർദ്ധിച്ചതിനാൽ വിലയിൽ ചെറിയ വർദ്ധനവ് ഉണ്ടായേക്കാം. എന്നാൽ ഇത് താൽക്കാലികം മാത്രമാണ്. അനാവശ്യമായ വിലക്കയറ്റം തടയാൻ കർശന നടപടി സ്വീകരിക്കും. പരാതികൾക്കായി 16001 എന്ന ഹോട്ട്‌ലൈൻ നമ്പറിൽ ബന്ധപ്പെടാം.ഖത്തറിൽ ഇപ്പോൾ 138 ഭക്ഷ്യ ഫാക്ടറികളുണ്ട്. 2,000-ലധികം പ്രാദേശിക ഉൽപ്പന്നങ്ങൾ വിപണിയിലുണ്ട്. ഇത് കഴിഞ്ഞ വർഷത്തെക്കാൾ 9% വർദ്ധനവാണ്.അരി, പഞ്ചസാര, ഗോതമ്പ്, എണ്ണ തുടങ്ങിയ അവശ്യവസ്തുക്കളുടെ വൻ ശേഖരം രാജ്യത്തുണ്ട്. നിലവിൽ വിപണിയിലുള്ള സാധനങ്ങൾ തന്നെ ആവശ്യത്തിന് ഉള്ളതിനാൽ ഈ കരുതൽ ശേഖരത്തിൽ (Strategic Reserves) നിന്ന് സാധനങ്ങൾ എടുക്കേണ്ട സാഹചര്യം ഇതുവരെ ഉണ്ടായിട്ടില്ല.